?From Wanem Plante Man Oli Ting Se Laef i Blong Nating Nomo?

KING SOLOMON i talem se long tingting blong plante man, “laef blong yumi long wol ya i sotfala tumas, mo i blong nating nomo.” (Prija 6:12) ?Olsem wanem long yu? ?Yu ting se yumi save gat wan laef we yumi glad long hem mo we i no blong nating? Tok blong God, Baebol, i givim ol save we yumi save trastem oltaem. Ale Baebol i mekem promes se, i gat taem i stap kam we bambae ol man oli save gat wan gudfala laef we i no blong nating.—2 Timoti 3:16, 17.

Baebol i tokbaot stamba tingting blong God long saed blong wol ya. Mo tu, i eksplenem from wanem ol man oli stap mekem i nogud long narafala man, from wanem ol lida oli stap mekem i strong long olgeta we oli stap aninit long olgeta, mo from wanem ol man oli kasem trabol. Yumi mas kasem save long ol samting ya. ?From wanem? From we plante man tede oli no save, no maet oli no wantem save long stamba tingting we God i gat long saed blong wol ya mo ol man. Ale oli ting se laef i blong nating nomo.

?God i Mekem Wol Ya Blong Wanem?

Jehova God * i mekem wol ya se i hom blong ol man. Hem i wantem se wol ya i wan paradaes we stret fasin nomo i stap long hem. Long paradaes ya, ol man mo ol woman oli no gat sin. Oli save mekem plante samting we oli glad long hem mo oli save harem gud gogo i no save finis. Hemia wan stamba trutok we i stap  long Baebol. Be plante man tede oli ting se God i mekem wol ya olsem wan ples blong traem man nomo. Oli ting se God i stap traem man long wol ya blong luk sipos oli naf blong kasem gudfala laef long heven. Be tingting ya i no kamaot long Baebol.—Yu save ridim ol toktok we oli stap long bokis ya  “?Yu Mas Go Long Heven Blong Gat Wan Gudfala Laef?” long pej 6.

God i mekem we man mo woman, tufala i save gat ol gudfala fasin olsem Hem. (Jenesis 1:26, 27) God i mekem we man mo woman, tufala i stret gud olgeta, tufala i no gat sin. Tufala i gat evri samting we tufala i nidim. Tufala i save wok mo mekem ol samting we tufala i save harem gud long hem blong olwe. Wan long ol wok ya we tufala i mas mekem, hemia se tufala i mas gat plante pikinini, mo fulumap wol. Evri samting long wol ya i mas stap aninit long han blong tufala. Tufala i mas mekem olgeta ples long wol i kam wan naesfala ples olsem paradaes ya Iden.—Jenesis 1:28-31; 2:8, 9.

?From Wanem Tingting Ya Blong God i No Kamtru?

Bighaf blong ol man oli no gat ol gudfala fasin blong God. Wol ya i no wan naesfala paradaes. I klia se wan samting i gorong. ?Wanem i hapen? God i givim raet long Adam mo Iv, blong tufala i save jus. Ale tufala i jusum rod we i no stret. Tufala i wantem “kam olsem God.” Tufala i wantem we tufala nomo i jusum wanem ‘fasin we i nogud mo wanem fasin we i gud.’ Tufala i no wantem we God i putum loa long tufala. Ale tufala i folem fasin blong Setan, tufala i agensem God.—Jenesis 3:1-6.

God i no mekem plan se bambae i gat rabis fasin. Rabis fasin i kamaot taem Setan, wetem Adam mo Iv, oli agensem God, oli no wantem we hem i rulum olgeta. From we Adam mo Iv tufala i sakemaot God, tufala i lusum Paradaes mo tufala i no moa stret gud olgeta. Tufala i gat sin mo tufala i ded. Be frut blong samting ya se ol pikinini blong tufala, hemia yumi, yumi evriwan yumi gat sin mo yumi ded. (Jenesis 3:17-19; Rom 5:12) From samting ya nao, laef long wol ya i kam nogud, ale ol man oli ting se laef i blong nating nomo.

?From Wanem God i No Blokem Rabis Fasin Taem i Jes Stat?

Sam man maet oli gat tingting se, ‘?From wanem God i no kilim i ded Setan wetem Adam mo Iv, ale i mekem wan narafala man mo woman?’ ?Wanem tingting blong yu? ?Yu ting se i waes blong mekem olsem? Traem tingbaot sipos yu stap long wan kantri we gavman blong hem i gat bigfala paoa. Nao yu harem nius se taem ol man blong kantri ya oli stap tok agensem sam samting we gavman i mekem, wantaem nomo gavman i stap kilim ol man ya oli ded. ?Wanem tingting blong yu long gavman olsem? Maet bambae yu fraet blong stap aninit long wan gavman olsem. Mo maet bambae yu ting se fasin we gavman ya i mekem i no wan gudfala eksampol.

God i no mekem fasin olsem gavman ya we i gat bigfala paoa. Hem i no hareap blong kilim i ded Setan wetem Adam mo Iv. God i gat waes. Hem i save se Setan i tok agensem fasin blong Hem blong rulum ol man. Hem i wantem we ol man oli mas luksave se Setan i giaman. Taswe hem i letem taem i pas blong Setan i pruvum toktok blong hem. Ale bambae hem i stretem bisnes ya fulwan mo rabis fasin bambae i lus blong olwe.

Bambae God i Finisim Ol Rabis Fasin

Bigfala samting we yumi no mas fogetem se: God bambae i no save letem ol rabis fasin oli stap blong olwe. Hem i letem ol rabis fasin oli stap, go kasem taem we i klia se tok blong Setan i giaman nomo. God i save se ol rabis fasin we hem i letem oli stap, oli mekem trabol long man, be hem i save tu se hem i gat paoa blong stretem olgeta trabol ya.

God i no jenisim stamba tingting we hem i gat long saed blong wol ya mo ol man. Jehova i yusum profet Aesea blong raetem ol tok we oli givim gudfala tingting long yumi long saed blong fiuja. Jehova i talem se hem i mekem wol ya, mo “hem i no mekem blong i ples nating nomo, hem i mekem blong man i save stap long hem.” (Aesea 45:18) I no longtaem nao, bambae God i mekem we wol ya i kam wan gudfala ples bakegen, olsem we hem i bin mekem fastaem.  Afta we God i soemaot klia se fasin blong hem blong rulum man i gud moa, bambae hem i yusum bigfala paoa blong hem blong mekem ol samting olsem we hem i wantem, mo bambae hem i finisim ol rabis fasin. (Aesea 55:10, 11) Taem Jisas i tijim ol man blong hem long Lodsprea, hem i talem se oli mas askem long God blong i tekem aksen blong finisim ol rabis fasin. Jisas i talem se ol man oli mas prea olsem: “Yu letem ol samting we yu yu wantem oli kamtru long wol ya olsem we oli kamtru long heven.” (Matiu 6:9, 10, King James Version) ?Ale, wanem ol samting ya we God i wantem?

?Wanem Tingting Blong God Long Saed Blong Wol Ya?

God i wantem se “ol man we tingting blong olgeta i stap daon, bambae oli tekem graon ya i blong olgeta.” (Ol Sam 37:9-11, 29; Ol Proveb 2:21, 22) Jisas Kraes bambae i “sevem ol puaman we oli stap singaot i go long hem, mo bambae i stap givhan long olgeta we oli sot long ol samting.” Mo bambae hem i sevem ‘olgeta we oli stap harem nogud aninit long han blong narafala man.” (Ol Sam 72:12-14) Bambae i no moa gat faet. Bambae i no moa gat man i ded, i no moa gat man i krae, i no moa gat man i harem nogud long  bodi blong hem. (Ol Sam 46:9; Revelesen 21:1-4) Long taem ya we God i letem rabis fasin i stap long wol, plante plante man oli ded. Be olgeta man ya bambae oli laef bakegen long wol ya blong harem gud long ol gudfala samting ya we yumi jes tokbaot, mo bambae oli harem gud long plante narafala gudfala samting tu.—Jon 5:28, 29.

Jehova bambae i karemaot evri nogud samting we man i bin kasem taem we Setan i rulum wol. Bambae hem i mekem we ol man oli kam gud gogo ‘ol trabol ya we oli kasem bifo, bambae oli finis olgeta, oli no moa save tingbaot olgeta bakegen.’ (Aesea 65:16-19) Yumi save bilif strong se samting ya bambae i kamtru. God i no save giaman. Olgeta samting we hem i promes blong mekem, bambae hem i mas mekem. Ol man bambae oli no moa harem se ‘laef i blong nating nomo’ mo bambae oli no moa harem ‘olsem we oli stap resis olbaot nomo.’ (Prija 12:17) Bambae ol man oli glad blong laef.

?Be olsem wanem long laef naoia? Taem yu save samting we Baebol i tijim mo yu kasem save wanem we God i wantem mekem long wol ya, ?yu ting se samting ya i save mekem yu yu harem gud naoia? Nekis haf bambae i tokbaot kwestin ya.

[Futnot]

[Bokis blong pija long pej 6]

 ?Yu Mas Go Long Heven Blong Gat Wan Gudfala Laef?

Ol man we oli no save tingting blong God long saed blong wol ya, oli talem se sipos yumi wantem gat wan gudfala laef, yumi mas go long heven. Oli tijim samting ya longtaem finis.

Sam man oli talem se yumi ol man, yumi gat wan spirit insaed long yumi. Oli talem se spirit ya “i stap long wan gudfala laef bifo we hem i kam insaed long bodi blong man.” (New Dictionary of Theology) Sam narafala man oli talem se spirit “i kalabus insaed long bodi blong man. Hemia wan panis we God i givim long hem from sin we hem i mekem long heven.”—Cyclopedia of Biblical, Theological, and Ecclesiastical Literature.

Longtaem bifo, i gat tufala man Gris we nem blong tufala Socrates mo Plato. Tufala ya i tijim se spirit i kalabus long bodi blong man, ale taem man i ded, spirit ya i gofri. Taem spirit i fri, ale “hem i no moa stap wokbaot krangke, i no moa stap mekem fasin nogud, i no moa save fraet tu, mo hem i no moa wantem ol rabis samting ya we ol man oli stap wantem tumas.” Ale Socrates mo Plato oli talem se spirit ya i “go stap wetem ol god, gogo i no save finis.”—Plato’s Phaedo, 81, A.

Taswe tijing ya se ‘taem man i ded, hem i gat wan spirit we i gohed blong laef samples,’ hem i wan tijing we i kamaot long ol man Gris. Ale ol lida we oli talem se oli Kristin, oli tekem tijing ya blong ol man Gris i kam long tijing blong jos blong olgeta.—Christianity—A Global History.

Yu traem skelem ol tingting ya we yumi ridim antap, wetem tri stamba trutok we oli stap long Baebol.

1. God i mekem wol ya se hem i hom blong ol man, mo hem i wantem we oli stap long hem blong olwe. Wol ya i no wan ples blong traem man blong luk hu i save go stap long heven wetem God. Nogat. Sipos Adam mo Iv, tufala i bin obei long loa blong God, bambae tufala i laef yet tede mo wol ya bambae i wan paradaes.—Jenesis 1:27, 28; Ol Sam 115:16.

2. Plante skul oli tijim se man i gat wan spirit insaed long hem. Be tijing blong Baebol i defren long tijing ya blong plante skul. Baebol i no talem se man i gat wan samting insaed long hem we i laef yet afta we bodi i ded. Baebol i talem klia nomo se taem man i ded, hem i no moa stap samples, hem i lus. (Ol Sam 146:4; Prija 9:5, 10) Adam hem i fas man we God i mekem. Taem Adam i ded, hem i gobak long graon ya we God i wokem hem long hem fastaem. Taem God i no wokem Adam yet, Adam i no stap samples. Ale taem Adam i ded be hem i no go samples. Hem i lus nomo.—Jenesis 2:17; 3:19.

3. Man we i wantem gat wan gudfala laef long fiuja, hem i no mas ting se bambae hem i save kasem gudfala laef ya taem hem i ded, nao spirit blong hem i go stap long heven no long sam gudfala ples olsem. Nogat. Man we i ded i save kasem wan gudfala laef long fiuja, from we God i mekem promes se ol man we oli ded bambae oli laef bakegen long wol ya nomo, we bambae i kam wan paradaes.—Daniel 12:13; Jon 11:24-26; Ol Wok 24:15.