Wala Kasi Kana na Bilay?
Wala Kasi Kana na Bilay?
“WALA kasi kana na bilay?” Ontan so itetepet na dakel. Makapaermen ta anggan antoy gawaen da et siansian nalilikna ra so imbaga nen Viktor E. Frankl, sakey a doktor diad Austria: “Singa anggapoy kana [na bilay] tan singa walay kulang.”
Akin et ontan so nalilikna na dakel? Lapud pakaskasi tan maer-ermen so situasyon na minilyon a totoo ed mundo. Parte la na bilay da so irap, sakit, kaugsan, tan panagmaltrato. Talagan ‘napno ira na gonigon,’ a singa imbaga nen Job nensaman nipaakar ed paniirap na too. (Job 14:1, Maung a Balita) Tan tumalikarkar ira kalamor pian labat nabilay.
Balet, wala met iray arum ya mayaman tan singano wala lad sikaray amin pian magmaliw a maliket. Ingen ta siansia nin andi. Akin ey? Lapud dederalen na “ermen tan segsegang” so ilalo tan ambisyon da. Alimbawa, no biglan onirap so bilay da odino walaray nagawan trahedya, a singa say ipatey na sakey ya anak.—Salmo 90:10, MB.
Wala ni sananey a mamapaloor ed nalilikna ra. Anto itan? Say antiktikey a bilay. Pankelawan na dakel, anta maabilidad so too, akin balet et agda naparukey so bilay. Agda naawat so katuaan ya: Anggano naliktaran tayo ray graben trahedya, nasabi panaon et ompatey tayo met lanlamang.—Eclesiastes 3:19, 20.
Onia Lan Naynay Kasi so Bilay?
Malinlinew so impangipaliwawa na sakey ya Ari nensaman a si Solomon ed sayan situasyon. Naobserbaan to so pansasagpot na totoo nen panaon to ya ikana iray abilidad da ed panagtanem, panagpaalagey, tan panangasikaso ed pamilya ra, a singa gagawaen tayo met natan. Singa to itetepet so onia: ‘Antoy gunggona na sarayan amin?’ Say konklusyon to et ‘andi-kakanaan tan panguusil labat ed dagem’ so amin a gagawaen na totoo.—Eclesiastes 2:17, MB.
Balet, labay kasin ibaga nen Solomon ya amin a gawaen na too et naynay lan ‘andi-kakanaan tan panguusil ed dagem’? Andi. Ibabaga to labat no anton talagay nagagawad bilay ed sayan aliwan perpekton mundo. Anggaman ontan, natulongan ka na Salita na Dios, say Biblia, pian manmatalek ya aliwa labat lan onia so bilay!
Antoy kaukolan mon gawaen? Ipangasin basaen so onsublay ya duaran artikulo pian natalosan mo no akin et singa anggapoy kana na bilay, no panon a solusyonan iyan situasyon, tan no panon a natan ni labat et magmaliw lan tuan maliket so bilay mo.
