Deˈuwan Tumu Ufayssaa Demmana Danddayettii?

“DEˈUWAN tumu ufayssaa demmana danddayettii?” Zawi baynna daro asay hegaadan oychees. SHin eti deˈuwaa ayba ogiyan xeelliyaaba gidikkokka, Osttriyaa biitta asa gidida, Viktor E. Frankl geetettiya Dottoree giidoogaadan, daro asau “deˈoy ufayssennaagaanne hada” gidiyoogee azzanttiyaaba.

Daro asau hegaadan siyettiyoy aybissee? Hegau issi gaasoy, alame yuushuwan miilooniyan qoodettiya asay keehippe azzanttiya hanotan deˈiyo gishshataassa. Eti ubba wodekka, hiyyeesatettan, harggiyan, makkalaaninne naaquwan qohettiiddi deˈoosona. Beni wode deˈida Iyyoobi asaa naatu waayiyaabaa yootidoogaadan, eta deˈoykka “metuwan kumi uttiis.” (Iyy 14:1) Eta keehi qofissiyaabay galla galla duussaa.

Miilooniyan qoodettiya harati qassi, wogi baynna duretettan deˈoosona. Deˈuwan tumu ufayssaa demmanau koshshiya ubbabay etau deˈiyaaba milatees. SHin daroti bantta deˈuwan ufayttokkona. Aybissi giikko, darotoo ‘metoynne tuggay,’ giishshin ikkonoomiyaara gayttidaagan qoppennan wolqqaama metoy gakkiyo wode woy naˈa hayquwaa mala keehippe azzanttiyaabay merettiyo wode, eti hidootidobay ubbay atti aggees.—Maz. 90:10.

Daro asau deˈoy “ufayssennaagaanne hada” gidanaadan oottiya hara gaasoy deˈees. Hegee aybee? Asaa naati guutta wode xallau deˈidi hayqqiyoogaa. Darobaa oottana danddayiya asaa naati guutta wode xalla deˈiyoogee aybissakko akeekanau daro asay metootees. Hara asaa bolli gakkiya keehi azzanttiya hanotay nu deˈuwan gakkana xayikkokka, sohuwaara gidin takkidi, nuuni hayqqiyoogee attenna. Hegaadan hanidoy aybissakko daroti akeekokkona.—Era. 3:19, 20.

Deˈuwan Awudekka Gidin Ufayttana Danddayettennee?

Beni Israaˈeela Kawuwaa Solomoni asaa naatu hanotaa loytti qonccissiis. I ba wodiyan deˈiya asay, ha wodiyan deˈiya asaagaadan kattaa tokkiyoogan, bulˈˈiyoogan, keettaa keexxiyoogan, qassi ba soo asau koshshiyaabaa kunttiyoogan bau deˈiya abbiyaanne eraa goˈettidi minni oottiyoogaa akeekiis. I, ‘Hegaa ubbaa wurssettay aybee?’ giidi oychiis gaana danddayettees. Asi oottiyo ubbabay “hada; carkkuwaa  oiqqanau yedettiyoogaa mala” gidiyoogaa i yootiis.—Era. 2:17.

SHin Kawuwaa Solomoni, asaa naati oottiyo ubbabay, ubbatoo “hada; carkkuwaa oiqqanau yedettiyoogaa mala” giidi qoppidee? CHii. I asaa deˈuwan gakkiya hanotaa qonccissana koyiis. Gidikkokka, ayyaanaa kaaletuwan xaafettida Xoossaa Qaalay, hanotay ubbatoo hegaa mala gidennaagaa ammanettanaadan oottees!

Neeni hegaa waata ammanettana danddayay? Hayyanaa hagaappe kaalliya naaˈˈu huuphe yohota nabbaba. Ha huuphe yohoti, deˈoy hada milatiyoy aybissakko, he hanotay ayba ogiyan giiganaakko, qassi ha wodiyankka gidin neeni ne deˈuwan tumu ufayssaa waata demmana danddayiyaakko akeekana mala maaddoosona.