Ke ka Baka la Eng Bophelo bo Bonagala bo se na Morero?

KE KA baka la’ng o swanetše go dumela gore bophelo bo ka se dule e le “bjo bokopana bjo bo sa rego selo bjoo” re fetago go bjona “bjalo ka moriti,” bjalo ka ge Kgoši Solomone a boletše? (Mmoledi 6:12, The New English Bible) Lentšu le le buduletšwego la Modimo, e lego Beibele—mothopo o ka botwago ka mo go feletšego wa tsebišo—le holofetša gore nakong e tlago bophelo bo tla ba le morero e le ka kgonthe.—2 Timotheo 3:16, 17.

Beibele e re botša gore morero wa Modimo wa mathomong ka lefase e be e le ofe. Gape e hlalosa lebaka leo ka lona lefase le tletšego go hloka toka, kgatelelo le tlaišego. Ke ka baka la’ng go le bohlokwa gore re kwešiše dilo tše? Ke ka gobane lebaka le legolo la gore batho ba nagane gore bophelo bo tloga bo se na morero ke gore ga ba tsebe—goba ba kgetha go hlokomologa—morero wa Modimo ka polanete ye le batho ba lego go yona.

Morero wa Modimo ka Lefase ke Ofe?

Jehofa Modimo * o dirile lefase gore e be legae le le phethagetšego  la paradeise la batho—lefelo leo go lona banna le basadi ba bego ba tla thabela ka mo go sa felego bophelo bjo bo tletšego le bjo bo kgotsofatšago e le batho ba phethagetšego. Therešo ye ya motheo e thulana le kgopolo yeo e amogelwago ka gohle eupša e se ya thewa Mangwalong ya gore Modimo o dirile lefase gore e be lefelo leo batho ba lekwago go lona go bona ge e ba ba swanelega go ka phela bophelo bjo bo nago le morero kutšwanyana lefaseng la moya.—Bona lepokisi le le nago le sehlogo se se rego  “Na re Swanetše go Tloga Lefaseng e le Gore re Thabele Bophelo bjo bo Nago le Morero?” go letlakala 6.

Modimo o bopile monna le mosadi ka seswantšho sa Gagwe, a ba nea bokgoni bja go bonagatša dika tša gagwe tše di kgahlišago. (Genesi 1:26, 27) O ba bopile ba phethagetše. Ba be ba ena le dilo ka moka tšeo di bego di ba kgontšha go phela bophelo bjo bo atlegilego le bjo bo nago le morero ka mo go sa felego. Seo se be se tla akaretša go tlatša lefase le go le fenya gotee le go fetoša polanete ye ka moka paradeise go fo swana le serapa sa Edene.—Genesi 1:28-31; 2:8, 9.

Go Senyegile Kae?

Go molaleng gore go na le moo go tlogago go senyegile. Batho ka kakaretšo ga ba bonagatše seswantšho sa Modimo. Lefase ruri ga se paradeise. Go diregile’ng? Batswadi ba rena ba mathomo, Adama le Efa, ba dirišitše tokologo ya bona ya boikgethelo gampe. Ba ile ba nyaka go “swana le Modimo,” gore ba ikgethele seo e lego “botse le bobe” boitshwarong. Ka go dira bjalo, ba ile ba latela tsela ya borabele yeo Sathane Diabolo a bego a šetše a e swere.—Genesi 3:1-6.

Ka gona, bobe ga se karolo ya leano le itšego la Modimo leo e lego sephiri le leo le rulagantšwego e sa le pele. Bo bile gona ge Sathane—gomme ka morago Adama le Efa—a rabela kgahlanong le bogoši bja Modimo. Ka baka la borabele bja bona, batswadi ba rena ba mathomo ba ile ba lahlegelwa ke Paradeise le phethagalo, ba se tlišetše bona feela sebe le lehu eupša ba di tlišetša le bana ba bona—lapa ka moka la batho. (Genesi 3:17-19; Baroma 5:12) Se ke sona seo se bakilego maemo ao a dirago gore bophelo bo bonagale bo se na morero.

Ke ka Baka la Eng Bobe bo sa Fedišwa le Semeetseng?

Ba bangwe ba ipotšiša gore: ‘Ke ka baka la’ng Modimo a sa fediša bobe le semeetseng ka go fo fediša Sathane le marabele a mangwe gomme a thoma dilo lefsa?’ Na ruri seo nkabe se bile bohlale? O be o tla arabela bjang ge o be o ka kwa ka mmušo o matla wo o bego o bolaya le semeetseng motho le ge e le ofe yo a hlohlago bolaodi bja wona? Na ditiro tše bjalo di be di ka se dire gore batho ba nago le tekatekano ba se rate mmušo woo le go thibela mmušo go bea mohlala wa se se nepagetšego le se se fošagetšego?

Modimo o ile a kgetha go se dire selo kgahlanong le marabele ao le semeetseng. Ka bohlale, o ile a dumelela gore go fete nako e le gore dikgang tšeo di tsošitšwego kua Edene tša mabapi le tsela ya gagwe ya go buša di ka rarollwa—tša rarollelwa sa ruri.

Go Fedišwa ga Bobe ka Moka

Selo se bohlokwa kudu seo se swanetšego go gopolwa ke se: Modimo o dumeletše gore bobe bo be gona feela ka nako e lekanyeditšwego. O dirile bjalo a tseba gore a ka dirolla ka mo go feletšego ditlamorago tša bjona tše sa kgahlišego ge go šetše go rarolotšwe dikgang tše bohlokwa tšeo di rotošitšwego ke borabele bja kgahlanong le tsela ya gagwe ya go buša.

Modimo ga se a lahla morero wa gagwe ka  lefase le batho. A diriša moporofeta Jesaya, Jehofa o re kgonthišetša gore ke Yena Modiri wa lefase, “yo a sa le bopelago lefeela, yo a le hlametšego go dulwa ke batho.” (Jesaya 45:18) Go se go ye kae, o tla thoma go tsošološetša lefase boemong bja lona bjo bo phethagetšego bjo a bego a bo rerile mathomong. Ge a šetše a bontšhitše ka mo go feletšego gore tsela ya gagwe ya go buša e lokile, o tla ba le lebaka la go diriša matla a gagwe a magolo go phethagatša thato ya gagwe le go fedišetša bobe sa ruri. (Jesaya 55:10, 11) Thapelong ya mohlala, Jesu Kriste o akareditše kgopelo ya gore Modimo a gate mogato wo. Jesu o re rutile go rapela ka gore: “Thato ya gago a e direge le mo lefaseng bjalo ka ge e direga legodimong.” (Mateo 6:9, 10) Seo se akaretša’ng?

Thato ya Modimo ka Lefase

Gare ga dilo tše dingwe, “ba boleta bona e tla ba beng ba lefase.” (Psalme 37:9-11, 29; Diema 2:21, 22) Jesu Kriste o tla “hlakodiša modiidi yo a llelago thušo, le mohlaki.” O tla ba phološa “kgatelelong  le bošorong.” (Psalme 72:12-14) Ntwa e ka se hlwe e sa ba gona; le lehu, megokgo, bohloko goba tlaišego di ka se hlwe di sa ba gona. (Psalme 46:9; Kutollo 21:1-4) Batho ba bantši kudu bao ba hwilego nakong ya ge Modimo a kgotleletše bobe ba tla tsošetšwa bophelong mo lefaseng gomme ba fiwa sebaka sa go holwa ke ditšhegofatšo tše gotee le tše dingwe.—Johane 5:28, 29.

Ge e le gabotse, Jehofa o tla dirolla tshenyo yeo e bakilwego ke borabele bja Sathane. Mogato wo wa go dirolla o tla gatwa ka mo go feletšego mo e lego gore “tlalelo ya pele [dilo ka moka tšeo di tlišago manyami le bohloko lehono] e tla ba e lebetšwe.” (Jesaya 65:16-19) Bokamoso bjoo bo kgonthišeditšwe. Modimo ga a bolele maaka. Dikholofetšo tša gagwe ka moka di a phethagala. Bophelo bo ka se sa hlwa bo “hloka mohola e bile [e le] go kitimiša phefo.” (Mmoledi 2:17, The New English Bible) Go e na le moo, bophelo bo tla ba bo tletše ka morero.

Eupša go thwe’ng ka gona bjale? Na go tseba seo Beibele e se rutago le go kwešiša morero wa Modimo ka lefase go ka dira gore bophelo bja gago bo be le morero gona bjale? Sehlogo sa mafelelo lelokelelong le la dihlogo se tla araba potšišo ye.

[Mongwalo wa tlase]

[Lepokisi go letlakala 6]

 Na re Swanetše go Tloga Lefaseng e le Gore re Thabele Bophelo bjo bo Nago le Morero?

Batho bao ba sa tsebego morero wa Modimo ka lefase ba na le nywagakgolo ba ruta gore re swanetše go tloga lefaseng pele re ka thabela bophelo bjo bo nago le morero e le ka kgonthe.

Ba bangwe ba boletše gore meoya “e ile ya phela bophelo bjo bo phagamego pele e ka tsena mebeleng ya nama.” (New Dictionary of Theology) Ba bangwe ba boletše gore moya o ile wa “golegwa ka mmeleng wa nama e le ge o otlwa bakeng sa dibe tšeo o di dirilego ge o be o sa phela legodimong.”—Cyclopedia of Biblical, Theological, and Ecclesiastical Literature.

Boradifilosofi ba Bagerika, ba bjalo ka Socrates le Plato, ba ile ba ruta kgopolo e rego: Ke feela ge moya o kgaogana le mafokodi a mmele wa nama wa motho moo o tlago go “lokologa go ralaleng le medirong e hlokago mohola gotee le dipoifong tša wona, dikganyogong tša wona tše di feteletšego le mathateng a mangwe ka moka ao a tlaišago batho” gomme wa dula “le medimo ka mo go sa felego.”—Plato’s Phaedo, 81, A.

Ka morago, bao go thwego ke baetapele ba Bokriste ba ile ba tswakanya dithuto tša bona le “dikgopolo [tša boradifilosofi ba Bagerika] tša mabapi le go se hwe ga leabela ga moya.”—Christianity—A Global History.

Bapiša dikgopolo tšeo le ditherešo tša motheo tše tharo tšeo di hwetšwago ka Beibeleng:

1. Morero wa Modimo ke gore lefase e be legae la batho la sa ruri, e sego lefelo leo go lekwago batho go lona go bona gore ke bafe bao ba swanelegago go ka dula le yena legodimong. Ge nkabe Adama le Efa ba ile ba kwa melao ya Modimo, nkabe ba sa phela lefaseng la paradeise.—Genesi 1:27, 28; Psalme 115:16.

2. Gaešita le ge madumedi a mantši a ruta gore motho o na le moya—sephedi se se sa bonagalego seo se dulago ka gare ga gagwe—Beibele e ruta thuto e nngwe e bonolo. Motho ke “moya o phelago” wo o dirilwego ka “lerole la mmu.” (Genesi 2:7) Beibele le ka mohla ga e hlalose moya wo e le o sa hwego. E bolela gore moya o ka bolawa goba wa fedišwa, wa kgaotša go ba gona ka mo go feletšego. (Psalme 146:4; Mmoledi 9:5, 10; Hesekiele 18:4, 20) Moya wa mathomo, Adama, o ile wa hwa lehu gomme wa boela leroleng leo yena a bego a bopilwe ka lona. O ile a boela boemong bja go se be gona.—Genesi 2:17; 3:19.

3. Ditebelelo tša motho ka bokamoso ga se tša ithekga ka gore motho a be le moya o sa hwego wo o yago lefelong le itšego la moya eupša di ithekgile ka kholofetšo ya Modimo ya go tsoša bahu gore ba tle ba phele lefaseng la paradeise.—Daniele 12:13; Johane 11:24-26; Ditiro 24:15.