¿Imapaqtaq kawantsik?

ATSKAQ nunakunam imapaq y imanir kawayanqanta tapukuyan. Tukïnöpam imapaq kawayanqanta musyëta munayan, pero respuestanta mana tarirmi llakishqalla kawakuyan. Austria nacionpita Viktor E. Frankl neurólogo doctor ninqannömi, “mana imapaq y mana kaqpaq kawë kanqanta” pensayan.

¿Imanirtaq tsënö pensayan? Këta alli tantearinapaqqa, yarpäshun atska millón nunakuna pasëpa mana allikunallachö kawayanqanta. Manam huk hunaqllapis kushishqaqa kawayantsu waktsa kayanqanrëkur, qeshyapäkuyanqanrëkur y nuna mayinkuna tukï mana allikunata rurayanqanrëkur. Unë witsanchö alli yachaq Job nuna ninqannömi, “imëka nakakïkunawan” utishqana kayan (Job 14:1). Qateqnin hunaq kawëllamannam pensayan.

Y, ¿imanötaq kayan imëkayoq y allinö kawakoq nunakunaqa? Imëkayoqnömi kushishqa kawayänampaqqa kayan. Pero tsënö karpis manam kushishqallaqa kawayantsu. Kutin kutinmi qellëninkuna ushakaptin, o wambrankuna wanuptin “tukï hipakïkunapa” y “mana allikunapa” pasayan, y kë pasakunqankunam pasëpa ushakäratsin munayanqankunata y kushishqa kawakuyänampaq shuyarayanqankunata (Salmo 90:10).

Pero kawëninkuna “mana imapaq y mana kaqpaq” kanqanta pensayanqantaqa masraqmi llakitsin wallka watakunalla kawë kanqan. Atskaq nunakunam alleqllaqa tanteayantsu tukïta rurëta yachëkarnimpis imanir wallka watakunalla nuna kawanqanta. Pero rasumpa kaqchöqa, tukï desgraciakuna mana pasamashqapis wanïqa llapannintsiktam qochiramantsik o qechuramantsik (Eclesiastés 3:19, 20).

¿Imapaq kawanqantsiktapis musyashwantsuraq?

Unë witsan Israelta gobernaq Salomonmi, nuna imanö kawanqanta rikätsikurqan. Pëqa rikarqan nunakuna imëkayoq këta munarnin kanan witsan nunakunanö plantayanqanta, chakrankunachö trabajayanqanta, wayikunata rurayanqanta, familiankunata alli rikäyanqanta... Pero tsëta rurarnimpis, ¿imatataq tariyaq? Salomonqa,  “llapampis mana kaqllapaq y vientota tsarinapaq qatikachaq cuenta” kanqantam nirqan (Eclesiastés 2:17).

¿Imëkata rurëkarnimpis imapaq kawayanqanta mana musyayänampaq kaqtatsuraq Salomonqa nikarqan? Manam tsëtatsu nikarqan. Tsëpa rantinqa rikätsikurqan hutsasapa nunakuna imanö kawayanqantam. Pero Diospa Palabranqa awnimantsik tsënö kawë imëyaqpis mana kanampaqmi.

Qateqnin kaq ishkë yachatsikïchömi Dios tsë awnikunqanman imanir markäkunapaq kaqta rikäshun. Tsëchömi hina rikätsimäshun kawënintsik imarëkur mana kaqpaqnö kanqanta, imë altsakänampaq kaqta y kushishqa kawanapaq imata ruranapaq kaqtapis.