Ngngar er Ngii a Mera el Belkul a Klengar?

“A KLENGAR, ngngar er ngii a mera el belkul? A rebetok el chad a mla oker er tia el ker. Engdi ngklengiterreng, el ua lolekoi a ta er a toktang el neurologist el Viktor E. Frank el chad er a Austria el kmo, ngkmal mo ua ngerang a osenged el kirel a klengar, me kid a di diak el sebeched el mochib er a uldasu el kmo, “a klengar a bechachau e diak a belkul.”

Ngera uchul me a rebetok a omdasu el uaisei? A ta er ngii a kmo, a rebetok el miliol el chad el meliuekl er a beluulechad el rokir a kiei el kmal imis el chebuul a klengar er tir. A bek el sils, e te mekiis el songerenger, e smecher, e chelebangel a meringel el odechelakl, e dirrek el smecher a rengrir me a uldesuir. A klengar er tir a mera el “betok a ringelel,”el uai a tekoi le dilu Job er a irechar el kirel a ringel el klechad a chuarm er ngii. (Job 14:1) Me a kot el klou a ultutelel el tekoi el lomes er ngii er a bek el sils a kmo te mekerang e mo sebechir el kiei el lmuut el nguu a ta er a sils.

E a relmuut el betok el miliol a kuk kiei el kmal ungilbesrir el diak a ngesonges er tir. Ngdi ngar er ngii a rokui el tekoi el lousbech el sebechel el mo uchul a ungil el klengar. Engdi a ruumesingd er tir a diak el ledeu a rengrir. E ngera uchul? Ngdi ua lolekoi a bades el kmo, a “blekiklreng ma uldikel” er a klengar el ua telemellel a keizai, meringel el chelebuul el ua kodellel a ngalek a sebechel el tomall a omelatk me a ungil el turrekong.​—Psalm 90:10.

Ngar er ngii a lmuut el ta er a klou el tekoi el sebechel el mo uchul a “bechachau e diak a belkul el klengar.” Tia ngngera el tekoi? Ngklengar er a rechad el kmal di kedeb a temel. A rebetok a rrau a rengrir el kirel a klengar er a chad, el ngii a sebechel el remuul a betok el tekoi, engdi a temel a klengar er ngii a kmal di kedeb. Ngkmal meringel er tir el mo kongei er a klemerang er tia el tekoi el kid el rokui a chelebangel er ngii. Alta e ngmo er ngii a techelled el oibngid er a kmal meringel el blekeradel er a klengar er chelechang me a lechub e nguriul, engdi kede ungil el medengei el kmo ngdiak a ta er kid el sebechel el oibngii er a kodall.​—Olisechakl 3:19, 20.

A Klengar Ngmelemolem el Diak a Mera el Belkul?

A King el Salomon a mlo ungil el medengelii a belkul tia el tekoi er a uriul. Ngulemes er a rechad er a taem er ngii el kmal mle meringel el oureor el ousbech a duch me a klemedengei er tir el melalem, omekeroul, meleketek, e dirrek el omekeroul er a rengelekir, el di ua omerelled er chelecha el taem. Me ngdi  mle ngii el oker el kmo, ‘Ngera mo rsel aika el rokui el tekoi?’ Ngmlo melechesuar el kmo a rokui el tekoi el loruul a rechad a “di diak a ultutelel el ua doltoir a eolt.”​—Olisechakl 2:17

Me tia ngbelkul a kmo a King el Salomon a uluumerang el kmo a rokui el tekoi el loruul a rechad a di blechoel el “diak a ultutelel el ua doltoir a eolt”? Ngdiak. Ngbai mle bleketakl a omesodel el kmo ngkirel el mo ua ngerang a blekerdelel a klengar. Me nguaisei, engdi a mlukrael el Tekingel a Dios a sebechel el oterekokl a rengud el kmo a rokui el tekoi a kmal diak lolemolem el di uaisei!

Me kede mekerang e mo ulterekokl a rengud el kirel tia el tekoi? Moutekangel el mo menguiu aike el ongingil el suobel. Aikang a sebechel el ngosukau el mo bleketakl er a rengum er sel uchul e a klengar a ua lak a mera el belkul er chelechang, e mekerang e mo sebechel el mesmechokl tia el tekoi, e dirrek el mekerang e mo er ngii a mera el belkul a klengar er kau er chelecha el taem.