Bõe yĩng tɩ wõnd vɩɩmã pa tar võore?

BÕE yĩng tɩ y segd n tẽ tɩ vɩɩmã pa na n kell n yɩ woto, n yaa “zaalem n loogd wa sulunsuk” wa rĩm a Salomo sẽn da yeelã? (Koɛɛg Soaba 6:12) D tõe n kɩsa sɩd ne goam nins sẽn be Biiblã pʋgẽ wã fãa. Biiblã sẽn yaa Wẽnnaam n vẽneg tɩ b gʋlsã pʋgẽ, b wilgame tɩ beoog-daare, ninsaalbã vɩɩm na n sɩd talla võore.—2 Tɩmote 3:16, 17.

Biiblã wilgda tõnd Wẽnnaam sẽn sɩng n dat bũmb ning ne tẽngã. A wilgda bũmb ning sẽn kɩt tɩ dũniyã pid ne wẽgbo, weoog-taab la namsg buud toor-toorã me. Bõe yĩng tɩ d segd n bao n wʋm yel-kãensã võore? Yaa tɩ bʋʋm-kãseng ning sẽn kɩt tɩ nebã tagsdẽ tɩ vɩɩmã pʋd n pa tar võorã yaa b sẽn pa mi raab ning Wẽnnaam sẽn tar ne tẽngã la ne ninsaalbã, wall b sẽn pa rat n sak n deeg rẽ wã.

Wẽnnaam daabã ne tẽngã yaa bõe?

Wẽnnaam a Zeova * naana tẽngã n tʋlg t’a yɩ arzãn tɩ rap la pagb sẽn zems zãng tõog n vɩɩmd a zug ne sũ-noog wakat sẽn kõn sa yĩnga. Gom-kãngã sẽn yaa  sɩdã yaa toor ne bũmb neb wʋsg sẽn tẽed tɩ yaool n pa yit Biiblã pʋgẽ ye. Wʋsg tẽedame tɩ Wẽnnaam naana tẽngã n dat tɩ ninsaal deng n zĩnd be t’a mak-a n ges a sã n zemsa ne a wa paam n kẽng saasẽ n tɩ vɩɩmd vɩɩm sẽn tar barka.—Ges-y zĩ-gũbr ning gom-zug sẽn yaa:  “D segd n kẽnga saasẽ n yaool n paam vɩɩm sẽn tar võor bɩ?” wã sẽn be sebrã neng a 6.

Wẽnnaam naana a Ãdem ne a Hawa a meng wẽnego, tɩ kɩt tɩ b ra tõe n dɩk a togs-n-taare. (Sɩngre 1:26, 27) A naan-b lame tɩ b ra zems zãnga. B ra tara bũmb nins fãa sẽn da yaa tɩlae ne-ba, sẽn na yɩl tɩ b vɩɩmã tall bark la võor wakat fãa yĩnga. B ra na n tõog n doga kamb n pids tẽngã, n soog-a la b kɩt tɩ tẽngã fãa lebg arzãn wa Edɛn zĩigã sẽn da yaa to-to wã.—Sɩngre 1:28-31; 2:8, 9.

La bõe n kɩt tɩ vɩɩmã wa lebg woto?

Yaa vẽeneg tɩ bũmb n wa n kɩt tɩ yɛlã toeem fasɩ. Bala rũndã-rũndã, ãdem-biisã pa rɩkd Wẽnnaam togs-n-taar wa a sẽn da ratã ye. Tẽngã me pa arzãn ye. Bõe n maane? D yaab a Ãdem ne a Hawa wa n yãka yam n maan sẽn pa segde. B tʋlgame n na n “lebg wa Wẽnnaam,” sẽn na yɩl n bãngd “sõma ne wẽngã” n bakd b toore. B sẽn maan woto wã, b rɩka a Sʋɩtãan naoore, n lebg kɩɩsdb wa yẽ.—Sɩngre 3:1-6.

Dẽnd pa Wẽnnaam n tʋlg hal sɩngrẽ wã tɩ wẽnemã zĩnd ye. Yaa a Sʋɩtãan sẽn kɩɩs Wẽnnaam naamã t’a Ãdem ne a Hawa me rɩk a naoorã n wa ne wẽnemã. A Ãdem ne a Hawa sẽn kɩɩs Wẽnnaamã yĩng kɩtame tɩ b bõn arzãnã la b lebg yel-wẽn-maandba, tɩ kɩt tɩ b kambã la b yagensã fãa lebg yel-wẽn-maandb la kiidb wa bãmba. (Sɩngre 3:17-19; Rom dãmba 5:12) Yaa rẽ n yɩ sabab tɩ ãdem-biisã fãa yɛl yaa woto rũndã-rũndã tɩ kɩt tɩ wõnd vɩɩmã pa tol n tar võorã.

Bõe yĩng tɩ Wẽnnaam pa menes wẽnemã zĩig pʋgẽ?

Neb kẽer pa wʋmd Wẽnnaam sẽn pa sãam a Sʋɩtãan ne a Ãdem la a Hawa n menes wẽnemã zĩig pʋgẽ, la a lebg n naan neb a taabã võor ye. La rẽ yĩnga ra yaa a sẽn da na n maan woto n são bɩ? D rɩk makre. Yãmb sã n wʋm tɩ naab n be n kʋʋd a tẽngã ned ning fãa sẽn pa rat n sak a naamã, y tagsg na n yɩɩ wãna? Woto kõn kɩt tɩ neb wʋsg wa pa nong naabã n tagsdẽ t’a pa na-sõng sɩda?

Wẽnnaam yãka yam n pa sãam kɩɩsdbã zĩig pʋgẽ ye. A sẽn yaa yam soabã yĩnga, b sẽn kɩɩs a naamã Edɛnnã poore, a basa weer sẽn na yɩl n paam n welg no-koeemdã vugr wakat fãa yĩnga.

B na n menesa wẽngã fasɩ

Bũmb d sẽn pa segd n yĩmi, yaa tɩ Wẽnnaam pa na n bas tɩ wẽngã zĩnd wakat fãa yĩng ye. A sɩng n miime t’a sã n wa welg a naamã poorẽ no-koeemdã n sa, a tõe n lebs n manega wẽngã sẽn wa ne sãoong ninsã fãa.

Wẽnnaam a Zeova pa toeem bũmb ning a sẽn sɩng n dat ne tẽngã la ne ãdem-biisã ye. A ra kɩtame tɩ no-rɛɛs a Ezai wilg tɩ yaa yẽ n naan tẽngã, la t’a “ka naan-a t’a lebg zaalem ye. [A] naan-a lame tɩ neb zĩnd a zugu.” (Ezai 45:18) Ka la bilfu, Wẽnnaam na n sɩnga tẽngã manegre, hal t’a wa lebg sõma zãng fasɩ wa a sẽn da rat t’a yɩ to-to sɩngrẽ wã. Sã n  wa lebg vẽeneg tɩ yẽ a ye naamã bal n yaa sõma, a na n tõog n tʋma ne a pãn-kãsengã n kɩt t’a raabã maane, la a menes wẽng buudã fãa zãnga, tɩ ned wall malɛk pa tõog ning-a taal ye. (Ezai 55:10, 11) Pʋʋsg ning a Zezi Kirist sẽn wilg a karen-biisã pʋgẽ, a yeelame tɩ d kos Wẽnnaam t’a maan woto. A yeelame tɩ d kot woto: ‘Bɩ yãmb daab maan dũniyã zug wa sẽn maand saasẽ.’ (Matɩe 6:9, 10) Raab-kãng la bʋgo?

Wẽnnaam daabã sẽn yaa soaba

Wẽnnaam datame tɩ ‘sũ-maasem dãmbã soog dũniyã.’ (Yɩɩl Sõamyã 37:9-11, 29; Yelbũna 2:21, 22) A Zezi Kirist na n “fãaga naong soab sẽn kos a sõngre, la nin-koam sẽn ka tar tɛɛgda.” A “na fãag-b sũ-to-rãmbã la nin-toos nusẽ.” (Yɩɩl Sõamyã 72:12-14, Sebr Sõngo) Zabr pa na n le zĩndi, kũum, yãbr wall toog pa na n le zĩnd yɛs ye. (Yɩɩl Sõamyã 46:10; Wilgri 21:1-4) Wẽnnaam sẽn nan bas  tɩ wẽnemã beẽ wã, kɩtame tɩ nebã kiidẽ. La wakat kãnga, neb wʋsg na n vʋʋgame n lebs n vɩɩmd tẽngã zugu, n tõog n bao n dɩ bark kãensã fãa nafa.—Zã 5:28, 29.

Sɩd-sɩda, a Zeova na n manega a Sʋɩtãan kɩɩsgã sẽn wa ne sãoong ningã fãa. A na n manega bũmbã fãa sõma hal tɩ kɩt tɩ d “yĩm tood nins sẽn da be pĩndã, [rat n yeel tɩ bũmb nins sẽn wat ne toog la sũ-sãams rũndã-rũndã wã] yelle.” (Ezai 65:16-19) Y tõe n kɩsa sɩd tɩ na n yɩɩ woto. Bala, Wẽnnaam pa yagd ziri ye. A pidsda a pʋleng fãa. Wakat kãnga, vɩɩmã pa na n le wõnd “zaalem,” la “wa ned sẽn digd sobg” ye. (Koɛɛg Soaba 2:17) A na n talla barka.

La rũndã-rũndã yẽ? Rẽ yĩnga y sã n bãng Biiblã sẽn yet bũmb ningã la y bãng raab ning Wẽnnaam sẽn tar ne tẽngã la ne ninsaalbã, tõe n kɩtame tɩ y vɩɩmã tall võor bɩ? Sõsg ning sẽn pʋgdã leokda sok-kãngã.

[Tẽngr note]

[Zĩ-gũbri, seb-​neng a 6]

 D segd n kẽnga saasẽ n yaool n paam vɩɩm sẽn tar võor bɩ?

Hal pĩnd n tãag rũndã, neb sẽn pa mi raab ning Wẽnnaam sẽn tar ne tẽngã zãmsda nebã n yetẽ tɩ d pa tõe n vɩɩmd vɩɩm sẽn tar bark tẽngã zug ye.

Kẽer tagsda wa b sẽn yeel bũmb ning sebr a yembr (New Dictionary of Theology) pʋgẽ wã. Be, b yeelame tɩ ninsaal tara sɩɩga, la tɩ “nand tɩ sɩɩgã kẽ yĩngã pʋgẽ, a ra vɩɩ vɩɩm sõmblem sẽn ka to.” Kẽer yeelame tɩ b ninga sɩɩgã “yĩngã pʋgẽ sẽn na yɩl n sɩbg-a, yel-wẽn a sẽn maan a sẽn da wa n nan ket saasẽ wã yĩnga.”—Cyclopedia of Biblical, Theological, and Ecclesiastical Literature.

Gɛrɛs filozof rãmb kẽer wala a Sokrat la a Platõ ra yeta nebã tɩ yaa sɩɩgã sã n wa paam n yi yĩngã pʋgẽ la a “paamd a meng zãng-zãng ne yeebgo, rabeem, tudgr la yalemd buud fãa sẽn namsd ninsaalbã,” la tɩ rẽ poore, “a babsda wẽnnaam dãmbã, n tɩ vɩ ne-b wakat fãa.”—Phédon, 81, a.

Kaoosg zugẽ, kiris-neb ne yʋʋrã taoor dãmb saka Gɛrɛs filozof rãmbã sẽn yet tɩ “ninsaal tara sɩɩg sẽn pa tõe n ki” wã, n zãmsd b nin-buiidã rẽ.—Histoire universelle du christianisme (ãngil.).

Mak-y rẽ ne yɛl a tãab Biiblã sẽn yet tɩ sɩd yaa sɩda.

1. Wẽnnaam da sɩng n datame tɩ tẽngã yɩ zĩig ninsaalbã sẽn na n vɩɩmd wakat fãa, pa zĩig b sẽn segd n deng n zĩnd t’a mak-b n ges b sã n zemsa ne saasẽ vɩɩmdg ye. A Ãdem ne a Hawa sã n da pa kɩɩs Wẽnnaam, tẽngã ra na n yaa arzãn rũndã-rũndã, tɩ b vɩ a zugu.—Sɩngre 1:27, 28; Yɩɩl Sõamyã 115:16.

2. Baa tũudum wʋsg neb sẽn yet tɩ ninsaal tara sɩɩg sẽn pa kiidã, Biiblã pa yet woto ye. Biiblã zɩ n yeel tɩ ninsaal pa kiid ye. (Yɩɩl Sõamyã 146:4; Koɛɛg Soaba 9:5, 10) D yaab a Ãdem wa n kiime, n lebg tẽng tom wa a sẽn da yaa to-to b sẽn da wa n nan pa naan-a wã. Rẽnd a pa le be ye.—Sɩngre 2:17; 3:19.

3. Ninsaal na paam n vɩɩmd beoog daarã pa be ne a sẽn na n tar sɩɩg sẽn pa kiidi, sẽn tõe n tɩ vɩɩmd saasẽ a kũum poor ye. Bee ne Wẽnnaam sẽn pʋlem t’a na n vʋʋga sẽn ki-bã tɩ b tõog n vɩɩmd tẽng sẽn na n lebg arzãnã zugã.—Daniɛll 12:13; Zã 11:24-26; Tʋʋma 24:15.