Taano ta Garo Baga Mayo nin Kahulogan an Buhay?

TAANO ta maninigo kang maniwala na an buhay bako sanang ‘halipot saka mayo nin halaga,’ na minaagi na “siring sa sarong anino” arog kan pagkasabi ni Hadeng Salomon? (Parahulit 6:12, BPV *) An ipinasabong na Tataramon nin Dios, an Biblia—sarong masasarigan na gikanan nin impormasyon—nanunuga na an buhay sa maabot na panahon magigin makahulogan nanggad.—2 Timoteo 3:16, 17.

Sinasabi sa sato kan Biblia kun ano an orihinal na katuyohan nin Dios para sa daga. Ipinapaliwanag man kaiyan kun taano ta pano nin inhustisya, pang-aapi, asin pagsakit an kinaban. Taano ta mahalagang masabotan niato an mga ini? Huling an pangenot na dahelan kun taano ta iniisip nin mga tawo na an buhay talagang mayo nin kahulogan iyo na dai ninda aram, o tuyo nindang binabaliwala, an katuyohan nin Dios para sa daga asin sa katawohan dian.

Ano an Katuyohan nin Dios Para sa Daga?

An daga ginibo ni Jehova Dios * na perpektong erokan na paraiso para sa katawohan—sarong lugar kun saen an mga  tawo magkakaigwa nin lubos asin nakakakontentong buhay na perpekto sagkod lamang. An pundamental na katotoohan na ini kontra sa pinaniniwalaan nin dakol alagad bakong sono sa Kasuratan na ideya na ginibo nin Dios an daga tanganing baloon an mga tawo, asin aramon kun baga maninigo sindang magkaigwa nin mas makahulogan na buhay sa kinaban nin mga espiritu.—Helingon sa pahina 6 an kahon na  “Dapat daw Kitang Maghale sa Daga Tanganing Magkaigwa nin Makahulogan na Buhay?”

Linalang nin Dios an lalaki asin babae oyon sa Saiyang ladawan, na tinawan sinda nin kakayahan na ipabanaag an Saiyang marahayon na mga kualidad. (Genesis 1:26, 27) Sinda linalang Niang perpekto. Yaon na sa sainda an gabos na kaipuhan ninda tanganing magkaigwa nin kapakipakinabang asin makahulogan na buhay sagkod lamang. Kaiba dian an pagpano asin pagsakop sa daga, na ginigibong paraiso an bilog na daga arog kan hardin nin Eden.—Genesis 1:28-31; 2:8, 9.

Ano an Nagin Problema?

Malinaw na nagkaigwa nanggad nin problema. Dai ikinapabanaag nin katawohan sa pangkagabsan an mga kualidad nin Dios. An daga bako nanggad paraiso. Ano an nangyari? Inabuso kan satong enot na mga magurang an katalingkasan nindang magdesisyon. Gusto nindang magin ‘garo Dios,’ na nakakapagdesisyon para sa saindang sadiri kun ano an ‘marahay asin maraot.’ Sa paggibo kaiyan, sinundan ninda an rebelyosong dalan ni Satanas.—Genesis 3:1-6.

Kun siring, an karatan bakong kabtang nin saro daang misteryosong plano nin Dios na dineterminaran na antes pa. Nagkaigwa kaiyan kan si Satanas—asin kan huri, si Adan asin Eva—magrebelde tumang sa pamamahala nin Dios. Bilang resulta kan saindang pagrebelde, nawara kan enot niatong mga magurang an Paraiso asin an pagkaperpekto, na nagresulta sa kasalan asin kagadanan bako sana sa sainda kundi patin sa mga naggikan sa sainda—an bilog na pamilya nin tawo. (Genesis 3:17-19; Roma 5:12) Ini an dahelan kan mga kamugtakan na nagpapagin garo baga mayo nanggad nin kahulogan an buhay.

Taano ta Dai Tolos Hinale an Karatan?

An nagkapira nag-iisip, ‘Taano ta dai tolos hinale nin Dios an karatan paagi sa paglaglag na sana kutana ki Satanas asin sa ibang mga rebelde, dangan magpoon na sana giraray?’ Iyan daw talaga an madonong kutanang ginibo? Ano an magigin reaksion mo kun may mabaretaan kang makapangyarihan na gobyerno na ipinapagadan tolos an siisay man na minakontra sa autoridad kaiyan? Bako daw na dai dian maoyon an makatanosan na mga tawo, asin magluluya na an saindang tiwala sa gobyernong iyan?

Nagdesisyon an Dios na dai tolos maghiro tumang sa mga rebelde. May kadonongan na tinogotan niang umagi an panahon tanganing lubos na maresolberan an mga isyung pinalataw sa Eden dapit sa saiyang paagi nin pamamahala.

Paghale kan Gabos na Karatan

An enot na dapat girumdomon iyo ini: Tinotogotan nin Dios an karatan sa limitado sanang panahon. Ginigibo nia iyan huling aram nia na kaya niang lubos na haleon an makamomondong mga epekto kaiyan, kun maresolberan na an mahahalagang isyu na naglataw huli sa pagrebelde sa saiyang pamamahala.

Dai linilingawan nin Dios an saiyang katuyohan para sa daga asin sa katawohan. Paagi ki propeta Isaias, inaasegurar kita ni Jehova na Sia an Kaggibo kan daga, an saro na ‘dai naglalang kaiyan nin daing kapakanan, na linalang iyan tanganing pag-ontokan.’ (Isaias 45:18) Dai na nanggad mahahaloy, poponan niang ibalik sa perpektong  kamugtakan an daga, oyon sa saiyang orihinal na katuyohan. Kun mapatunayan na nanggad na an saiyang paagi nin pamamahala iyo an tama, magigin makatanosan an paggamit nia kan saiyang dai malalabanan na kapangyarihan tanganing ipaotob an kabotan nia asin biyong haleon an gabos na karatan. (Isaias 55:10, 11) Iiniba ni Jesu-Cristo sa modelong pamibi an pakiolay sa Dios na gibohon iyan. Tinokdoan kita ni Jesus na mamibi: “Guibohon an boot mo, digdi sa daga nin siring sa lagñit.” (Mateo 6:9, 10) Ano an kalabot dian?

An Kabotan nin Dios Para sa Daga

Kabotan nin Dios na ‘an mga mapakumbaba magmana kan daga.’ (Salmo 37:9-11, 29, An Banal na Biblia; Talinhaga 2:21, 22) ‘Ililigtas ni Jesu-Cristo an dukha na nag-aagrangay sa saiya, siring man an nangangaipo.’ Ililigtas nia sinda “sa kaapihan asin sa kadahasan.” (Salmo 72:12-14, BPV) Dai na magkakaigwa nin giera; ni kagadanan, pagluha, kolog, o pagsakit man. (Salmo 46:9; Kapahayagan 21:1-4) An kadakoldakol na tawong nagadan durante kan pagtogot nin Dios sa karatan bubuhayon liwat digdi sa daga, asin tatawan  sinda nin oportunidad na makinabang sa mga ini asin sa iba pang mga bendisyon.—Juan 5:28, 29.

Sa katunayan, hahaleon ni Jehova an maraot na epekto kan pagrebelde ni Satanas. Lubos nia ining reremedyohan kaya “an magña enot na kahorasaan [an gabos na dahelan nin kamondoan asin kakologan ngonyan] magkakariligñauan.” (Isaias 65:16-19) Sierto nanggad na mangyayari iyan. An Dios dai nagpuputik. Naootob an gabos niang panuga. An buhay dai na magigin ‘mayo nin halaga, na garo sana paglamag sa doros.’ (Parahulit 2:17, BPV) Imbes, an buhay magigin makahulogan nanggad.

Alagad kumusta ngonyan? An pakaaram daw kan itinotokdo kan Biblia asin pakasabot kan katuyohan nin Dios para sa daga makakadagdag sa kahulogan kan saimong buhay ngonyan? An hapot na ini totokaron kan huring artikulo sa seryeng ini.

[Mga nota sa ibaba]

 [Kahon sa pahina 6]

Dapat daw Kitang Maghale sa Daga Tanganing Magkaigwa nin Makahulogan na Buhay?

Sa laog nin mga siglo, an mga tawong mayo nin kaaraman sa katuyohan nin Dios para sa daga nagtotokdo na dapat kitang maghale sa daga tanganing magkaigwa nin tunay na makahulogan na buhay.

May mga nagsabi na an mga kalag “igwa nin mas halangkaw na klase nin buhay bago sinda maglaog sa hawak nin tawo.” (New Dictionary of Theology) An iba man nagsabi na an kalag “nalalaom sa hawak bilang padusa sa mga nagin kasalan kaiyan kan nasa langit pa iyan.”—Cyclopedia of Biblical, Theological, and Ecclesiastical Literature.

Itinokdo kan Griegong mga pilosopo arog ni Socrates asin Plato an ideyang ini: Kun an kalag bako nang sakop kan mga limitasyon nin pisikal na hawak nin tawo, saka sana iyan “makakatalingkas sa mga paglagawlagaw asin kalolongan asin kinakatakotan kaiyan, sa daing kontrol na mga kamawotan kaiyan saka sa gabos na iba pang problema nin katawohan” patin makakaistar “kaiba kan mga dios sagkod lamang.”—Plato’s Phaedo, 81, A.

Paghaloyhaloy, iiniba nin mga lider na naghihingakong Kristiano sa saindang mga katokdoan an “mga paniniwala [kan Griegong mga pilosopo] manongod sa imortalidad kan kalag.”—Christianity—A Global History.

Ikomparar an kalaenan kan mga ideyang iyan sa tolong pundamental na katotoohan na makukua sa Biblia:

1. An katuyohan nin Dios para sa daga iyo na iyan magin permanenteng istaran nin katawohan, bakong temporaryong lugar kun saen binabalo an mga tawo tanganing aramon kun sairisay an maninigong mabuhay kaiba nia sa langit. Kun kinuyog ni Adan asin Eva an mga ley nin Dios, buhay pa kutana sinda sagkod ngonyan sa paraisong daga.—Genesis 1:27, 28; Salmo 115:16.

2. Mantang itinotokdo kan kadaklan na relihion na an tawo igwa nin kalag—sarong dai naheheling na kabtang na yaon sa laog nin tawo—mas simple an itinotokdo kan Biblia. An tawo “buhay na kalag” na pinorma hale sa “kabo-kabo nin daga.” (Genesis 2:7) Nungkang ilinaladawan kan Biblia na an kalag na ini imortal. Sinasabi kaiyan na an kalag nagagadan o puedeng laglagon, na talagang dai na maeksister. (Salmo 146:4; Parahulit 9:5, 10; Ezequiel 18:4, 20) An enot na kalag, si Adan, seguradong nagadan asin nagbalik sa kabokabo na hale dian sia linalang. Sia nagbalik sa dai pag-eksister.—Genesis 2:17; 3:19.

3. An oportunidad nin tawo na mabuhay sa maabot na panahon nakadepende bako sa pagkaigwa nin imortal na kalag na minapasiring sa lugar nin mga espiritu, kundi sa panuga nin Dios na pagkabuhay liwat sa paraisong daga.—Daniel 12:13, BPV; Juan 11:24-26; Guibo 24:15.