May-ada ba Tinuod nga Katuyoan an Kinabuhi?

“MAY-ADA ba katuyoan an kinabuhi?” Diri na maihap an nagpakiana hito. Makasurubo nga ano man an ira panlantaw ha kinabuhi, damu pa gihapon an nakakaeksperyensya han ginsiring han taga-Austria nga neurologo nga hi Viktor E. Frankl nga “pag-abat hin kawaray katuyoan ngan direksyon” ha kinabuhi.

Kay ano nga ito an inaabat han damu? An usa nga hinungdan, minilyon ha bug-os nga kalibotan an may-ada sobra ka miserable ngan makalolooy nga kinabuhi. Ha kada adlaw, napapalibotan hira han kapobrehan, sakit, kamadarahog, ngan panalumpigos. An ira kinabuhi “puno hin kasamokan,” pariho han ginsiring ni Job han kadaan nga panahon mahitungod han pag-antos han tawo. (Job 14:1) An ira la ginhuhunahuna amo an basta na la malamposan an tagsa nga adlaw nga naabot.

Minilyon liwat an hura ha materyal ngan baga hin nagtatag-iya han ngatanan nga ginkikinahanglan basi mabilngan an tinuod nga katagbaw ha kinabuhi. Kondi damu la gihapon an diri tagbaw. Kay ano? Tungod kay naieksperyensyahan la gihap nira an ‘kasamok ngan kagol-anan’—diri ginlalaoman nga pagkuri ha pinansyal o mga trahedya, sugad han pagkamatay hin anak—nga nagbubungkag han ira mga hingyap ngan ambisyon.—Salmo 90:10, Maopay nga Sumat.

May usa pa nga hinungdan nga nagpapahilarom han “pag-abat hin kawaray katuyoan ngan direksyon.” Ano ito? An pagkahalipot han kinabuhi. Diri masabtan han damu kon kay ano nga an tawo, nga damu an nahihimo, halipot la an kinabuhi. Diri nira makarawat an masakit nga kamatuoran nga bisan kon diri kita makaeksperyensya hin trahedya, an ngatanan namamatay.—Eklesiastes 3:19, 20.

Waray Gud ba Katuyoan an Kinabuhi?

Matin-aw nga ginhulagway ni Hadi Salomon han kadaan nga Israel an kahimtang han tawo. Ha iya panahon, nakita niya an pangalimbasog han tawo ha paggamit han iya hinbaroan ngan abilidad ha pagtanom, pagkultibar, pagtukod, ngan pag-ataman hin pamilya, pariho han aton ginbubuhat  yana. Sugad hin hiya nagpapakiana, ‘Ano an mga kapulsanan hini ha tawo?’ Hiya nagsiring nga an ngatanan nga ginbubuhat han tawo ‘waray gud kapulsanan ngan pagdinakop la ha hangin.’—Eklesiastes 2:17, Maopay nga Sumat.

Kondi natoo ba hi Hadi Salomon nga an ngatanan nga ginbubuhat han tawo pirme ‘waray gud kapulsanan ngan pagdinakop la ha hangin’? Diri. Iginpapahayag la niya an reyalistiko nga opinyon kon ano an nahitatabo ha kinabuhi dinhi hinin diri hingpit nga kalibotan. Kondi, ginpapasarig kita han Pulong han Dios nga an kahimtang han tawo diri pirme magigin sugad hini!

Paonan-o ka makakasarig hito? Alayon basaha an masunod nga duha nga artikulo. Makakabulig ito ha imo nga hisabtan kon kay ano nga baga hin waray katuyoan an kinabuhi, kon paonan-o susolusyonan ini nga kahimtang, ngan kon paonan-o magkakaada tinuod nga katuyoan an imo kinabuhi bisan yana.