Kuti Mwaba ne Nsansa Pali ino Nshita na ku Ciyayaya

KUTI mwaba ne nsansa na pali ino ine nshita. Finshi mufwile ukucita pa kuti mube ne nsansa? Mufwile ukulakonka amashiwi ayasuma ayaba mu Cebo ca kwa Lesa, Baibolo. Lekeni tulandeko fye pa mashiwi yamo ayaba mu Baibolo.

IFYO BAIBOLO YALANDA: Imfumu Solomone yalembele ukuti: “Ku muntu takwaba icisuma icacila pa kulya no kunwa no kusekelamo mu kubombesha kwakwe.”—LUKALA MILANDU 2:24.

Lesa atupangile ukuti tuleipakisha ukulabomba imilimo iisuma. Nangu ni lintu ifintu fyafishe, kuti mwaba ne nsansa na pali ino ine nshita nga mulebombesha kabili muli abafumacumi.

IFYO BAIBOLO YALANDA: “Mwaba insansa ishingi mu kupeela ukucila ishaba mu kupokelela.”—IMILIMO 20:35.

Abengi basanga ukuti ukubomfya inshita yabo na maka yabo ku kwafwilisha abalecula kulalenga baba ne nsansa. Solomone alembele ukuti: “Witana ifisuma ku balefikabila, ilyo uli na maka ya kubapeela.”—Amapinda 3:27.

Ku ca kumwenako, umfweni ifyacitile ba Ralph. Ilyo bapokele penshoni, batampile ukubomba umulimo wa kushimikila imbila nsuma inshita yonse uwalebomba abakashi babo. Balabomba ama-awala ayengi cila mweshi  ukusambilisha bambi Baibolo. Ba Ralph batile: “Nga twabwelela ku ng’anda icungulo, tulanaka, te pa mulandu wa kuti tuli bakote, lelo ni co tulabombesha mu mulimo wa kwa Shifwe wa ku muulu. Nangu ca kutila tulanaka, tulaba ne nsansa nga nshi!” Ba Ralph na bena mwabo baliba ne nsansa pantu babika amano ku kwafwilisha bambi.

IFYO BAIBOLO YALANDA: “Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.”—AMAPINDA 17:17.

Calyanguka ukushipikisha amafya nga kuli ifibusa ifya kumwafwa. Umungeleshi uulemba amalyashi, Francis Bacon, alembele ukuti ukukanakwata ifibusa fya cine cine, “kwaba kwati muntu uulubile mu matololo.” Ukukwata ifibusa fya cine cine, no kuba icibusa icisuma, kuti kwalenga amafya yalemwangukila; kuti kwamulenga ukuba ne nsansa.

IFYO BAIBOLO YALANDA: “Balipaalwa abaishiba ukuti balakabila ifya kwa Lesa.”—MATEO 5:3.

Yesu alilandile ico tukabila sana pa kuti twingaipakisha amalayo ya kwa Lesa, atile tufwile ukwishiba no kulacita “ifya kwa Lesa.” Fwe bantu twalipusana ne nama, pantu ifwe tulafwaisha ukwishiba umulandu twabela pano calo. Ni Yehova Lesa fye e wingatwafwa ukwishiba ifya kwa Lesa, kabili acita ifi ukubomfya Icebo cakwe, Baibolo. Nge fyo twacimona mu cipande cifumineko, Baibolo ilatweba umulandu Lesa apangile icalo. Ilatweba ico Lesa atupangile, umulandu kwabela amacushi, ne fyo Lesa enekela ifwe ukulacita. Ukwishiba ici cine ca mu Baibolo kwalicindama sana pantu kuti kwalenga twaba ne nsansa mu bumi. Ababika amano ku kusambilila Baibolo no kulakonka ifyo balesambilila balaba ne nsansa. Mulandu nshi? Pantu balaba ifibusa fya kwa Kabumba wesu Yehova “Lesa uwa nsansa.”—1 Timote 1:11.

IFYO BAIBOLO YALANDA: “Ibukisha Kabumba obe . . . ilyo inshiku sha bubi tashilaisa, nelyo ilyo imyaka tailafika ilyo ukatila: ‘Nshilesangamo insansa’”—LUKALA MILANDU 12:1.

Ifyo Imfumu Solomone yafundile abacaice, abafilwa limo ukwiluka ukuti kuti baponenwa na mafya, fyalicindama na kuli ifwe bonse. Mulebika amano ku kucita ifyo Kabumba wenu amweba. E fikamulenga ukuba ne nsansa mu bumi. Mwilakonkelela abatila: “Tulye no kunwa, pantu mailo tukafwa.” (1 Abena Korinti 15:32) Pali Lukala Milandu 8:12 patila nga mulebika Lesa pa ntanshi muli fyonse ifyo mulecita ifintu ‘fikamuwamina.’

 Umukashana we shina lya kuti Wendi alishininkisha ukuti aya mashiwi ya cine. Ilyo ali umwaice, ena na nkashi inankwe basambilile iciSpanish pa kuti bengakuukila ku Dominican Republic, ukushali aba kushimikila imbila nsuma abengi. Atile: “Twali-ipuswile ku fintu ifingi pa kuti tuyebombela ukushali aba kushimikila abengi, lelo twali-ipakishe nga nshi. Takwali cimbi ico nali no kucita muli iyi myeshi 6 icali no kucindama ukucila ukuyabombela ukushaba aba kushimikila abengi! Amapaalo twaipakishe yalifulile sana ukucila ifyo twaipuswileko.”

Ukuba uwa Cishinka Kuli Lesa Kulaleta Insansa

Ukuba icibusa ca kwa Yehova kuti kwalenga mwaba ne nsansa mu nshila iyaibela. Twalosha mwi? Ilyo Satana alengele Adamu na Efa ukupondokela Lesa, alandile no kuti takwingaba uwingatwalilila ukuba ne cishinka kuli Lesa nga ale-eshiwa. (Yobo 1:9-11; 2:4) Na imwe bene kuti mwashinina Satana ukuti wa bufi! Kuti mwamushinina shani? Nga mwatwalilila ukuba ne cishinka kuli Lesa, ukulakonka ifyo Baibolo ilanda, no kulalanga ukuti mwasumina ukuti Yehova e wakwata insambu sha kutweba icisuma ne cibi.—Ukusokolola 4:11.

Pa kutwalilila ukucita icalungama, nalimo kuti twapita mu mafya ayengi. Bushe ayo mafya kuti yalenga ukuti twiba ne nsansa? Natulangilile: Elenganyeni ukuti kuli umuntu uulelanda ifyabipa pali cibusa wesu uo twatemwa nelyo lupwa lwesu. Nga ca kuti ukupokololako cibusa wesu nelyo lupwa kuti kwatuletela amafya, bushe ico kuti calenga ukuti twiba ne nsansa? Awe nakalya! Kuti twashipikisha amafya twingapitamo. E fyo caba na pa kutwalilila ukuba uwa cishinka kuli Lesa. Na kuba, ukutwalilila ukuba aba cishinka na lintu tulecula kulalenga umutima wa kwa Lesa ukusekelela.—Amapinda 27:11.

Kuti Mwaba ne Nsansa ku Ciyayaya

Pampamineni pa kusambilila pali Lesa na pa kufwaya kwakwe. Yesu Kristu atile: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” (Yohane 17:3) Ilyo Lesa akafikilisha ukufwaya kwakwe pano calo, abantu ba cishinka bakaipakisha “umweo wa muyayaya” mu paradaise pano isonde, nge fyo Yehova alefwaya pa kubala. Pali ilya nshita abantu bakaba ne nsansa nga nshi.—Amalumbo 145:16.

Ni kwi twingasanga uku kwishiba uko Yesu alandilepo? Ni mu Cebo ca kwa Lesa, Baibolo. Nga kuti mwatemwa aba kumwafwa ukusambilila Baibolo, lembeleni ku balemba ino magazini. Bakatemwa sana ukumufwaila aba kumwafwa ukusambilila ifyo Baibolo isambilisha.