E Vakainaki Dina na Bula?

“E VAKAINAKI na bula?” Qori na ka era lomatarotarotaka e levu. Se mani cava na nodra rai e levu me baleta na bula, e ka ni rarawa nira se vakila ga na ka e tukuna na turaga ni Austria e dau dikeva na vakasama o Viktor E. Frank, ni “sega ni vakainaki qai tawayaga” na nodra bula.

Na cava e va kina qori na nodra rai e levu? Dua na vuna, e vica na milioni e veiyasa i vuravura e vakaloloma qai vakamosiyalo na ituvaki era tu kina. E ka ni veisiga na nodra raica na bula dravudravua, tauvimate, caka vakasausa ni ivalavala voravora, kei na veivakalolomataki. Na nodra bula e “vutu ni rarawa,” qori tale ga na ka e tukuna o Jope ena gauna makawa me baleta na rarawa. (Jope 14:1) O ira va qori era saga tiko mera bula rawa mada ga e veisiga.

E vica tale na milioni era rawaka vinaka toka vakayago. Kena irairai ni tu vei ira na ka kece mera marautaka kina na bula. Ia e levu era sega ni vakila qori. Na cava na vuna? Era sotava ena so na gauna na leqa kei na “rarawa”—na leqa vakailavo e tawanamaki se veika mosimosi me vaka na nona takali e dua na gone e dau vakaseva na ka era vakanuinuitaka se tatadrataka.—Same 90:10.

E dua tale na vuna e nanumi kina vakalevu ni “sega ni vakainaki qai tawayaga” na bula, oya ni lekaleka ga na gauna ni bula. E dredre mera vakabauta e levu ni lekaleka ga na noda gauna ni bula, ni tu e levu na ka eda rawa ni cakava. Era sega ni kila o ira qori na ka dina eda rawa ni sotava kece: Ke da sega mada ga ni sotava na leqa lelevu ena dua na gauna lekaleka qo se gauna se bera mai, na mate e rawa ni kauta laivi kece na ka eda taukena.—Dauvunau 3:19, 20.

Ena Rawa ni Vakainaki Dina na Bula?

A vakamacalataka vinaka o Tui Solomoni e Isireli makawa na ituvaki qori. A raica na nodra cakacaka vakaukaua na tamata ena nona gauna nira vakayagataka na nodra taledi kei na kila ena bucibucini kei na teitei, tara vale, kei na qaravi ni vuvale, me vaka ga e caka tu nikua. A  taroga: ‘Na cava na itinitini ni ka kece qori?’ A tukuna ni “tawayaga qai vaka na cemuri cagi” na ka kece eda cakava.—Dauvunau 2:17, The New English Bible.

A vakabauta beka o Tui Solomoni ni ‘tawayaga qai vaka na cemuri cagi’ na ka kece eda cakava? Sega. A tukuna tiko ga na ka e dau yaco dina ena vuravura qo e sega ni uasivi. Ia e vakadeitaka na Vosa uqeti ni Kalou ni na sega ni yaco tu ga na veika qori!

O rawa ni vakadeitaka vakacava qori? Wilika mada na rua na ulutaga tarava. O na kila kina na vuna e nanumi kina ni sega ni vakainaki na bula, ena veisau vakacava na rai qori, na ka tale ga mo cakava me vakainaki dina kina na nomu bula ena gauna mada ga qo.