Akin et Singa Anggapoy Kana na Bilay?

AKIN et napanisiaan mo ya say bilay et aliwa labat lan basta ‘andi-kakanaan tan antiktikey’ a “naandipat a singa anino,” unong ya imbaga nen Arin Solomon? (Eclesiastes 6:12, MB) Say pinuyanan a Salita na Dios, say Biblia, et napanmatalkan so ibabaga to. Tan isisipan na satan a diad arapen et magmaliw a marakep so bilay tayo.​—2 Timoteo 3:16, 17.

Ibabaga na Biblia no anton talagay gagala na Dios parad dalin. Ipapaliwawa met na satan no akin et dakel so mansasaol, manmamaltrato, tan maniirap. Akin et kaukolan tayon talosan iraya? Iisipen na totoo ya anggapoy kana na bilay ta agda amta odino talagan ibabaliwala ra so gagala na Dios parad sayan planeta tan totoo.

Antoy Gagala na Dios Parad Dalin?

Ginawa nen Jehova a Dios * so dalin pian magmaliw a paraison ayaman na totoo, a ditan et magmaliw a maliket tan makapnek so agmanganggan bilay na perpekton totoo. Papanisiaan na karaklan a say dalin kuno et ginawa na Dios a panubokan ed totoo, pian  nanengneng no kasin kanepegan day nawalaan na marakep a bilay diad mundo na saray espiritu. Balet, aliwan ontan so ibabangat na Biblia.​—Nengnengen so kahon ya  “Kaukolan Tayo ni Kasin Taynan so Dalin Pian Magmaliw a Maliket so Bilay?” diad pahina 6.

Ginawa na Dios so laki tan bii a kaulibay To, inikdan To ra na abilidad a mangalig ed marakdakep iran kualidad To. (Genesis 1:26, 27) Ginawa to ran perpekto. Walad sikara so amin pian magmaliw a makapnek tan makapaliket so bilay da ed andi-angga. Kaibad satan so pamparakel tan pangasikaso rad dalin, ya pagmaliwen day interon planeta a paraiso a singa samay hardin na Eden.​—Genesis 1:28-31; 2:8, 9.

Akin et Ag-itan Agawa?

Seguradon walay rason no akin et agnipanengneng na totoo iray kualidad na Dios tan agnagmaliw a paraiso so Dalin. Antoy agawa? Say inmunan atateng tayo et inabuloyan na Dios a makapanggaway desisyon, balet ta inabuso da itan. Labay day magmaliw a ‘singa Dios,’ a mandesisyon parad sarili ra no anto so “maong tan mauges.” Lapud satan, nanrebelde ira a singa si Satanas a Diablo.​—Genesis 3:1-6.

Aliwa sirin ya kapalaran so kaugsan. Tan agsirin itan nanlapud Dios. Ginmapo labat itan sanen si Satanas, ontan met ed si Adan tan Eva, et nanrebelde ed pananguley na Dios. Lapud impanrebelde na inmunan atateng tayo, naandi so Paraiso tan say inkaperpekto, linmoob so kasalanan tan patey, aliwa labat a diad sikara noag ontan met ed ananak da, say amin a totoo ed interon mundo. (Genesis 3:17-19; Roma 5:12) Saraya so rason no akin et singa anggapoy kana na bilay.

Akin et Agtampol Inekal so Kaugsan?

Nayarin nitepet mo, ‘Akin et agtampol inekal so kaugsan? Akin et agtampol pinatey si Satanas tan saray arum a rebelde, tan nanggawa la na sananey?’ Parad sika, duga kasi itan? Antoy reaksion mo no walay makapanyarin gobierno ya pateyen ton tampol so siopaman ya onkontrad autoridad to? Agkasi kuestionen na saray makatunongan a totoo itan tan naandi talek dad pananguley to?

Pinili na Dios ya agtampol pateyen iray rebelde. Lapud sikatoy makabat, inabuloyan ton onlabas so panaon pian samay isyu diad Eden nipaakar ed paraan na pananguley to et maminpinsan a nasolbar.

Ekalen so Amin a Kaugsan

Say nepeg tayon nonoten et saya: Inabuloyan na Dios so kaugsan diad antikey labat a panaon. Ginawa to itan ta amta to a sarag ton ekalen so amin a mauges ya epekto na satan diad bektan nasolbar iray importantin isyu nipaakar ed impanrebelde ed paraan na pananguley to.

Sumpalen na Dios so gagala to parad dalin tan totoo. Panamegley nen propeta Isaias et papaseguroan itayo nen Jehova a Sikato so Nanggawa ed dalin, “agto [itan] ginawan anggapoy kabaliksan to, noag ingen ginawa ton pasen a panayaman na saray totoo.” (Isaias 45:18, MB) Agmanbanyag, ipawil tod perpekton kipapasen so dalin, say gagala to. No  napaneknekan lan sikato so makanepegan a manuley, makatunongan labat ya usaren toy agnaparaan a pakayari to pian sumpalen so linawa to tan sigpot a deralen so amin a kaugsan. (Isaias 55:10, 11) Diad samay kabkabat a pikakasi nen Jesu-Kristo, kinerew to ya onkiwas la komon so Dios. Imbangat itayo nen Jesus ya ipikasin: “Nagawa komon so linawam, a singa ed tawen, ontan met diad dalin.” (Mateo 6:9, 10) Antoy kaibad saya?

Linawa na Dios Parad Dalin

Niraya so pigara. “Saray mauyamo tawiren da naani dalin.” (Salmo 37:9-11, 29; Uliran 2:21, 22) ‘Iyagel nen Jesu-Kristo iray mairap-bilay ya ontatawag ed sikato, ontan met ed saray mankaukolan.’ Ilaban to ray ‘nalalames tan naiirapan.’ (Salmo 72:12-14, MB) Naandi lay panlalaban; pati say patey, akis, ot-ot, odino irap. (Salmo 46:9; Apocalipsis 21:1-4) Saray minilyon a totoo ya inaatey legan na impangiyabuloy  na Dios ed kaugsan et bilayen lamet diad dalin, tan ikdan iray tsansan minabang ed saraya tan ed arum ni ran bendisyon.​—Juan 5:28, 29.

Diad tua, ekalen nen Jehova so amin a kaugsan a resulta na impanrebelde nen Satanas. Lapud sigpot a naandi so kaugsan, “saray inmunan gonigon [amin a mamapaermen tan mamapairap natan et] nalingwanan la.” (Isaias 65:16-19) Segsegurado itan a nagawa. Agmantitila so Dios. Nasusumpal so amin a sipan to. Say bilay et agla magmaliw ya ‘andi-kakanaan tan panguusil labat ed dagem.’ (Eclesiastes 2:17, MB) Imbes, talagan magmaliw a marakep so bilay.

Diad sayan panaon balet ey? Kasin magmaliw a maliket so bilay mo natan no naamtaan moy ibabangat na Biblia tan natalosan moy gagala na Dios parad dalin? Ebatan itan na onsublay ya artikulo.

[Paimano ed leksab]

[Kahon ed pahina 6]

 Kaukolan Tayo ni Kasin Taynan so Dalin Pian Magmaliw a Maliket so Bilay?

Pigaran siglo lan ibabangat na saray totoon agda amta so gagala na Dios parad dalin ya kaukolan tayon taynan so dalin pian talagan magmaliw a maliket so bilay.

Ibabaga na arum a saray kamarerwa et “walad mas marakep a kipapasen antis ya linmad laman na totoo.” (New Dictionary of Theology) Inkuan ni na arum ya say kamarerwa kuno et “inkulong ed laman na too bilang dusa ed saray kasalanan to sanen walad tawen.”​—Cyclopedia of Biblical, Theological, and Ecclesiastical Literature.

Imbangat na saray Griegon philosopher a singa si Socrates tan Plato iyan ideya: Sano nataynan na kamarerwa so pisikal ya laman na too, insan labat “nibulos manlapud panyataw-yataw, kabaglan, takot, mauges a pankaliktan tan amin a sakit a mangaapektad totoo” tan “nakaiba to ed andi-angga iray dirios.”​—Plato’s Phaedo, 81, A.

Ag-abayag, inlaok na saray mankuan a Kristianon lider ed bangat da so “papanisiaan” na saray Griegon philosopher ya “wala kunoy imortal a kamarerwa na too.”​—Christianity​—A Global History.

Ikompara iratan ya ideya ed taloran importantin katuaan a walad Biblia:

1. Gagala na Dios a permanentin panayaman na too so dalin, aliwan temporaryon pasen a panubokan pian nanengneng no siopay manepeg a nakaiba ton manbilay ed tawen. No inunor di Adan tan Eva so ganggan na Dios, mabilay ni ra komon dia tan paraiso ni komon so dalin.​—Genesis 1:27, 28; Salmo 115:16.

2. Ibabangat na maslak ya relihyon a say too et walay kamarerwa to​—espiritun walad dalem na too. Balet mas simpli so ibabangat na Biblia. Say too so “mabilay a kamarerwa” a ginawa ‘manlapu ed dabok.’ (1 Corinto 15:45; Eclesiastes 3:20) Agbalot imbaga na Biblia a sayan kamarerwa et imortal. Imbes, inkuan ton say kamarerwa et nayarin naderal odino ompatey, a sigpot a naandi. (Salmo 146:4; Eclesiastes 9:5, 10; Ezequiel 18:4, 20) Say inmunan too, si Adan, et inatey tan nagmaliw lamet a dabok ya angalaan ed sikato. Sikatoy anggapo la.​—Genesis 2:17; 3:19.

3. Say pambilay na too ed arapen et aliwan lapud walay imortal a kamarerwa to ya onlad mundo na saray espiritu, noagta akadepende itan ed sipan na Dios a bilayen lamet iray inaatey ed paraison dalin.​—Juan 5:28, 29; 11:24-26; Gawa 24:15.