Bay Fan e Yafas, Fa?

“BAY fan e yafas, fa?” Boor e girdi’ ni ke fith e re deer ney. Ma ba gel e kireban’ riy, ya demtrug rogon e lem rorad, ma dabiyog ni nge dab kur lemnaged e thin rok Viktor E. Frankl ni ir be’ ni ma fil murung’agen e nguchey nge man’ey ko girdi’ u Austria ni yog ni “dariy fan” e yafas rorad u wan’rad.

Mang fan ni boor e girdi’ ni aram rogon e lem rorad? Reb i fan e bochan ni bokum milyon e girdi’ u ga’ngin yang e fayleng nib kireb e par rorad. Yad be par u fithik’ e gafgow, nge m’ar, nge cham ni yibe tay ndariy tapgin, nge gafgow ni yibe tay ngorad. Yafas rorad e “ba sug ko oloboch” ni bod rogon e n’en ni yog Job u nap’an ni yib e gafgow ngak. (Job 14:1, BT) Ere n’en ni yad ma nameg e aram e nge yog ni ngkur abgad ko bin migid e rran.

Bokum milyon e girdi’ e ba fel’ rogon boch e par rorad. Bay gubin ban’en nib t’uf rorad ya nge yog ni fel’ u wan’rad e par rorad. Machane yooren i yad e der fel’ u wan’rad e par rorad. Mang fan? Ni bochan e pi “magafan’ nge gafgow” ni bod rogon e magawon ko salpiy ara ku boch e magawon ni bod rogon reb e bitir ni ke yim’. Pi n’ey e ke muleg e athap rorad.​—Psalm 90:10.

Ku bay reb e ban’en ni ma k’aring e girdi’ ni ngar lemnaged ni “dariy fan” e yafas rorad. Mang e re n’em? Feni ngoch nap’an e yafas. Boor e girdi’ nib mo’maw’ ni ngar nanged ko mang fan ni girdi’ ni boor ban’en nib fel’ nrayog ni ngar rin’ed e rib ngoch nap’an e yafas rorad. Ku darur nanged fan e n’en ni ma buch rodad, ni aram e: Mus ni faanra dabi gafgownagdad e tin th’abi gel e gafgow ni ma yib ko girdi’ u nap’an ni ka yad ba fas, machane ra munmun ma gad ra mada’nag e yam’ ni aram ban’en ndabiyog ni ngan mil riy.​—Eklesiastes 3:19, 20.

Bay i Par e Yafas ni Gowa Dariy Fan, Fa?

Rib fel’ rogon ni weliy Solomon ni Pilung nu Israel murung’agen e re n’ey. I guy feni gel e maruwel ni i tay e girdi’ u nap’an e gagiyeg ni i tay ni yad be fanay e pi n’en ni yad ba salap riy, nge tin rayog rorad ni fan ko woldug, nge  dimow naun, nge ngar ayuweged chon e tabinaw rorad ni bod ni gad ma rin’ e ngiyal’ ney. Aram fan ni fith ni gaar, ‘Mang angin ko tomur?’ I yog ni gubin ban’en ni ma rin’ e girdi’ e ba “m’ay fan” ma bod ni yibe “lol’og e nifeng.”​—Eklesiastes 2:17, BT.

Machane gur, i lemnag Solomon ni Pilung ni gubin ban’en nra i rin’ e girdi’ e ra yan i aw nib “m’ay fan” ma bod ni yibe “lol’og e nifeng”? Danga’, ya kemus ni be weliy rogon e par rodad ko re fayleng ney ni ke sug ko kireb. Machane, Thin rok Got ni kan thagthagnag e rayog ni nge ayuwegem nge pagan’um ni bayi thil gubin ban’en!

Uw rogon ni nge yog e re pagan’ ney ngom? Wenig ngom mu beeg e gal ni migid e article, ya ra ayuwegem ni ngam nang fan ni ma lemnag boch e girdi’ ndariy fan e yafas rodad, nge rogon ni yira pithig e re magawon ney, nge rogon ni nge yib fan e yafas rom e chiney.