Okuti Omuenyo Una Umwe Esilivilo?
Okuti Omuenyo Una Umwe Esilivilo?
“OKUTI omuenyo una umwe esilivilo?” Ovanthu ovanyingi vehole okupula ngotyo. Tyihaeta ehambu, ovanyingi vekahi monkhalelo yapopia omuhakuli Viktor E. Frankl o (neurologista) okuti “omuenyo wavo utupu esilivilo”.
Oityi ovanthu ovanyingi-nyingi vasokela ngotyo? Otyipuka tyimwe, omokonda ovanyingi mouye vekahi moluhepo olunene, nemone enene. Kese nthiki, vapindukapo noluhepo, nokuvela, pokati konongangala, nokulingwa onya. Omuenyo wavo tyotyili “weyula ononkhumbi,” ngetyi Job apopia konthele yemone liovanthu. (Jó 14:1) Etyi vahanda vala, okuhupa kese nthiki.
Otyinyingi tyovanthu ovakuavo vena otyihupa tyomalumono. Ngoti vena atyiho vesukisa pala ehambu liotyotyili. Mahi ovanyingi nkhele vetupu ehambu. Omokonda yatyi? Omokonda apeho “vamona ononkhumbi novipuka ovivi,” ngo ovitateka vionombongo, nonkhia mbomona, ovipuka ovio vivepola ekevelelo ewa ankho vena.—Salmo 90:10.
Kuna otyikuavo ovanthu vasokela okuti “omuenyo utupu esilivilo”. Oityi? Omokonda omuenyo omusupi unene. Kovanyingi, katyikahi nawa ovanthu vokualingwa nepondolo liokulinga ovipuka ovinene, mahi omuenyo wavo omusupi. Ovanthu ovo kavetyii oityi tumonena ovivi: Namphila tuhupa koviponga vipita mouye, mahi nthiki imwe ononkhia mambuvete pepito lietu.—Eclesiastes 3:19, 20.
Okuti Omuenyo Maukakala Apeho Ngoti Kausilivila?
Solomau Ohamba yo Isilayeli kohale, wahangununa nawa otyitateka otyo. Oe wamona oñgeni ovanthu kononthiki mbae ankho vaundapa unene nomaunongo avo okulima, nokutuika, nokutunga, nokutekula onombunga mbavo, ngetyi tulinga hono. Iya apulu okuti: ‘Otyo atyiho tyikahulilapi?’ Amanuhula okuti, aviho ovanthu valinga, ‘vitupu esilivilo, okuhatekela momphepo.’—Eclesiastes 2:17, Bíblia de Jerusalém.
Mahi, okuti Ohamba Salomau ankho utavela okuti aviho ovanthu valinga apeho vikala ‘tyihena natyike, okuhatekela momphepo’? Au. Oe ankho ukahi vala nokupopia etyi tyipita momuenyo ou wo vakuankhali. Anthi, Ondaka ya Huku utuavela onthumbi yokuti ovipuka kamavitualako apeho ngetyi vikahi!
Oñgeni mokala nonthumbi oyo? Mbambavo tanga ononthele onombali mambulandulako. Mambukuvatela okunoñgonoka oityi omuenyo wakalela ngoti kausilivila, oñgeni otyo matyitetululwa, no ñgeni mopande tyotyili omuenyo wove alo umwe pahe.
