En lavi ki fer sans​—La konmela e pour touzour

OU LAVI i kapab fer sans menm la konmela. Ki mannyer? Si ou swiv sa bann prensip saz ki ganny trouve dan Parol Bondye, Labib. Annou egzamin zis detrwa sa bann prensip.

PRENSIP LABIB: Lerwa Salomon ti ekrir: “Napa nanryen pli meyer pour en zonm ki i manze e menm bwar e vwar rezilta akoz i’n travay dir.”​—EKLEZYAST 2:24.

Nou’n ganny kree pour trouv plezir dan en travay satisfezan. Menm dan bann sirkonstans pli difisil, ou lavi i kapab ase satisfezan la konmela si ou travay dir e onnetman.

PRENSIP LABIB: “I annan plis lazwa pour donnen ki pour resevwar.”​—AKT 20:35.

Bokou in vwar ki kan zot fer keksoz pour lezot, setadir donn zot letan ek lenerzi pour ed lezot dan letan difisil, sa i anmenn plis byenfe e fer zot lavi annan plis sans. Salomon ti ekrir: “Pa refiz sa ki byen bann ki merite, ler i dan pouvwar ou lanmen pour fer li.”​—Proverb 3:27.

Get legzanp Ralph. Apre ki i ti’n pran son retret, i ti konmans pres a plen tan parey son madanm. Zot tou le de zot ti pas en bon pe letan sak mwan pour prese, zot ti donn tou pour ansenny lezot Labib. Ralph i dir: “Ler  nou ariv dan lakour aswar, nou pa zis fatige akoz nou pe vyeyi, me akoz nou’n donn nou meyer pour servi nou Papa ki dan lesyel. I sa bon kalite lafatig.” Ansanm avek son madanm, zot ere akoz zot kontan donnen.

PRENSIP LABIB: “En vre konpanyon i kontan ou toultan, e i en frer ki’n ne pour letan ladetres.”​—PROVERB 17:17.

I pli fasil pour fer fas avek en sityasyon kan ou koz avek lezot. Francis Bacon, en filozof Angle ti ekrir ki pour bann dimoun ki napa en vre zanmi, “lemonn i parey en dezer.” Kan nou annan bann bon zanmi e nou menm nou vin sa bon zanmi pour lezot, sa i kapab fer lavi pli fasil, pli gou e satisfezan.

PRENSIP LABIB: “Byennere bann ki pov an-espri, [oubyen “konsyan zot bezwen spirityel,” NW] akoz Rwayonm Lesyel i pour zot.”​—MATYE 5:3.

Atraver sa parol, Zezi ti pe montre ki i vreman enportan pour rekonnet e konble ou “bezwen spirityel” si ou anvi benefisye avek bann promes Bondye. Kontrerman avek bann zannimo, nou annan sa dezir dan nou pour konpran sans ek vre bi lavi. Zis Zeova ki kapab konble sa bezwen e i fer sa atraver son Parol, Labib. Parey nou ti vwar dan lartik avan, Labib i montre nou ki plan Bondye pour later. I dir nou akoz nou la lo later, akoz i annan sitan kantite soufrans e ki Bondye i ekspekte avek nou. Ler nou konpran bann lansennyman baze lo Labib, sa i vreman enportan pour nou viv en lavi ki fer sans e ki satisfezan. Bann dimoun ki fer letan pour etidye Labib e aplik sa ki zot aprann i ere. Akoz? Parski zot annan plis konfyans dan nou Kreater, “sa Bondye ere.”​—1 Timote 1:11, NW.

PRENSIP LABIB: “Mazin ou Kreater . . . avan bann letan difisil i arive e bann lannen kot ou pou dir: ‘Mon pa vwar okenn sans dan zot.’”​—EKLEZYAST 12:1, THE NEW ENGLISH BIBLE.

Konsey Lerwa Salomon pour bann zenn, ki petet parler pa aksepte ki nou kapab fer fas avek bann maler dan lavi, i vreman enportan pour nou tou. Nou Kreater i devret okip premye plas dan nou lavi. Sanmenm ki pou fer ou lavi annan en bi. Pa bezwen annan sa latitid: “Annou manze e bwar, parski demen nou pou mor.” (1 Korentyen 15:32) Si ou met Bondye premye plas dan ou lavi, “keksoz pou mars byen” pour ou, parey Eklezyast 8:12 i dir.

 En fiy ki apel Wendi ti dekouver ki sa i vre. Kan i ti ankor zenn, zot de son ser zot ti aprann Espanyol pour ki zot kapab al Repiblik Dominiken kot i annan plis bezwen pour anons bon nouvel sorti dan Labib. Zot dir: “Nou’n fer en kantite sakrifis pour servi kot i annan plis bezwen, me nou’n pas en moman vreman merveye. Mon pa ti pou zanmen ranplas sa sis mwan avek okenn lezot keksoz! Bann benediksyon ki nou’n gannyen ti plis ki sa sakrifis ki nou ti bezwen fer.”

Fidelite anver Bondye i fer lavi annan en sans

En bon relasyon avek Zeova i kapab fer ou annan en lavi ki fer sans dan en fason spesyal. Ki mannyer? Satan pa ti zis fer Adan ek Ev rebel kont dominasyon Bondye, me i ti osi dir ki napa personn ki ti pou reste fidel anver Bondye dan bann leprev. (Zob 1:9-11; 2:4) Ou kapab prouve ki Satan i en manter! Dan ki fason? Si ou reste fidel anver Bondye, swiv son bann prensip e demontre ki ou rekonnet drwa Zeova pour dir nou kwa ki byen e kwa ki mal.​—Revelasyon 4:11.

Parler, nou bezwen fer fas avek difikilte si nou anvi swiv sa bon semen. Eski sa bann difikilte pou fer nou viv en lavi ki napa en sans? Be, meton en lennmi visye pe koz lalang lo enn nou bon zanmi oubyen fanmir. Si ler nou pe defann repitasyon sa dimoun, nou eksperyans serten difikilte avek sa lennmi, eski sa pou fer nou lavi napa en sans? Ditou! Nou ti pou vreman pare pour fer fas avek sa difikilte pour defann li. I parey kan nou reste fidel avek Bondye. Nou fidelite malgre move kondisyon sa lemonn i fer leker Zeova rezouir.​—Proverb 27:11.

En lavi ki fer sans pour touzour

Alor, fer li ou bi pour aprann tou sa ki ou kapab lo Bondye ek son plan. Zezi Kri li menm ti dir: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Kan Bondye pou akonpli son plan ki i ti annan o konmansman pour later, bann imen fidel pou ganny sa ki Zeova ti’n plàn pour zot, setadir “lavi eternel” dan Paradi lo later. Sa letan, lavi pou fer sans e i pou vreman satisfezan.​—Psonm 145:16.

Kote ou kapab trouv sa konnesans ki Zezi ti koz lo la? Dan Labib li menm. Si ou ti a kontan led pour fer sa, santi ou alez pour ekrir Temwen Zeova. Zot pou byen kontan pour fer laranzman pour en dimoun ed ou konn sa ki Labib i vreman dir.