MÍLES di hende ta buska pa sa e berdadero sentido di bida. Pero lamentablemente, ni maske for di ki ángulo nan wak bida, hopi di nan no por keda sin sinti loke e neurólogo austriako Viktor E. Frankl a papia di dje. El a bisa ku hopi hende ta sinti ku nan bida ta “bashí i sin nifikashon.”

Dikon hopi hende ta sinti asina? Un motibu ta ku miónes di hende rònt mundu ta biba den sirkunstansianan sumamente teribel i tristu. Tur dia di nobo nan tin ku trata ku pobresa, malesa, violensia i opreshon. Di bèrdat nan bida ta “yen di problema,” manera Jòb di antigwedat a bisa. (Jòb 14:1) Nan úniko meta den bida ta: lucha pa mira e siguiente dia.

Di un otro banda, miónes di hende ta disfrutá di un grado di prosperidat. Ta parse ku nan tin tur kos nesesario pa ta felis. Pero esei no ta e kaso. Dikon? Pasobra kada bes di nobo, nan ta mira kon “molèster i pena,” esta, problema finansiero imprevisto òf tragedia, manera morto di un yu, ta kibra tur nan soño i speransa na filingrana.​—Salmo 90:10.

Esei no ta tur kos. E sintimentu di ku bida ta “bashí i sin nifikashon” ta bira pió ora hende realisá kon kòrtiku bida ta. Hopi di nan no por kaba di komprondé kon por ta posibel ku e ser humano ku tur su abilidat i kapasidat ta biba asina poko tempu. Nan no ke aseptá e realidat amargo aki: Aunke nos no pasa den e pió kalamidatnan di bida, tardi òf trempan morto ta bini i nos ta pèrdè tur kos.​—Eklesiastés 3:​19, 20.

Bida Semper Lo Keda Asin’akí?

Rei Salomon di antiguo Israel a deskribí bida hopi bon. El a mira hende den su tempu lucha pa bai dilanti, nan a usa nan talento i abilidat pa planta, kultivá, konstruí i kuida nan famia, meskos ku nos ta hasi awe. Sinembargo, Salomon a puntra su mes: ‘Kiko hende ta  logra al final?’ El a yega na e konklushon ku tur kos ku hende hasi ta “bashí i [un] korementu tras di bientu.”​—Eklesiastés 2:17, The New English Bible.

Akaso Rei Salomon kier a bisa ku tur kos ku hende hasi semper ta “bashí i [un] korementu tras di bientu”? Nò. Simplemente e tabata splika na un manera realístiko kon bida ta den e mundu imperfekto akí. Sinembargo, e Palabra inspirá di Dios ta garantisá nos ku bida lo no keda semper asin’akí.

E siguiente dos artíkulonan lo papia mas di e garantia akí. Nan lo yuda bo komprondé dikon bida ta parse bashí, kon e situashon akí lo drecha i kon for di awor bo por duna bo bida mas sentido.