Lelo Būmi Budi na Kitungo Kampanda?
Lelo Būmi Budi na Kitungo Kampanda?
“LELO būmi budi na kitungo kampanda?” Bantu bavule beipangulanga kino kipangujo. Kya bulanda, mwanda nansha shi babandaule būmi namani, bafulanga ku binenwa bya Viktor E. Frankl mwifundi wa tujilojilo bya amba bamonanga’mba būmi bwabo “kebudipo na kitungo kadi i bwa bitupu.”
Mwanda waka bantu bamonanga namino? I pa mwanda wa kintu kimo, midiyo ya bantu pano pa ntanda badi mu ngikadilo ya bulanda ne kutyumukwa mutyima. Difuku ne difuku, bekondanga na bulanda, misongo, butapani bwa bitupubitupu ne kasusu. Būmi bwabo, bine i ‘buyule tusuwa,’ enka mwānenene’kyo Yoba pa kala pangala pa masusu a bantu. (Yoba 14:1) Kitungo kyabo kibajinji ke’nka kumona mwa kwikadila mu būmi difuku ne difuku.
Bantu bakwabo bavule badi na bupeta bungi. Bamweka bu badi na bintu byonso bibakwasha bekale na nsangaji ya binebine mu būmi. Ino bakwabo kebadipo nabyo. Mwanda waka? Mwanda kyaba ne kyaba “kuputumina mu mīngilo, ne kufītwa ku mutyima”—kupona kwa misokwe mu kitulumukila nansha bimpengele bibibibi, kimfwa lufu lwa mwana—kukombanga lukulupilo lwabo ne kuvutakanya byobadi balanga.—Mitōto 90:10.
Kudi kintu kikwabo kitamijanga mulangwe wa amba būmi “kebudipo na kitungo kadi i bwa bitupu.” Le i kintu’ka? I kwipipa kwa būmi. Bantu bavule kebemvwanijepo mwanda waka bantu, badi na bukomo bwa kulonga bintu bivule nenki bekalanga bōmi mu kitatyi kityetye namino. Kebemvwanijepo uno mwanda mubi otutanwa nao amba: Nansha shi tubapande ku mwanda kampanda ufikila bantu, ino dyakadilwe kantu dino, lufu luketupitula.—Musapudi 3:19, 20.
Le Būmi Bukamweka Nyeke bu Bwampikwa Kitungo?
Solomone Mulopwe wa Isalela wa kala wānene mu kīpi uno mwanda. Wāmwene bantu ba mu andi mafuku bengila bininge na kwingidija bwino ne bukomo bwabo pa kukuna, kudima, kūbaka ne kulama bisaka byabo enka motulongela dyalelo. Wāipangwile amba, ‘Le byonso bifulanga namani?’ Wāvuya na kunena amba, byonso bilonga bantu “i byabitupu ne kupanga luvula.”—Musapudi 2:17.
Ino le Mulopwe Solomone wādi ukulupile amba bintu byonso bilonga muntu nyeke “i byabitupu ne kupanga luvula”? Mhm. Wādi unena’tu bintu bilongeka mu būmi mu ino ntanda yampikwa kubwaninina. Inoko, Kinenwa kya ku bukomo bwa mushipiditu wa Leza kikokeja kwitupa lukulupilo lwa amba bintu kebikendelelapo kwikala mobikadile dyalelo!
Le ukokeja kutana namani kino kikulupiji? Tubakulombe utange bishinte bibidi bilonda’ko. Bikokeja kukukwasha wimvwanije mwanda waka būmi bumweka bu bwampikwa kitungo, muswelo ukapwa uno mwanda, ne muswelo okokeja kwikala na būmi bwa kitungo tamba’nka pano.
