Kwo ma Tyen Lokke Tye I Kare-ni ki Dong pi Naka

I TWERO bedo ki kwo ma tyen lokke tye i kare-ni. Nining? Ka ilubu cik me ryeko ma tye i Baibul, Lok pa Lubanga. Kong wanenu mogo manok nok.

CIK MA IYE LAC ME BAIBUL: Kabaka Solomon ocoyo ni, “Gin maber makato ma dano myero otim en aye ni en myero ocam cam dok omat mat, wek onong yomcwiny i tic ma en tiyo.”​—LATITLOK 2:24.

Kicweyowa me nongo yomcwiny i tic mupore ma watiyo. Kadi bed kwo tek adada, pud iromo nongo olo yengo mo i kwo i kare-ni ka itiyo matek dok ki ada.

CIK MA IYE LAC ME BAIBUL: “Miyo mot kelo gum [yomcwiny] makato gamo agama.”​—TIC PA LUKWENA 20:35.

Dano mapol gunongo ni timo jami pi jo mukene—me laporre, miyo cawagi ki kerogi i konyo jo mukene i kare me peko keligi mot mapol dok minigi kwo ma tyen lokke tye. Solomon ocoyo ni, “pe ikwer tiyo gin maber bot dano ma mito ni ikonye, ma nongo itye ki twero me tiyone.”​—Carolok 3:27.

Nen kong labol pa Ralph. Dakone onongo dong tye i tic me pwony pi kare malac, ci i kare ma Ralph oweko ticce en oribbe kwede. Gin aryo ducu gubedo ka cwalo cawa malac dwe ki dwe i ticwa me pwony, kun gimine  me pwonyo dano ki Baibul. Ralph owacci, “Ka wadwogo paco otyeno, wanongo ni waol adada pe ni pi tiyo, ento pienni watiyo ki kerowa ducu i tic pa Wonwa me polo.” “Man tye olo maber!” En kacel ki dakone cwinygi yom pien kwogi jenge i miyo mic.

CIK MA IYE LAC ME BAIBUL: ‘Ngat ma larem bedo ki mar kare ducu, dok tye omego ma ginywalo me nywako i peko.’​—CAROLOK 17:17.

Ciro peko twero bedo yot ka kinywako kacel. Francis Bacon, laco mo ma coyo lok akwana i Leb Muno, ocoyo ni jo ma gipe ki lurem me ada “lobo tye botgi calo aroo.” Bedo ki lurem me ada—ki dong ka in itye larem maber—miyo kwoni bedo yot; twero mini yomcwiny ki yengo.

CIK MA IYE LAC ME BAIBUL: “Gitye ki gum [yomcwiny] jo ma gingeyo ni gin lucan i lok me cwiny.”​—MATAYO 5:3.

Yecu onyutu gin acel ma pire tek adada ka ce imito ni inong adwogi maber ki i cikke pa Lubanga—niang dok icob ‘mitini me cwiny.’ Pien pe watye calo lee, wan kinywalowa ki miti me niang gin mumiyo wakwo ki dong tyen lok me kwo. Lubanga Jehovah keken aye romo cobo miti meno, dok en timo meno kun tiyo ki Lokke, Baibul. Kit ma waneno kwede i pwony mukato angec, Baibul nyuto yub pa Lubanga pi lobo. Titiwa pingo watye kany, gin mumiyo dano tye ka deno can mapol, ki gin ma Lubanga mito ni watim. Niang i kom ada magi ma gitye i Ginacoya-ni pire tek, weko wabedo ki tyen lok me kwo dok keliwa yengo. Jo ma gikwanyo cawagi me kwano Baibul i yo matut ki dok keto gin ma gupwonyo i tic gibedo ki yomcwiny. Pingo? Pien gidongo wat macok adada ki Lacwecwa Jehovah, ‘Lubanga ma layomcwiny.’​—1 Temceo 1:11.

CIK MA IYE LAC ME BAIBUL: “Ber ipo i kom Lacwec mucweyo in . . . ma peya kare marac oo ki ma mwaka peya onyiko cok ma weko iwacci, ‘Pe atye ki miti i komgi.’”​—LATITLOK 12:1, THE NEW ENGLISH BIBLE.

Tam ma Kabaka Solomon omiyo bot jo matino, ma i kare mukene pe giniang ni kwo twero kelo peko mapol-li, pire tek bot wan ducu. Wek Lacwecci obed ngat ma pire tek loyo i kwoni. Meno aye gin ma bimiyi ibedo ki tyen lok me kwo. Kwer tam man ni: “Wacamu, wamatu, pien diki wabito woko.” (1 Jo Korint 15:32) Ka iketo  Lubanga bedo mukwongo, Latitlok 8:12 wacci, jami ‘bibedo maber’ piri.

Anyaka mo ma nyinge Wendi onongo ni meno tye lok ada. I kare ma en pud tidi, en kacel ki laminne matidi gupwonyo leb Spanish wek gicit i lobo Dominican Republic, ka ma can lutit kwena maber me Baibul onongo tye iye. “Wajalo jami mapol wek wati ka ma can lutit kwena tye iye, ento wabedo ki kwo mamwonya adada. Pe aromo loko dwe abicel magi ki gin mo keken! Mot ma wanongo dit kato gin mo keken ma wajalo.”

Bedo Lagen Bot Lubanga Miniwa Kwo ma Tyen Lokke Tye

Dongo wat maber ki Jehovah twero miyo kwo bedo ki tyen lok i yo mo madok pat adada. Nining? I kare ma en tye ka bwolo Adam gin ki Kawa me turo cik pa Lubanga, Catan bene owacci pe tye ngat mo ma bigwoko gennene bot Lubanga ka ce en tye i atematema. (Yubu 1:9-11; 2:4) In iromo nyutune ni Catan tye lagoba! Nining? Ka ibedo lagen bot Lubanga, ilubo cikke ma igi lac, ki ka i nyuto ni iye ni Jehovah tye ki twero madit me moko piwa gin maber ki gin marac.​—Niyabo 4:11.

Omyero wacir pekki mapol ka wamito lubo yo matir. Pekki magi mono gengowa bedo ki kwo ma tyen lokke tye? Go kong ni lamone mo ma kite rac atika tye ka balo nying laremi nyo dano me otwu ma imaro. Ka ce cung i nge ngat meno ma wamaro ni miyo wadeno can i cing lamonewa, meno mono twero gengowa bedo ki kwo ma tyen lokke tye? Pe wacel! Waciro can ki yomcwiny pi cung i nge ngat meno. Meno bene rom aroma ki bedo lagen bot Lubanga. Bedo ma wagene ma lubbe ki jami maraco ma tye ka timme i kare-ni yomo cwiny Lubanga.​—Carolok 27:11.

Kwo ma Tyen Lokke Tye pi Naka

Tim jami ducu ma mitte wek i pwony jami mapol madok i kom Lubanga kacel ki yubbe. Yecu Kricito owaco ni: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.” (Jon 17:3) Ka Lubanga bicobo yubbe mukwongo pi lobo, jo ma lugen gibinongo mit pa kwo kit ma Jehovah onongo oyubo kwede con pigi—“kwo ma pe tum” i paradic i lobo. Ci kwo ada bibedo ki tyen lokke dok me yengo.​—Jabuli 145:16.

In itwero nongo ngec ma Yecu oloko pire ni ki kwene? Ki i lok pa Lubanga, Baibul. Ka imito nongo kony me timo man, bed agonya me coyo waraga bot jo ma gucoyo magajin man. Gibibedo ki yomcwiny me cwalo ngat mo wek okonyi me pwonyo gin ma Baibul ada pwony.