Makagunggona a Biag​—Ita ken iti Agnanayon

MABALIN a maaddaanka itan iti makagunggona a biag. Kasano? Babaen ti panangannurotmo kadagiti prinsipio a masarakan iti Sao ti Dios, ti Biblia. Usigentayo ti sumagmamano kadagita.

PRINSIPIO TI BIBLIA: “Iti maysa a tao awanen ti nasaysayaat ngem iti pannanganna ket pudno nga uminum ken ipakitana iti kararuana ti naimbag gapu iti napinget a panagtrabahona,” insurat ni Ari Solomon.​—ECLESIASTES 2:24.

Naparsuatayo a mangbirok iti makagunggona a trabaho. Uray iti nakarigrigat a kasasaad, makariknaka latta iti pannakapnek uray ita no nagaget ken napinget ti panagtrabahom.

PRINSIPIO TI BIBLIA: “Ad-adu ti kinaragsak iti panangted ngem iti panangawat.”​—ARAMID 20:35.

Adu ti nakapaneknek a ti panangusarda iti tiempo ken pigsada a tumulong iti sabsabali ket mangyeg iti kinaragsak ken pudno a pannakapnek. “Saanmo a medmedan ti naimbag kadagidiay addaan karbengan,” insurat ni Solomon, “no adda iti pannakabalin ta imam ti panangaramid iti dayta.”​—Proverbio 3:27.

Usigem ti kapadasan ni Ralph. Idi nagretiron, kinaduaanna ni baketna iti amin-tiempo a Nakristianuan a ministerio. Binulan a busbusbosenda ti adu nga oras iti ministerio,  nga isursuroda ti Biblia iti sabsabali. “Nabannogkamin no kasta nga agawidkami iti rabii, saan laeng a gapu ta lakay ken baketkamin, no di ket gapu ta impanmi ti amin a kabaelanmi nga agserbi iti nailangitan nga Amatayo,” kuna ni Ralph. “Makaparagsak dayta!” Naragsak dagitoy nga agassawa ta naipamaysa ti biagda iti panangtulong iti sabsabali.

PRINSIPIO TI BIBLIA: “Ti pudno a kadua agayat iti isuamin a tiempo, ken ti kabsat a mayanak no adda rigat.”​—PROVERBIO 17:17.

Nalaklaka nga ibturan dagiti rigat no adda kaduam. Kinuna ti Ingles a mannurat a ni Francis Bacon nga “arigna maysa a let-ang ti lubong” kadagidiay awanan iti pudno a gagayyem. No addaanka iti pudno a gagayyem, ken no agbalinka a naimbag a gayyem, nalaklakam nga ibturan ti pakarigatan, ket agbalin a makapnek ti biag.

PRINSIPIO TI BIBLIA: “Naragsak dagidiay sipapanunot iti naespirituan a kasapulanda.”​—MATEO 5:3.

Imbatad ni Jesus a nasken a matarusan ken penkentayo dagiti “naespirituan a kasapulan[tayo]” no kayattayo ti magunggonaan kadagiti kari ti Dios. Saan a kas kadagiti animal, masapul a maawatantayo ti kaipapanan ken panggep ti biag. Ni laeng Jehova a Dios ti makapennek iti dayta babaen iti Saona, ti Biblia. Ipakaammo ti Biblia ti panggep ti Dios iti daga, kas naammuantayon kadagiti immuna nga artikulo. Nailanad sadiay no apay nga addatayo ditoy, no apay a kasta unay ti panagsagaba ti tao, ken no ania ti kalikaguman ti Dios kadatayo. Nasken a maawatantayo dagita tapno agbalin a makagunggona ken makapnek ti biagtayo. Naragsak dagidiay mangadal iti Biblia ken mangyaplikar iti nasursuroda. Apay? Agsipud ta mapabileg ti panagtalekda iti Namarsua a ni Jehova, “ti naragsak a Dios.”​—1 Timoteo 1:11.

PRINSIPIO TI BIBLIA: “Lagipem ti Namarsuam . . . sakbay a dumteng ti tiempo ti riribuk ken dagiti tawen inton kunaem, ‘Awan makitak a panggep dagita.’”​—ECLESIASTES 12:1, THE NEW ENGLISH BIBLE.

Agaplikar kadatayo amin ti balakad ni Ari Solomon para kadagiti agtutubo a mabalin a saan pay a makaammo iti adu a parikut iti biag. Naisentro koma ti biagmo iti panagdayaw iti Namarsua. Dayta ti mangyeg kenka iti makagunggona a biag. Liklikam ti ugali a: “Mangan ken uminumtayo, ta inton bigat mataytayo.” (1 Corinto 15:32) No iyun-unam ti Dios, ‘naimbagto ti pagbanagam,’ kuna ti Eclesiastes 8:12.

 Napaneknekan ti babai nga agnagan Wendi nga agpayso dayta. Idi agtutubo pay, nagadalda nga agkabsat iti lenguahe nga Espaniol tapno tumulongda idiay Dominican Republic, nga agkasapulan unay iti manangikaskasaba iti naimbag a damag a linaon ti Biblia. “Adu ti sakripisiomi iti panagserbimi iti lugar a dakkel ti panagkasapulan, ngem natagiragsakmi dayta. Awan pangisukatak iti innem a bulan a panagserbimi sadiay! Ad-adu nga amang ti bendision nga inawatmi ngem kadagiti sakripisiomi.”

No Kasano Kapateg ti Kinasungdo iti Dios

No adda naimbag a relasionmo ken Jehova, agbalin a makagunggona ti biagmo iti naisangsangayan a pamay-an. Kasano? Saan laeng nga intuggod ni Satanas da Adan ken Eva nga agsukir iti Dios, no di ket imparipiripna met nga awan ti agtalinaed a nasungdo iti Dios no masuot. (Job 1:9-11; 2:4) Kasano a mapaneknekam nga ulbod ni Satanas? Agtalinaedka a nasungdo iti Dios, annurotem dagiti prinsipiona, ken bigbigem a ni Jehova laeng ti addaan kalintegan a mangikeddeng iti naimbag ken dakes para kadatayo.​—Apocalipsis 4:11.

Mabalin nga adu a rigat ti kasapulan nga ibturantayo tapno masurottayo ti umiso. Ngem agbalinto kadi a saan a makagunggona ti biag gapu kadagita a rigat? Bueno, ipapantayon nga adda dakes a kabusor a mangpadpadakes iti patpatgentayo a gayyem wenno kapamilia. No makapasartayo iti rigat gapu iti panangidepensatayo iti nagan dayta a patpatgen, awan kadin ti mamaay ti biagtayo? Siempre saan! Sisasaganatayo nga agibtur para iti patpatgentayo. Kasta met ti panagtalinaed a nasungdo iti Dios. Maragsakan ti Dios no agbalintayo a nasungdo iti laksid dagiti narigat a kasasaad.​—Proverbio 27:11.

Manayon a Makagunggona a Biag

Aramidem ngarud ti amin a kabaelam a mangammo iti Dios ken kadagiti panggepna. Kinuna a mismo ni Jesu-Kristo: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Inton tungpalen ti Dios ti orihinal a panggepna ditoy daga, sagrapento dagiti matalek a tattao ti inranta ni Jehova para kadakuada​—ti “agnanayon a biag” iti paraiso a daga. Iti kasta, agbalinton a makagunggona ken makapnek ti biag.​—Salmo 145:16.

Pakasarakam iti pannakaammo nga imbaga ni Jesus? Iti naipaltiing a Sao ti Dios, ti Biblia. Mabalinmo ti agsurat kadagiti mangipabpablaak iti daytoy a magasin tapno matulongandaka. Sisasaganada a tumulong kenka a mangammo no ania a talaga ti isursuro ti Biblia.