Sarong Makahulogan na Buhay—Ngonyan Asin Sagkod Lamang

PUEDENG magkaigwa nin tunay na kahulogan an buhay mo dawa ngonyan. Paano? Paagi sa pagsunod sa madonong na mga prinsipyo sa Tataramon nin Dios, an Biblia. Siyasaton niato an pira sana kaiyan.

PRINSIPYO SA BIBLIA: “Mayong bagay na orog karahay,” an isinurat ni Hadeng Salomon, kundi na an tawo “magkakan asin maginom, asin an saiyang kalag makahiling kan karahayan kan saiyang hinigosan.”—PARAHULIT 2:24.

Linalang kita tanganing makontento sa kapakipakinabang na mga gibo. Dawa sa pinakamasakit na kamugtakan, puede kang makontento maski ngonyan paagi sa mahigos asin onestong pagtrabaho.

PRINSIPYO SA BIBLIA: “Orog pang mapalad an nagtatao ki sa nagaako.”—GUIBO 20:35.

Napatunayan nin dakol na an paggibo nin mga bagay-bagay para sa iba—halimbawa, pagtao kan saindang kosog asin panahon tanganing tabangan an iba kun may kasakitan—nakakakontento nanggad asin nakakadagdag sa tunay na kahulogan kan buhay ninda. “Dai mo ipagsayuma an karahayan sa tawong nangangaipo kaiyan,” an isinurat ni Salomon, “kun makakaya mong gibohon iyan.”—Talinhaga 3:27, BPV. *

Isip-isipa an halimbawa ni Ralph. Pakaretiro sa trabaho, inibanan nia an saiyang agom sa pambilog na panahon na Kristianong ministeryo. Kada bulan, dakol na oras an ginagamit kan kada saro sa sainda sa ministeryo, na nagsasakripisyo sa pagtotokdo sa iba dapit sa Biblia. “Kun minaabot kami sa harong  pagkabanggi, pagal kami bako sanang huli sa paggurang, kundi sa pagtao man kan samong bilog na kosog sa paglilingkod sa satong Ama sa langit,” an sabi ni Ralph. “Marahay na kapagalan iyan!” Maogma sinda huling nakasentro an saindang buhay sa pagtao.

PRINSIPYO SA BIBLIA: “An katood namomoot sa gabos na panahon, asin tugang siyang minadamay sa oras nin kasakitan.”—TALINHAGA 17:17, BPV.

Mas makakayanan an mga problema kun an saro may kadamay. Oyon sa parasurat na Ingles na si Francis Bacon, “an kinaban garo desierto” para sa mga mayong tunay na katood. An pagkaigwa nin tunay na mga katood—asin pagigin marahay na katood—makakatabang sa saimo na mas makayanan an mga problema; iyan puedeng magin nakakaogma asin nakakakontento.

PRINSIPYO SA BIBLIA: “Maogma an mga nakakamate kan saindang espirituwal na pangangaipo.”—MATEO 5:3, NW.

Sinabi ni Jesus an sarong mahalagang marhay na kahagadan kun gusto mong maeksperyensiahan an kaotoban kan mga panuga nin Dios—midbidon asin panigoan an saimong “espirituwal na pangangaipo.” Bakong arog nin mga hayop, may natural na pangangaipo kitang masabotan an kahulogan asin katuyohan nin buhay. Si Jehova Dios sana an makakapanigo sa pangangaipong iyan, asin ginigibo nia iyan paagi sa Biblia. Arog kan naheling niato sa sinundan na artikulo, ihinahayag kan Biblia an katuyohan nin Dios para sa daga. Sinasabi kaiyan sa sato kun taano ta yaon kita digdi, kun taano ta grabe an pagsakit, asin kun ano an inaasahan sa sato nin Dios. An pakasabot sa siring na mga katotoohan sa Biblia mahalagang marhay tanganing magin makahulogan asin nakakakontento an satong buhay. Maogma an mga nagtatao nin panahon na pag-adalan an Biblia asin nag-aaplikar kan saindang nanonodan. Taano? Huli ta paagi kaiyan, napapatalubo ninda an may pagtitiwalang relasyon sa satong Kaglalang, an “maogmang Dios,” si Jehova.—1 Timoteo 1:11, NW.

PRINSIPYO SA BIBLIA: “Girumdoma an saimong Kaglalang . . . bago umabot an panahon nin kapurisawan asin an mga taon na kamo masabi, ‘Mayo akong maheling na katuyohan sa mga iyan.’”—PARAHULIT 12:1, THE NEW ENGLISH BIBLE.

Mahalaga sa sato gabos an sadol ni Hadeng Salomon sa mga hoben, na tibaad dai pa narerealisar an mga kapahamakan na puedeng mapaatubang sa sainda. Ipokus an buhay mo sa saimong Kaglalang. Iyan an matao nin tunay na katuyohan sa buhay mo. Likayan an kaisipan na ini: “Magkarakan asin magirinom kita, ta sa aga magagadan kita.” (1 Corinto 15:32) Kun eenoton mo an Dios, an mga bagay-bagay ‘magigin marahay’ para sa saimo, an sabi kan Parahulit 8:12.

 Napatunayan iyan nin sarong babae na an ngaran Wendi. Kan sia hoben pa, sia asin an tugang nia nag-adal nin Kastila tanganing magbalyo sinda sa Dominican Republic, na duman mas dakula an pangangaipo sa mga parahulit kan maogmang bareta kan Biblia. “Dakol kaming isinakripisyo tanganing makapaglingkod sa lugar na may pangangaipo, alagad ogmahon nanggad kami kaidto. Dai ko iriribay sa ano man na bagay an anom na bulan na idto! Huli sa mga bendisyon na inako mi, sulit nanggad an sakripisyo mi.”

An Kaimbodan sa Dios Nakakatabang na Magin Makahulogan an Buhay

An pagpatalubo nin marahay na relasyon ki Jehova puedeng makadagdag sa kahulogan kan saimong buhay sa espesyal na marhay na paagi. Paano? Dai sana inimpluwensiahan ni Satanas si Adan asin Eva na magrebelde sa pamamahala nin Dios, kundi pinalataw man nia na mayo nin makakapagdanay na maimbod sa Dios kun binabalo. (Job 1:9-11; 2:4) Makakatabang ka na patunayan na putikon si Satanas! Paano? Paagi sa pagdanay na maimbod sa Dios, pagkuyog sa mga prinsipyo nia, asin pagpaheling na minimidbid mong si Jehova sana an may deretso na sabihon sa sato kun ano an marahay asin maraot.—Kapahayagan 4:11.

Tibaad kaipuhan tang tagalan an mga kadepisilan kun gusto niatong mamuhay nin tanos. Dai na daw magigin makahulogan an satong buhay huli sa kadepisilan na iyan? Bueno, imahinara na pinapakaraot nin sarong maraoton na kaiwal an satong namomotan na katood o kapamilya. Kun gibohan kita nin maraot kan satong kaiwal huli sa pagdepensa niato sa ngaran kan namomotan ta, an buhay daw niato bako nang makahulogan? Siempre dai! Maoogma pa ngani kitang tagalan an kadepisilan para sa ngaran nia. Kapareho iyan nin pagdanay na maimbod sa Dios. An kaimbodan niato sa ibong kan presenteng maraot na mga kamugtakan talagang nagpapaogma sa puso nin Dios.—Talinhaga 27:11.

Sarong Makahulogan na Buhay Sagkod Lamang

Kun siring, gibohon mong obheto na pag-adalan an gabos na puede mong manodan dapit sa Dios asin sa katuyohan nia. Si Jesu-Cristo mismo nagsabi: “Ini iyo an buhay na dai nin katapusan, na sinda makamidbid saimo, na ika sana an tunay na Dios, asin ki Jesu-Cristo na saimong sinogo.” (Juan 17:3) Kun otobon na nin Dios an saiyang orihinal na katuyohan para sa daga, kakamtan kan maimbod na mga tawo an gustong itao ni Jehova sa sainda sa kapoonpooni—an “buhay na dai nin katapusan” sa paraisong daga. Dangan an buhay magigin makahulogan asin nakakakontento nanggad.—Salmo 145:16.

Paano mo mamimidbid an Dios asin si Jesus, arog kan sinabi ni Jesus? Paagi sa ipinasabong na Tataramon nin Dios, an Biblia. Kun kaipuhan mo nin tabang dapit digdi, dai ka mag-alangan na sumurat sa kagpublikar kan magasin na ini. Maoogma sindang mag-areglo na may magtabang sa saimo na manodan kun ano man nanggad an itinotokdo kan Biblia.

[Nota sa Ibaba]