Bula Vakainaki ena Gauna qo me Tawamudu

E RAWA ni vakainaki dina na bula ena gauna sara ga qo. E rawa vakacava qori? Ni muri na ivakavuvuli yaga ena Vosa ni Kalou, na iVolatabu. Meda raica mada eso.

IVAKAVUVULI ENA IVOLATABU: A vola o Tui Solomoni ni “sa sega tale na ka e vinaka” vua na tamata “ka me kana ga ka gunu, ka vakaceguya na yalona e na kena vinaka ni nona cakacaka.”—DAUVUNAU 2:24.

Eda buli meda marautaka na cakacaka e yaga. Ke dredre mada ga na ituvaki, o rawa ni marautaka na bula ena gauna qo ni o gugumatua qai daudina ena nomu cakacaka.

IVAKAVUVULI ENA IVOLATABU: “E marau vakalevu o koya e solia na ka, vakalailai o koya e taura na ka.”—CAKACAKA 20:35.

Era raica e levu ni yaga qai vakainaki dina na nodra bula nira cakava na ka ena vukudra eso tale—kena ivakaraitaki nira solia na nodra gauna kei na igu mera veivuke ena gauna ni leqa. A vola o Solomoni: “Mo kakua ni bureitaka na ka vinaka vei ira e dodonu me nodra, ni sa rawa vei iko mo cakava.”—Vosa Vakaibalebale 3:27.

Raica mada na ivakaraitaki i Ralph. Ni cegu mai na nona cakacaka, a cakacaka vakaitalatala vakatabakidua kei watina. E vica vata na aua erau dau vakayagataka e veivula ena cakacaka vakaitalatala rau qai lomasoli me rau vakavulici  ira eso tale ena iVolatabu. E tukuna o Ralph: “Ni keirau lesu i vale ena yakavi, keirau sega wale ga ni oca ni keirau sa qase, keirau oca tale ga ni keirau solia kece na neirau igu ena veiqaravi vua na Tamai keirau vakalomalagi. Keirau oca ena cakacaka vinaka!” Erau marau vakaveiwatini ni ivakarau sara ga ni nodrau bula na soli ka.

IVAKAVUVULI ENA IVOLATABU: “Sa loloma tiko e na veigauna kece na wekana [“itokani dina,” NW] na tamata, ka sa vaka na tacina e na gauna ni rarawa.” —VOSA VAKAIBALEBALE 17:17.

Ena dredre mo walia na leqa ke o tiko taudua. A vola o Francis Bacon na dauvolavola ni Igiladi ni o koya e sega na nona itokani dina “e vaka e dua e sese tu e veikau.” Nira tiko na nomu itokani dina o qai itokani vinaka tale ga—o rawa ni walia na leqa o sotava; ena vinaka na nomu bula, o na marautaka tale ga.

IVAKAVUVULI ENA IVOLATABU: “Era marau o ira na kila nira gadreva na Kalou.”—MACIU 5:3.

E tukuna o Jisu na ka e bibi mo cakava mo marautaka kina na veika e yalataka na Kalou—mo kila ni o “gadreva na Kalou” qai cakava na ka e vinakati me rawa kina qori. Eda duidui vei ira na manumanu nida sucukaya mai na gagadre meda kila na ibalebale kei na inaki ni bula. O Jiova ga e rawa ni vukei keda, e cakava qori ena nona Vosa na iVolatabu. Eda raica ena ulutaga sa oti ni vakamacalataki ena iVolatabu na inaki ni Kalou me baleta na vuravura. E tukuna vei keda na vuna eda bula tiko kina, na vuna e levu kina na rarawa, kei na veika e vinakata na Kalou meda cakava. E bibi meda kila na ka dina qori ena iVolatabu me rawa ni vakainaki na noda bula, meda marautaka tale ga. Era na marau o ira era tuvanaka na gauna mera vulica kina na iVolatabu ra qai bulataka na ka era vulica. Na cava na vuna? Era sa bucina e dua na veiwekani voleka kei na Dauveibuli, na “Kalou mamarau” o Jiova.—1 Timoci 1:11.

IVAKAVUVULI ENA IVOLATABU: “Nanumi koya e Buli iko . . . ni bera ni yaco na leqa kei na veiyabaki o na kaya kina ‘sa sega na kena yaga.’”—DAUVUNAU 12:1, THE NEW ENGLISH BIBLE.

E yaga vei keda kece na ivakasala i Tui Solomoni vei ira na itabagone, era na rairai lecava nira se gone ni rawa ni tarai keda na leqa. E bibi mo vakaliuca na Dauveibuli ni na vakainaki dina kina na nomu bula. Me kua ni tiko vei iko na rai qo: “Meda kana ga, da gunu, nida na mate nimataka.” (1 Korinica 15:32) E tukuni ena Dauvunau 8:12 ni na “vinaka” na nomu bula ke o vakaliuca na Kalou.

 E vakadinadinataka qori na goneyalewa o Wendi. Ni se gone, erau vuli vosa vakaSipeni kei tacina me rau rawa ni toki ina Dominican Republic, e gadrevi vakalevu kina na veivuke me vunautaki na itukutuku vinaka ena iVolatabu. “Keirau vakuai keirau ena levu na ka me keirau lai veiqaravi kina ena vanua e gadrevi kina na veivuke, ia dua na ka na neirau marau. Au sega ni veivutunitaka na ono na vula keirau cakava kina qori! Na veivakalougatataki keirau vakila e uasivia na veika keirau vakuai keirau kina.”

Vakainaki na Bula Nida Yalodina Vua na Kalou

Ena vakainaki tale ga na nomu bula ni o bucina e dua na veiwekani vinaka kei Jiova. E rawa vakacava qori? A vakamuai Atama kei Ivi o Setani me rau saqata na veiliutaki ni Kalou, a tukuna tale ga ni sega ni dua ena yalodina tiko ga vua na Kalou ke vakatovolei. (Jope 1:9-11; 2:4) O rawa ni vakaitavi ena nona vakalasui o Setani! Ena sala cava? Ni o yalodina tiko ga vua na Kalou, talairawarawa ena nona ivakavuvuli, qai vakaraitaka ni o vakadinata ni o Jiova ga e dodonu me lewa vei keda na veika e vinaka kei na veika e ca.—Vakatakila 4:11.

Eda na rairai sotava eso na ituvaki dredre nida saga tiko ga meda cakava na ka dodonu. Kena ibalebale beka qori ni sa na sega ni vakainaki na noda bula? Vakasamataka mada e dua na meca e vakaucacataka e dua na noda itokani voleka se lewe ni noda vuvale. Sa na sega beka ni vakainaki na noda bula ke vakararawataki keda na meca qori nida valataka na kena irogorogo o koya eda lomana? Sega ni dina qori! Eda na vosota ena marau na veika rarawa me vinaka tale kina na kena irogorogo. E va tale ga qori na noda yalodina tiko ga vua na Kalou. Ena vakamarautaki koya vakalevu na noda yalodina tiko ga ena ituvaki ca ni bula qo.—Vosa Vakaibalebale 27:11.

Vakainaki na Bula me Tawamudu

E bibi mo cakava na ka kece o rawata mo vulica kina na veika me baleta na Kalou kei na nona inaki. A tukuna o Jisu Karisito: “Ena rawata na bula tawamudu o koya e vulica tiko ga na veika e baleti kemuni na Kalou dina duadua ga, kei Jisu Karisito oni tala mai.” (Joni 17:3) Ni vakayacora na Kalou na nona inaki taumada me baleta na vuravura, era na marautaka o ira na yalodina na ka e nakita taumada o Jiova me baleti ira—na “bula tawamudu” ena vuravura parataisi. Ena vakainaki dina qai marautaki na bula ena gauna qori.—Same 145:16.

O na vulica e vei na ka e tukuna o Jisu? Ena Vosa uqeti ni Kalou na iVolatabu. Ke o vinakata mo vukei, o rawa ni volavola ina vanua e tabaki kina na mekesini qo. Ena tuvanaki me gole yani e dua me vukei iko mo kila na ka e kaya na iVolatabu.