Adda Kadi Aniaman a Panggep ti Biag?
Adda Kadi Aniaman a Panggep ti Biag?
“ADDA kadi panggep ti biag?,” isalsaludsod ti adu. Ngem makapaladingit ta aniaman ti panangmatmatda iti biag, saanda a maliklikan ti dineskribir ti Austriano a neurologo a ni Viktor E. Frankl a pannakarikna iti “kaawan mamaay ken kaawan panggep ti biag.”
Apay a kasta ti rikna ti adu? Marigrigat ken nakakaasi ngamin ti minilion a tattao. Paseten ti biagda ti kinapanglaw, sakit, kinaranggas, ken pannakaikuspil. Ti biagda ket “napno iti rigat,” kas iti kinuna ni Job idi agsagsagaba. (Job 14:1, Ti Baro a Naimbag a Damag Biblia) Kontentodan no agbiagda la ketdi iti inaldaw-aldaw.
Medio nasaliwanwan ti biag ti minilion. Kasla adda kadakuadan ti amin a kasapulanda tapno agbalinda a naragsak. Ngem adu pay laeng ti marigrigat. Apay? Masansan ngamin a mapaay dagiti arapaapda gapu iti “riribuk ken makapasakit a bambanag”—di mapakpakadaan a panagparikut iti kuarta wenno trahedia, kas iti ipapatay ti maysa nga anak.—Salmo 90:10.
Kumaro pay ti pannakarikna iti “kaawan mamaay ken kaawan panggep ti biag” gapu iti kinaababa unay dayta. Adu ti mangibaga nga awan serserbi ti kinalaing ti tao no ababa met ti biagna. Saanda a matarusan ti nakas-ang a kinapudno a sangsanguentayo: Uray no malasatantayo dagiti nakaro a didigra, mataytayonto met la amin.—Eclesiastes 3:19, 20.
Kanayonto Kadi a Kasla Awan Mamaay ti Biag?
Ti ari ti nagkauna nga Israel a ni Solomon nagsayaat ti panangiladawanna iti kasasaad ti biag. Nakitana a nagreggetan dagiti tattao ti agmula, agtalon, agbangon, ken mangaywan iti pamiliada, kas met iti kaaldawantayo. Arigna kinunana, ‘Adda kadi aniaman a mamaay dagitoy?’ Kas konklusion, imbagana nga amin nga aramid ti tao ket “kinaubbaw ken panangkamkamat iti angin.”—Eclesiastes 2:17.
Ngem patien kadi ni Ari Solomon a kanayon a “kinaubbaw ken panangkamkamat iti angin” ti amin nga aramiden ti tao? Saan. Ibagbagana laeng ti pudno a pagbanagan ti biag iti daytoy imperpekto a lubong. Nupay kasta, ipasigurado ti Sao ti Dios a saanto a kanayon a kastoy ti kasasaad!
Kasano a masiguradom dayta? Pangngaasim ta basaem ti sumaruno a dua nga artikulo. Iti kasta, matarusam no apay a kasla awan mamaay ti biag, no kasano a masolbar daytoy a kasasaad, ken no kasano a maaddaanka iti pudno a panggep iti biag uray ita.
