¿Tuku xlakata tamakgkatsi pi ni xlakaskinka latamat?

MAPAKGSINA Salomón wa pi “ni makgas latamayaw chu nitu litaxtu latamat” chu chixku “titaxtu la mastilankg” o mastalekg (Eclesiastés 6:12). Pero Dios kinkawaniyan kBiblia pi nialh makgas xlikana nalipaxuwayaw latamat. Chu xlakata xTachuwin putum kilhtamaku wanit tuku xaxlikana, uma tuku wanit nakgantaxtu (2 Timoteo 3:16, 17).

Biblia kinkawaniyan tuku xlakata Dios tlawalh Katiyatni. Nachuna, kinkawaniyan tuku xlakata anan lhuwa tuku ni xaʼakgstitum, tiku kaʼakgchipa latamanin chu tapatin. Pero ¿tuku xlakata kilikatsitkan uma temas? Xapulana, xlakata latamanin ni katsikgo la napaxuwakgo kxlatamatkan chu ni katsikgo o ni katsiputunkgo tuku lakapastaknit Dios natlawa xpalakata latamanin chu Katiyatni.

¿Tuku xlakata Dios tlawalh Katiyatni?

Jehová Dios * tlawalh Katiyatni xlakata akgtum paraíso  xwa chu anta xlatamakgolh latamanin, akgtum paraíso niku lakchixkuwin chu lakpuskatin tiku ni xkgalhikgolh talakgalhin tlan xlipaxuwakgolh putum kilhtamaku akgtum stlan latamat. ¡Biblia nichuna masiya la kanajlakgo latamanin! Lhuwa lakpuwankgo pi anta niku wilakgolh espíritus anta tlan xatapaxuwan tawilakan, chu Katiyatni niku kinkaliʼakxilhkanan komo tlan anta nalatamayaw (kaʼakxilhti recuadro « ¿Kajwatiya tlan lipaxuwakan latamat niku lamakgolh espíritus?» kpágina 6).

Dios kamaxkilh latamanin taya nema xla kgalhi, uma wamputun pi tlan limasiyakgo tayat nema kgalhi Dios (Génesis 1:26, 27). Xapulana chixku chu xapulana puskat ni xkgalhikgo talakgalhin chu tlan xkgalhikgo xatapaxuwan latamat nema ni kgalhi xlisputni. Xlikgalhitkan xwanit lhuwa kamanan chu xkuentajtlawakgolh Katiyatni, xwamputun, tlan xtlawakgolh pi Katiyatni akgtum paraíso xwa chuna la jardín xla Edén (Génesis 1:28-31; 2:8, 9).

¿Tuku xlakata chuna lalh?

Xlikana, tuku lakapastaknit Dios natlawa nina kgantaxtu. Latamanin ni limasiyakgo xtayat Dios, chu Katiyatni ni akgtum paraíso. ¿Tuku lalh? Adán chu Eva, xapulana chixku chu xapulana puskat, nitlan limaklakaskinkgolh xlakata xkamaxkikanit talakaskin xakstukan xlaksakkgolh tuku natlawakgo. Xtachuna «la Dios wamputunkgolh» chu xakstukan laksakputunkgolh «tuku tlan chu tuku nitlan», nachuna tlawakgolh la Satanás chu ni kgalhakgaxmatnankgolh (Génesis 3:1-6).

Tuku nitlan anan uku kkakilhtamaku ni wa Dios tiku lakkaxwililh. Chuna lalh akxni Satanás, Adán chu Eva, ni kgalhakgaxmatkgolh xlimapakgsin Dios. Wa xlakata katamakxtuka xapulana kinatlatnikan kParaíso chu tsukukgolh kgalhikgo talakgalhin. Kgalhikgolh talakgalhin chu kamatitaxtinikgolh putum latamanin (Génesis 3:17-19; Romanos 5:12). Wa xlakata lamaw kkakilhtamaku niku tasiya pi latamat nitu litaxtu.

¿Tuku xlakata Dios ni tunkun malakgsputulh tuku nitlan?

Wi tiku xakstu kgalhskinkan tuku xlakata Dios ni tunkun malakgsputulh Satanás chu tiku ni kgalhakgaxmatnikgolh chuna lakapala xlakkaxtlawaka taʼakglhuwit. ¿Tlan xwa komo chuna xtlawalh Dios? Kalakpuwanti tuku xlalh komo chatum mapakgsina putum xkamakgnilh tiku xwankgolh pi nitlan mapakgsinan. ¿Nixlikana pi nialh xkgalhakgaxmatkgolh chu nialh xtatayakgolh xaʼakgstitum latamanin?

Wa xlakata, Dios ni tunkun kamalakgsputulh tiku ni kgalhakgaxmatkgolh. Wata mastalh talakaskin xtitaxtulh kilhtamaku xlakata tuku lalh kʼEdén xamakgtum xlakkaxlalh.

Akxni nasputa putum tuku nitlan

Wa uma tuku tlakg xlakaskinka: Dios mastanit talakaskin kaʼanalh tuku nitlan kaj tsinu kilhtamaku. Chu chuna tlawanit xlakata katsi pi akxni nalakkaxla taʼakglhuwit nema tawi kʼEdén tlan nalakkaxtlawa putum tuku nitlan liminit xlakata ni kgalhakgaxmatnika.

Tuku lakapastaknit Dios natlawa xlakata Katiyatni chu latamanin nitu lakgpalima. Palakachuwina Isaías wa pi Jehová wa tlawanit Katiyatni chu ni tlawalh Katiyatni «xlakata nitu nalilakan, tlawalh xlakata  anta nalatamakan» (Isaías 45:18). Nialh makgas natlawa pi nakgantaxtu tuku xlakpuwanit xlakata Katiyatni. Chu akxni nialhti katiwa pi ni tlan mapakgsina, Jehová nakamalakgsputu tiku nitlan likatsikgo chu natlawa pi kakgantaxtulh xtalakaskin (Isaías 55:10, 11). Wa uma tuku Jesús skinilh kxʼoración xla padrenuestro: «Wa nkatatlawalh ntu mintalakaskin, xtachuna lantla nkʼakgapun, nachuna kawa nkatiyatna» (Mateo 6:9, 10). Pero ¿tuku xtalakaskin?

Xtalakaskin Dios xlakata Katiyatni

Dios wan pi «ti laktlan [...] katsij, ixlakan nawan ama lilakgatit pulataman» (Salmo 37:9-11, 29; Proverbios 2:21, 22). Nachuna, xTachuwin Dios wan pi Jesucristo «nalakgmaxtu pobre [...] akxni nakilhanij» chu nakinkalakgmaxtuyan akxni lixkajnit “nakinkamakgxtakgajnikanan y nakinkamakgniputunkanan” (Salmo 72:12-14). Nialh katianalh guerras, linin, tatasa, takatsanajwa chu tapatin (Salmo 46:9; Apocalipsis [Revelación]  21:1-4). Chu ¿la nakakitaxtuni tiku nikgolh xlakata Dios mastama talakaskin xʼanalh tuku nitlan? Nalakastakwanankgo unu kKatiyatni chu nakamaxkikan talakaskin nalipaxuwakgo uma chu amakgapitsi tasikulunalin (Juan 5:28, 29).

Jehová namasputu putum tuku tlawalh akgskgawini xlakata ni kgalhakgaxmatli Jehová. «Tuku titaxtunita [putum tuku uku tlawa pi naʼanan takatsanajwa chu tapatin] nialh katitalakapastakli» wan Isaías 65:16-19. Dios ni akgsaninan. Putum tuku wan kgantaxtu, chu uma na nakgantaxtu. Nachin kilhtamaku nialhti katiwa: «Nitu litaxtu, xtachuna la putsastalanikan un» (Eclesiastés 2:17, Nueva Traducción Viviente). Putum nalipaxuwayaw latamat.

Pero ¿tuku natlawayaw uku? ¿Tlakg tlan nalimakgkatsiyaw komo nakatsiyaw tuku masiya Biblia chu naʼakgatekgsaw tuku lakpuwanit Dios natlawa kKatiyatni? Xaʼawatiya artículo xla uma serie nakgalhtinan uma takgalhskinin.

[Notas nema wilakgo kpágina]

[Epígrafe xla página 6]

 ¿Kajwatiya tlan lipaxuwakan latamat niku lamakgolh espíritus?

Xlakata ni katsikgo tuku lakapastaknit Dios xlakata Katiyatni, lhuwa latamanin akglhuwata siglo masiyakgonit pi kaj anta niku lamakgolh espíritus tlan lipaxuwakan latamat.

Makgapitsi xwankgo pi espíritus «lu xlipaxuwakgo tuku xtlawakgo akxni nina xtanumakgolh xmaknikan latamanin» (Nuevo Diccionario de Teología). Amakgapitsi wankgo pi espíritu «talakgatalanuninit kxmaknikan latamanin, xlakata xokgomakgo tuku tlawakgolh kxapulana xlatamatkan» (La razón filosófica y la razón católica).

Makgapitsi filósofos xalak Grecia, la Sócrates chu Platón masiyakgolh pi akxni espíritus makgxtakgkgo xmaknikan latamanin tlakg tlan latamakgo «ni kgalhikgo tuku nitlan, liwana lakapastakkgo tuku tlawakgo, nitu pekuanikgo, chu nialh kalakgmin tuku nitlan nema kaʼakgspula latamanin» chu «putum kilhtamaku anta natatawilakgo dioses» (Fedón, Platón, 81a).

Titaxtulh kilhtamaku, lhuwa makgalhtawakgananin xla takanajla tiku xwankgo pi kstalaninanin Cristo xwankgonit, tsukukgolh masiyakgo pi «espíritu nikxni niy», nema tuku xmasiyakgo filósofos xalak Grecia (Christianity—A Global History).

Pero ni xtachuna uma pulaktutu tuku lu xlakaskinka masiya Biblia:

1. Dios tlawalh Katiyatni xlakata putum kilhtamaku anta xlatamakgolh latamanin, chu ni tlawalh Katiyatni kaj naliʼakxilhkan tiku lakgchan nalatama kʼakgapun. Komo Adán chu Eva xtikgalhakgaxmatkgolh xlimapakgsin Dios, la uku xlatamakgolhku kKatiyatni, kʼakgtum paraíso (Génesis 1:27, 28; Salmo 115:16).

2. Atsinu ni putum takanajla masiyakgo pi chixku wi tuku kgalhi nema ni niy, wantuku ni tasiya, pero Biblia tlakg ni tuwa tuku kinkamasiyaniyan, wan: pi chixku «chatum lataman» nema litlawakanit «pokgxni xalak katiyatni» (Génesis 2:7). Ni wan pi wi tuku kgalhiyaw nema ni niy; wata wan pi tlan niy o masputukan chu nialh latama (Salmo 146:4; Eclesiastés 9:5, 10; Ezequiel 18:4, 20). Adán xapulana lataman nilh chu taspitli kpokgxni nema xlitlawakanit, uma wamputun, nialh latamalh (Génesis 2:17; 3:19).

3. Tiku nikgo nalatamaparakgo, pero ni xlakata kgalhikgo tuku ni niy nema makgxtakga makni, chuna nala xlakata wa Dios tiku nakamalakastakwani. Nachuna, ni katiʼankgolh latamakgo niku wankan pi lamakgolh espíritus, wata nalatamakgo kKatiyatni, kʼakgtum paraíso (Daniel 12:13; Juan 11:24-26; Hechos 24:15).