Luzingu ya Mfunu Bubu Yai mpi Mvula na Mvula

NGE lenda vanda na luzingu ya mfunu ata bubu yai. Inki mutindu? Kana nge sadila minsiku yina kele na Ndinga ya Nzambi, Biblia. Bika beto tadila mwa ndambu na yo.

MUNSIKU YA BIBLIA: Ntotila Salomo kusonikaka nde: “Kima ya mbote ya muntu lenda sala kele kudia ti kunwa ti kumona kiese na bima ya yandi zwaka.”​—LONGI 2:24.

Nzambi kugangaka beto sambu beto vanda na kyese na nima ya kusala kisalu mosi ya mbote. Ata na nsi ya bampasi ya ngolo, nge lenda vanda na mwa kyese bubu yai na luzingu kana nge kesala kisalu ya ngolo mpi na masonga yonso.

MUNSIKU YA BIBLIA: “Kiese ke vandaka mingi na kupesa, kansi na kubaka kiese ke vandaka fioti.”​—BISALU 20:35.

Bantu mingi memonaka nde kusadila bankaka mambu mu mbandu, kupesa ntangu mpi ngolo na bo sambu na kusadisa bankaka na bantangu ya mpasi​—kenatilaka bo balusakumunu mpi kekumisaka luzingu na bo mfunu. Salomo kusonikaka nde: “Kubuya ve kusala mambote na bantu yina fweti baka yo, kana nge mona mpila.”​—Bingana 3:27.

Beto tadila mbandu ya Ralph. Na nima ya kubaka pansio, yandi vukanaka ti nkento na yandi na kisalu ya ntangu yonso. Bo vandaka kulutisa ntangu mingi konso ngonda na kisalu ya kusamuna, na kudipesaka na kulonga bankaka Biblia. Ralph ketuba nde: “Ntangu beto kevutukaka na nkokila, beto kelembaka ve kaka sambu beto mekuma bambuta,  kansi sambu beto kekudipesaka ya mvimba na kisalu ya Tata na beto ya zulu. Yo kele kulemba ya mbote mpenza!” Yandi ti nkento na yandi kevandaka na kyese sambu luzingu na bo mesimbamaka na kikalulu ya kukaba.

MUNSIKU YA BIBLIA: “Banduku [ya kyeleka] ke zolanaka konso ntangu, bampangi ke sadisanaka na ntangu ya mpasi.”​—BINGANA 17:17.

Yo lenda vanda pete na kukangila bampasi ntima ntangu nge kele ve nge mosi. Francis Bacon, filozofe mosi ya insi ya Angleterre kusonikaka nde sambu na bantu yina mekonda banduku ya kyeleka, “nsi-ntoto kele bonso nduku na bo yina mevila na ntoto ya zelo na zelo.” Kuvanda ti banduku ya kyeleka​—lenda sadisa nge na kumona nde luzingu mekonda kizitu mpi yo lenda vanda ya kitoko mpi ya kesepedisa.

MUNSIKU YA BIBLIA: “Kiese na bantu yina kele na nzala ya mambu ya kimpeve.”​—MATAYO 5:3, NW.

Yezu kutubilaka dyambu mosi ya mfunu yina nge fwete sala kana nge kezola kubaka mambote ntangu balusilu ya Nzambi talungana​—kuzaba mpi kulungisa ‘nzala na nge ya mambu ya kimpeve.’ Na kuswaswana ti bambisi, beto kebutukaka ti mpusa ya kuzaba mfunu ya luzingu mpi lukanu na yo. Kaka Yehowa Nzambi muntu lenda lungisa mpusa yango, mpi yandi kesalaka yo na nzila ya Ndinga na yandi, Biblia. Mutindu beto monaka yo na disolo yina meluta, Biblia kezabisaka beto lukanu ya Nzambi sambu na ntoto. Yo kezabisaka beto kikuma yina beto kele na ntoto, kikuma yina bampasi kele mingi, mpi mambu yina Nzambi kelombaka beto. Kubakisa bakyeleka ya Masonuku kele mfunu sambu nde luzingu na beto kuvanda ya mfunu mpi ya kesepedisa. Bantu yina kevandaka ti ntangu ya kulonguka Biblia mpi ya kusadila mambu yina bo kelongukaka kevandaka na kyese. Sambu na nki? Sambu bo kekumaka na bangwisana ya mbote mpenza ti Ngangi na beto, Yehowa, ‘Nzambi ya kiese.’​—1 Timoteo 1:11.

MUNSIKU YA BIBLIA: “Beno yindula Muntu yina salaka beno . . . ntangu bilumbu ya mpasi me kwisa ntete ve ti bamvula ya beno ta tuba nde: ‘Mono kemona ve lukanu ya luzingu yai.’”​—LONGI 12:1.

Ndongisila yina Ntotila Salomo kepesa baleke, yina na kileke na bo lenda zaba ve bampasi yina luzingu kenataka, kele mfunu sambu na beto yonso. Tula Ngangi na nge na kisika ya ntete na luzingu na nge. Kusala mpidina tasala nde luzingu na nge kuvanda ti lukanu. Buya dibanza yai: “Beto dia, beto nwa, sambu mbasi beto [ta] fwa.” (1 Korinto 15:32) Longi 8:12 ketubaka nde kana nge tula Nzambi na kisika ya ntete “mambu yonso ta kwenda mbote” sambu na nge.

 Mwana-nkento mosi na zina ya Wendi, kumonaka nde dyambu yango kele kyeleka. Ntangu yandi vandaka leke, yandi ti leke na yandi ya nkento kulongukaka ndinga Espagnol sambu na kukwenda na République Dominicaine, kisika mpusa kuvandaka ngolo sambu na kusamuna nsangu ya mbote ya Biblia. Yandi ketuba nde: “Beto salaka bibansa ya mingi sambu na kukwenda kisika mpusa kuvandaka ngolo, kansi beto lutisaka ntangu ya mbote. Mambu yina beto salaka na nsungi ya bangonda sambanu kulutaka mambu yonso yina beto lendaka kusala! Balusakumunu yina beto bakaka kulutaka bibansa yina beto salaka.”

Kwikama na Nzambi Kekumisaka Luzingu Mfunu

Kusala bangwisana ya mbote ti Yehowa lenda sala nde luzingu na nge kuvanda na mfunu kibeni. Inki mutindu? Satana kupusaka kaka ve Adami ti Eva na kukolama na luyalu ya Nzambi, kansi yandi monisaka mpi nde ata muntu mosi ve zolaka kubikala ya kwikama na Nzambi na nsi ya bampasi. (Yobi 1:9-11; 2:4) Nge lenda sala mambu sambu na kumonisa nde Satana kele muntu ya luvunu! Inki mutindu? Na kubikalaka ya kwikama na Nzambi, na kulemfukilaka minsiku na yandi, mpi na kumonisaka nde nge kendimaka nde Yehowa kele ti nswa ya kuzabisa beto mambu ya mbote mpi ya mbi.​—Kusonga 4:11.

Kana beto kezola kulanda luzingu mosi ya mbote, yo lenda lomba nde beto kanga-ntima na bampasi. Keti bampasi yina tasala nde luzingu na beto kukonda mfunu? Yindula nde, mbeni mosi metuba mambu ya luvunu sambu na nduku to muntu mosi ya dibuta yina beto kezolaka mingi. Kana mbeni yango kenyokula beto sambu beto kekotila muntu yango, keti yo tapusa beto na kumona nde luzingu kele ve mfunu? Ve! Beto takangila dyambu yina ntima na kyese yonso. Yo kele mutindu mosi ti kubikala ya kwikama na Nzambi. Kwikama na beto na ntwala ya bampasi yina kesalama bubu yai, kesepedisaka ntima ya Nzambi.​—Bingana 27:11.

Luzingu ya Mfunu Mvula na Mvula

Yo yina, sala mambu yonso yina nge lenda sala sambu na kulonguka mambu yonso ya metala Nzambi mpi lukanu na yandi. Yezu Kristu kutubaka nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.” (Yoane 17:3) Ntangu Nzambi talungisa lukanu na yandi sambu na ntoto, bantu ya kwikama tasepela na mambu yina Yehowa kukanaka sambu na bo tuka luyantiku​—“moyo ya mvula na mvula” na ntoto yina takituka paladisu. Na ntangu yango, luzingu tavanda mpenza na mfunu mpi ya kesepedisa.​—Nkunga 145:16.

Na wapi nge lenda mona nzayilu yina Yezu kutubilaka? Na Ndinga ya Nzambi, Biblia. Kana nge tazola nde bo sadisa nge na kubaka nzayilu yai, kuwa boma ve na kusonikila bambasisi ya zulunalu yai. Bo tabaka bangidika sambu muntu mosi kukwisa kusadisa nge na kulonguka mambu yina Biblia kelongaka mpenza.