Fu san ede a gersi leki a libi na fu soso?

KOWNU SALOMO ben taki dati a libi na „wan soso sani di e pasa gowe esi” èn a de „leki wan skaduw”. Fu san ede yu kan bribi taki wan ten o kon te a libi o de moro leki dati nomo? (Preikiman 6:12, The New English Bible) Bijbel, a Wortu fu Gado, na wan buku di abi tru tori na ini di wi kan bribi. A e pramisi taki a libi o warti trutru na ini a ten di e kon.​—2 Timoteyus 3:16, 17.

Bijbel e fruteri wi san Gado abi na prakseri gi grontapu. A e sori tu fu san ede grontapu lai nanga kruktudu, fu san ede sma e kwinsi trawan, èn fu san ede so furu sma e pina. Fu san ede a de prenspari taki wi e frustan den sani disi? A moro prenspari sani di e meki taki sma e feni taki a libi na fu soso, na taki den no sabi, noso den no wani sabi san Gado abi na prakseri gi grontapu èn gi libisma di e libi na tapu.

San Gado abi na prakseri gi grontapu?

Yehovah Gado * ben meki grontapu fu de wan paradijs tanpresi gi libisma pe ala sani ben o de bun dorodoro. Na a presi disi mansma nanga umasma di no ben abi  sondu, ben o abi wan bun èn koloku libi fu têgo. Furu sma no e bribi a tumusi prenspari tru tori disi di skrifi na ini Bijbel. Na presi fu dati, den e bribi taki Gado ben meki grontapu leki wan presi pe a e tesi libisma fu si efu den bun nofo fu libi wan warti libi na ini wan yeye kondre.—Luku a faki  „Wi musu gowe libi grontapu fu man abi wan warti libi?” na tapu bladzijde 6.

Gado meki mansma nanga umasma leki wan prenki fu ensrefi, fu di a meki den na so wan fasi taki den man sori den srefi moi fasi fu en (Genesis 1:26, 27). A meki den sondro wan fowtu. Den ben abi ala sani di de fanowdu fu abi wan warti libi fu têgo pe den ben o abi nofo fu du. Disi ben o wani taki dati den ben musu furu grontapu èn den ben o basi en. Na so heri grontapu ben o tron wan paradijs neleki a dyari fu Eden.​—Genesis 1:28-31; 2:8, 9.

Fu san ede sani no waka bun?

A de krin taki sani waka heri tra fasi. Furu libisma no e sori den moi fasi fu Gado. A no de fu taki dati grontapu a no wan paradijs. San pasa? Wi fosi papa nanga mama, Adam nanga Eva, no gebroiki a grani di den abi fu teki den eigi bosroiti, bun. Den ben wani „de leki Gado”, fu di den ben o bosroiti gi densrefi „san bun èn san ogri”. Di den du dati, dan den waka baka Satan Didibri, di ben opo ensrefi teige Gado kaba.​—Genesis 3:1-6.

Sobun, a no de so taki na Gado seti sani na fesi na wan kibri fasi, taki ogri kon de na grontapu. Ogri kon de di Satan, èn bakaten Adam nanga Eva, opo densrefi teige a tirimakti fu Gado. Fu di wi fosi papa nanga mama opo densrefi teige Gado, meki den lasi a Paradijs èn den kon abi sondu. Na so den tyari sondu nanga dede kon tapu densrefi, èn tapu den bakapikin fu den, noso tapu ala libisma na grontapu (Genesis 3:17-19; Romesma 5:12). Na a sani disi meki taki a gersi leki a libi na fu soso.

Fu san ede Gado no puru ogri wantewante?

Son sma e aksi densrefi: ’Fu san ede Gado no puru ogri wantewante? Gado ben kan pori Satan nanga den tra sma di opo densrefi teige en èn na so a ben kan bigin baka, a no so?’ Dati ben o de wan koni sani trutru? Fa yu ben o feni en te yu yere fu wan tranga tirimakti di e kiri iniwan sma wantewante di e taki dati a tirimakti no bun? Sma di de nanga den krinkrin frustan ben o drai baka gi so wan tirimakti fu di den no handri bun, a no so?

Gado bosroiti fu no pori den sma di opo densrefi teige en, wantewante. Na wan koni fasi, a meki ten pasa so taki den problema di ben opo kon na ini Eden èn di abi fu du nanga a fasi fa a e tiri, ben o lusu fu ala ten.

Gado o puru ala ogri

A moro prenspari sani fu hori na prakseri na disi: Gado gi pasi taki ogri de fu wan pisi ten nomo. A du dati fu di a sabi taki te a problema lusu di abi fu du nanga a fasi fa a e tiri èn di bigin di sma opo densrefi teige en, dan a o puru ala den sari bakapisi fu dati.

Gado no frigiti san a ben abi na prakseri gi grontapu èn gi libisma. Nanga yepi fu a profeiti Yesaya, Yehovah gi wi a dyaranti taki En na a Mekiman fu grontapu, èn „a no meki [grontapu] fu soso, ma a seti en fu sma libi na tapu” (Yesaya 45:18). Heri esi a o bigin fu meki  grontapu kon bun dorodoro baka, neleki fa a ben wani dati na a bigin. Baka te a kon na krin taki a e tiri na wan reti fasi, a o abi a reti fu gebroiki en makti fu meki a wani fu en pasa èn fu tyari wan kaba kon na ala ogri (Yesaya 55:10, 11). Na ini a begi di Yesus Krestes leri den bakaman fu en, a ben aksi Gado fu du dati. Yesus leri wi fu begi: „Meki yu wani pasa na grontapu soleki fa a e pasa na hemel” (Mateyus 6:9, 10). San disi wani taki?

San Gado wani gi grontapu?

Wan fu den sani di o pasa na taki „den safri-ati sma o kisi grontapu” (Psalm 37:9-11, 29; Odo 2:21, 22). Yesus Krestes o „frulusu den pôti sma di e bari suku yepi, sosrefi ala den mofina sma”. A o frulusu den so taki trawan no ’kwinsi den èn den no du ogri-ati sani nanga den’ moro (Psalm 72:12-14). Feti no o de moro, dede no o de moro, nowan watra-ai, pen, noso pina no o de moro (Psalm 46:9;  Openbaring 21:1-4). Ipi-ipi sma di dede na a ten di Gado gi pasi taki ogri de, o kisi wan opobaka fu libi dyaso na grontapu èn den o kisi na okasi fu kisi wini fu den blesi disi nanga tra blesi.​—Yohanes 5:28, 29.

Fu taki en leti, Yehovah o puru na ogri di kon leki bakapisi fu na opo di Satan opo ensrefi teige en. A o puru den sani disi krinkrin, iya, den ’no o prakseri moro fa den ben de na ini banawtu fositen èn fa den ben e pina’ (Yesaya 65:16-19). Wi kan de seiker taki den sani disi o pasa na ini a ten di e kon. Gado no e lei. Ala den sani di a pramisi, e kon tru. A libi no o de wan ’soso sani moro èn a no o de leki na winti nomo wi e feti fu fanga’ (Preikiman 2:17). Na presi fu dati, a libi o warti trutru.

Ma fa a de now? A de so taki te wi sabi san Bijbel e leri èn te wi e frustan san Gado abi na prakseri gi grontapu, dan dati o meki wi libi warti now? A tra artikel di e kon now o gi piki tapu na aksi dati.

[Futuwortu]

[Faki na tapu bladzijde 6]

 Wi musu gowe libi grontapu fu man abi wan warti libi?

Hondrohondro yari langa, sma di no sabi san Gado abi na prakseri gi grontapu, leri trawan taki wi musu gowe libi grontapu fosi wi kan abi wan warti libi trutru.

Sonwan fu den ben taki dati libisma abi wan yeye di no man dede èn di ben „de na wan moro bun presi fosi a kon na ini libisma skin” (New Dictionary of Theology). Trawan ben taki dati a yeye ben „poti na ini libisma skin fu strafu en gi den sondu di a du na hemel”.​—Cyclopedia of Biblical, Theological, and Ecclesiastical Literature.

Griki filosofiaman, soleki Sokrates nanga Plato, ben leri sma a sani disi: Soso te a yeye e komoto na ini a libisma skin di abi swakifasi, a o man „kon fri fu di a no abi fu go fu a wan presi na a trawan, a no o du don sani moro, a no o frede moro, a no o abi takru lostu moro, èn a no o abi ala den fowtu sani moro di e trobi libisma”. Baka dati, a o man „tan makandra nanga den gado fu ala ten”.​—Plato’s Phaedo, 81, A.

Bakaten, fesiman di ben kari densrefi Kresten, ben teki „den leri fu den Griki filosofiaman abra, di e taki dati libisma abi wan yeye di no man dede”.​—Christianity—A Global History.

Teki den sani dati agersi nanga dri tumusi prenspari tru tori na ini Bijbel:

1. Gado wani taki grontapu na a têgo tanpresi fu libisma, èn a no de wan presi pe a e tesi libisma fu si efu den bun nofo fu libi na hemel. Efu Adam nanga Eva ben gi yesi na den wet fu Gado, dan den ben o de na libi ete dyaso na ini wan paradijs na grontapu.​—Genesis 1:27, 28; Psalm 115:16.

2. Aladi moro furu kerki e leri sma taki libisma abi wan yeye di no man dede, toku Bijbel e leri wi wan tra sani di de moro makriki fu frustan. Bijbel no e taki dati libisma no man dede. A fosi sma, Adam, dede trutru èn a drai go baka na doti fu di na fu doti a ben meki. Na so a no ben de moro.​—Genesis 2:17; 3:19.

3. Libisma o man libi na ini a ten di e kon, no fu di den abi wan yeye di e libi go doro na ini wan yeye kondre, ma fu di Gado pramisi taki wan opobaka o de gi den dedewan. Na so den o kon na libi baka na ini wan paradijs na grontapu.​—Danièl 12:13; Yohanes 11:24-26; Tori fu den Apostel 24:15.