REI Salomon a bisa ku bida ta “pasahero i kòrtiku” i ku nos “ta pasa bai manera sombra.” (Predikador [Eklesiastés] 6:12, BPK) Akaso nos tin motibu pa kere ku esaki lo kambia un dia? Wèl, e Palabra inspirá di Dios ta garantisá ku den futuro bida lo tin berdadero sentido. Nos tin sigur ku esei lo kumpli pasobra informashon ku nos ta haña den Beibel semper ta konfiabel.​—2 Timoteo 3:​16, 17.

Beibel ta bisa nos kiko tabata Dios su propósito original pa e tera. Tambe e ta splika dikon mundu ta yen di inhustisia, opreshon i sufrimentu. Dikon ta importante pa nos sa e kosnan akí? Pasobra, e echo ku hende ta sinti ku bida no tin nada aden ta debí ku nan no sa—òf no ke sa—Dios su propósito pa e planeta Tera i hende.

Kiko Ta Dios Su Propósito pa e Tera?

Yehova Dios * a traha e tera pa e bira un paradeis, un hogar ideal pa hende. E tera lo a bira un lugá kaminda hende perfekto lo a disfrutá pa semper di un bida  interesante i satisfaktorio. E bèrdat fundamental akí ta kontradisí un idea ku hopi hende tin. Kua idea? Hopi hende ta kere ku Dios a traha e tera komo un lugá pa tèst hende pa asina wak si nan meresé un mihó bida den e mundu di spiritu. Pero, e idea akí no ta bíbliko.​—Wak e kuadro “Nos Mester Bandoná Tera pa Disfrutá di un Mihó Bida?” na página 6.

Dios a traha hende segun Su imágen i ku kapasidat pa imitá Su bunita kualidatnan. (Génesis 1:​26, 27) E promé dos hendenan tabata perfekto i Dios a perkurá tur kos pa nan semper por disfrutá di bida. Nan mester a yena e tera i domin’é, transformá henter e planeta den un paradeis meskos ku e hòfi di Edén.​—Génesis 1:​28-31; 2:​8, 9.

Kiko A Bai Robes?

Ta bisto ku algu a bai hopi robes. Pasobra hende en general apénas ta reflehá Dios su bunita kualidatnan i tera ta leu di ta un paradeis. Kiko a pasa? Nos promé mayornan, Adam ku Eva, a hasi mal uso di nan boluntat liber. Nan kier tabata “manera Dios” pa nan mes disidí kiko ta “bon i malu.” Ku e akshon akí, nan a uni nan mes na e rebelion di Satanas e Diabel.​—Génesis 3:​1-6.

Pues, maldat no ta forma parti di un plan misterioso ku Dios a determiná di antemano. Maldat a kuminsá na momento ku Satanas, i despues Adam ku Eva, a lanta kontra Dios su gobernashon. A konsekuensia di e rebelion, nos promé mayornan a pèrdè e paradeis i no tabata perfekto mas, nan a trese piká i morto no riba nan so sino tambe riba nan desendensia, esta, henter e famia humano. (Génesis 3:​17-19; Romanonan 5:12) Esaki a krea tur e situashonnan i sirkunstansianan ku ta laga hende sinti ku bida ta bashí.

Dikon No A Destruí Maldat Mesora?

Tin hende ta pensa, ‘Dikon Dios no a hasi algu mesora? Djis e mester a destruí Satanas i e otro rebeldenan i kuminsá di nobo.’ Pero esei lo tabata e mihó kos pa hasi? Kiko lo bo pensa si bo tende di un gobièrnu poderoso ku mesora ta mata esnan ku kuestioná su outoridat? Sin duda, hende ku stima hustisia lo no apoyá un gobièrnu asina i e gobièrnu su proseder lo suak su outoridat pa stipulá loke ta bon i malu.

A base di esei, Dios a opta pa no tuma medida mesora kontra e rebeldenan. El a laga tempu pasa pa asina e kuestion ku a lanta den Edén tokante su derecho di goberná keda resolvé—unabes i pa semper.

Fin na Tur Maldat

Loke nos tin ku keda kòrda ta esaki: Dios a permití maldat eksistí solamente pa un tempu. El a hasi esei pasobra e sa ku e por drecha tur e konsekuensianan grave ku maldat a kousa asina ku e resolvé e kuestion importante ku a lanta kontra su derecho di goberná.

Dios su propósito pa e tera i hende no a kambia. Pa medio di e profeta Isaias, Yehova ta deklará ku ta E a traha tera i e “no a krea esaki pa e keda bashí, ma el a form’é pa e wòrdu habitá.” (Isaias 45:18) Denter di masha poko, Dios lo kumpli ku su propósito  original pa e tera. Despues ku e demostrá bon kla ku e ta un gobernante hustu, e tin tur motibu pa usa su gran poder pa kumpli ku su boluntat i destruí maldat kompletamente. (Isaias 55:​10, 11) Hesukristu a mustra, den e Orashon di Nos Tata, ku e tabata ke pa Dios dal e paso akí pasobra el a pidi: “Ku bo boluntat sosodé na tera meskos ku den shelu.” (Mateo 6:​9, 10) Pero kiko e boluntat ei ta enserá?

Dios Su Boluntat pa e Tera

Dios su boluntat ta enserá ku “e humildenan lo heredá e tera.” (Salmo 37:​9-11, 29; Proverbionan 2:​21, 22) Hesukristu lo “libra esun den nesesidat ora ku e sklama pa yudansa [i] esun afligí tambe.” E lo salba nan “for di opreshon i violensia.” (Salmo 72:​12-14) Lo no tin guera mas, ni morto, lágrima, doló i sufrimentu. (Salmo 46:9; Revelashon 21:​1-4) Un gran kantidat di hende ku a  muri durante e tempu ku Dios a tolerá maldat lo haña resurekshon pa nan biba aki riba tera. Nan lo haña e oportunidat pa disfrutá di tantu e bendishonnan akí komo di otronan.​—Juan 5:​28, 29.

En bèrdat, Yehova lo drecha tur e dañonan ku e rebelion di Satanas a kousa. Esaki lo pone ku “e problemanan di ántes [tur e kosnan ku awe ta kousa doló i tristesa] a wòrdu lubidá.” (Isaias 65:​16-19) E futuro ei ta garantisá pasobra Dios no ta gaña i tur loke e primintí e ta kumpli kuné. Hende su bida lo no ta “bashí i [un] korementu tras di bientu” mas. (Eklesiastés 2:17, The New English Bible) Mas bien, bida lo tin mas sentido.

Pero kiko nos por bisa di aworakí? Akaso nos bida por haña mas sentido for di awor si nos haña sa kiko Beibel ta siña i ta komprondé Dios su propósito pa e tera? E último artíkulo di e seri akí lo trata esaki.

[Nota]

[Kuadro na página 6]

Nos Mester Bandoná Tera pa Disfrutá di un Mihó Bida?

Pa siglonan, hende ku no konosé Dios su propósito pa e tera a siña otronan ku nos mester bandoná tera pa nos disfrutá di un eksistensia ku berdadero sentido.

Algun di nan a bisa ku almanan “a disfrutá di un eksistensia superior promé ku nan drenta den kurpa di hende individual.” (New Dictionary of Theology) I otronan a bisa ku e alma ta “enkarselá den e kurpa komo kastigu pa e pikánan ku el a kometé den shelu.”​—Cyclopedia of Biblical, Theological, and Ecclesiastical Literature.

Filósofonan griego, manera Sócrates i Plato, a siña hende ku ta solamente ora e alma skapa for di e limitashonnan di un kurpa físiko e por ta “liber di eror, lokura, miedu, su deseonan salbahe i tur otro problema ku hende tin” i e alma lo biba “pa semper huntu ku e diosnan.”​—Plato’s Phaedo, 81, A.

Despues, lidernan supuestamente kristian a inkluí “teorianan di filósofonan griego tokante alma inmortal” den nan siñansa.​—Christianity​—A Global History.

Laga nos kompará e ideanan ei ku tres bèrdat fundamental den Beibel:

1. Dios a traha e tera komo e hogar permanente di hende, i no komo un lugá temporal kaminda e ta tèst hende pa wak ken meresé biba serka dje den shelu. Si Adam ku Eva a obedesé e leinan di Dios, nan lo tabata biba ainda den Paradeis aki riba tera.​—Génesis 1:​27, 28; Salmo 115:16.

2. Mayoria di religion ta siña hende ku nan tin un alma inmortal—algu invisibel ku ta keda na bida ora e kurpa físiko muri—Beibel ta siña hende algu hopi mas simpel. Beibel ta bisa ku “e mortonan no sa nada.” (Eklesiastés 9:​5, 10) E deskripshon ku Beibel ta duna di morto ta mustra bon kla ku hende no tin un alma inmortal. (Salmo 146:4) E promé hende, Adam, a muri i bolbe na stòf for di kua a kre’é. Pues, el a stòp di eksistí.​—Génesis 2:17; 3:19.

3. Hende ku muri tin e posibilidat di biba atrobe no debí ku nan tin un alma inmortal, sino pasobra Dios a primintí ku lo e lanta nan bèk for di morto. Nan lo no biba den un mundu di spiritu sino den Paradeis riba tera.​—Daniel 12:13; Juan 11:​24-26; Echonan 24:15.