Omuenyo Una Esilivilo Pahe Alo Apeho

OVE upondola okukala nomuenyo una esilivilo liotyotyili alo umwe hono. Ñgeni? Mokulandula nawa onondonga mbukahi Mondaka ya Huku, Ombimbiliya. Tutalei mbumwe.

ONONDONGA MBO MBIMBILIYA: Ohamba Salomau wahoneka okuti: “Pala omunthu kutupu natyike otyiwa, tyipona okulia nokunwa, opo ohande yae itale ouwa wovilinga viae vialema.”—ECLESIASTES 2:24.

Onthue tuatungwa opo tulinge ovilinga oviwa vieta ehambu. Alo umwe mononkhalelo mbepuiya, upondola okukala nehambu momuenyo hono, litunda kokuundapa nombili noukuatyili.

ONONDONGA MBO MBIMBILIYA: “Okuava tyihambukiswa vali tyipona okupewa.”—ATOS 20:35.

Ovanyingi vaimbuka okuti okulingila vakuavo ovipuka, okuava omuvo wavo nononkhono pala okukuatesako vakuavo momivo viepuiya, tyihambukiswa unene, nokuyawisa esilivilo liomienyo viavo. Salomau wahoneka okuti: “Uhaanye okulinga nawa vana vesukisa, tyina ove upondola okutyilinga.”—Provérbios 3:27.

Tala ongeleka ya Ralph. Etyi omuvo wokuundapa ku kaputu wapua, welipaka kumwe nomukai wae movilinga viokuivisa omuvo auho. Kese hanyi ankho vaundapa onoola ononyingi movilinga viokuivisa, okuliava ovo muene  okulongesa vakuavo Ombimbiliya. Ralph wati: “Tyina tukondoka keumbo kongulohi, tuepuila mokonda tuakulupa, nokualinga ononkhono ononene movilinga via Tate yetu keulu. Okupuila ngotyo otyiwa unene!” Oe nomukai wae vahambukwa mokonda pahe vasuka vala nokuava.

ONONDONGA MBO MBIMBILIYA: “Epanga liotyotyili una ohole omuvo auho, omukuatate watyitua pala okuvatela pomuvo wononkhumbi.”—PROVÉRBIOS 17:17.

Tyina muvanyingi tyipepuka vali okukoleleya movitateka. Omu Ingelesi Francis Bacon, omunongo mouye, wahoneka okuti, vana vehena omapanga otyotyili, “ouye ukahi ngoti wavombela mehoko.” Okukala nomapanga otyotyili, nokukala epanga ewa, tyipondola okukuvatela okukoleleya momuenyo. Tyipondola okukuetela ouwa nehambu.

ONONDONGA MBO MBIMBILIYA: “Vana vaimbuka omasuka-suka avo opamphepo, ovana-mbembwa.”—MATEUS 5:3.

Ngotyo Jesus walekesa okuti otyipuka tyakolela wesukisa okulinga, inkha uhanda okumona etyi omilao via Huku mavifuisuapo, okuimbuka “omasuka-suka ove opamphepo” nokuetuukisa. Mokonda tuelikalela novinyama, tuna esuko liokunoñgonoka esilivilo liomuenyo netyi walingilua. O Jeova Huku vala upondola okutuavela etyi tuesukisa konthele oyo, iya utuavela tyo Nondaka yae Ombimbiliya. Ngetyi tuetyimona monthele yotete, Ombimbiliya ilekesa ehando lia Huku konthele yoohi. Itupopila oityi tuakalela pano, oityi kuakalela emone enyingi, netyi Huku akevelela kuonthue. Okunoñgonoka otyili otyo tyo Vihonekwa, tyakolela unene opo tukale nehambu nomuenyo una esilivilo. Vana velilongesa Ombimbiliya nokuendela muetyi velilongesa, vena ehambu. Omokonda yatyi? Omokonda ngotyo, valinga oupanga omuwa no Mupakeko wetu, Jeova “Huku wehambu.”—1 Timóteo 1:11.

ONONDONGA MBO MBIMBILIYA: “Hinangela Omupakeko wove Omunene . . . tyina nkhele ononthiki onombi mbuheneye, ine tyina kuheneye omanima ana mopopi okuti: ‘ndyitupu vali ehambu momuenyo.’”—ECLESIASTES 12:1, THE NEW ENGLISH BIBLE.

Elondolo Ohamba Salomau aavela ovakuendye, vana vahaimbuka okuti tupondola okutumbukilwa noviponga momuenyo, liakolela unene kuonthue atuho. Suka vali unene no Mupakeko wove momuenyo wove. Etyi, otyo matyipe omuenyo wove esilivilo. Anya otyituwa tyokuti: “Tuliei, tunuei, mokonda muhuka matunkhi.” (1 Coríntios 15: 32) Eclesiastes 8:12 yati, inkha upaka komutwe Huku, ovipuka ‘mavikueende nawa.’

Omufikuena utiwa Wendi, o ngotyo tyili tyemuenda. Etyi ankho omuhikuena, oe nondenge yae velilongesa elaka lio ko Espanha opo vaye ko Republika Dominika, ankho kuesukisa unene ovaivisi vonondaka onongwa mbo Mbimbiliya. Wati: “Tualinga ononkhono ononene opo tukaundape kuna kuesukisa vali, mahi tuakala nomuvo omuwa unene. Kutupu vali natyike ñgeno nalinga monohanyi ombo epandu! Ondyambi tuapolako onene unene tyipona ononkhono tualinga.”

Okukala Omukuatyili ku Huku Omuenyo Ukala Nesilivilo

Okukala noupanga omuwa na Jeova, tyiyawisa esilivilo liomuenyo wove monkhalelo yavilapo. Ñgeni? Satanasi kahindilile vala Andau na Eva okupilukilapo outumini wa Huku, tupu wati nawike matualako noukuatyili ku Huku inkha amona ononkhumbi. (Jó 1:9-11; 2:4) Ove upondola okulekesa okuti Satanasi onkhembi! Ñgeni? Mokukala omukuatyili ku Huku, nokutavela ovitumino viae, nokulekesa okuti ove utyii okuti o Jeova watokala okutokola otyiwa notyivi pala onthue.—Revelação 4:11.

Onthue tupondola okukoleleya movitateka inkha tuhanda okulinga etyi tyaviuka. Okuti ovitateka ovio mavitutyilika okukala nomuenyo una esilivilo? Pahe soka ñgeno ondyale imwe omukalavi uundula epanga lietu tuhole ine o umwe mombunga. Inkha pokuamena omunthu oo tuhole, tumoneswa ononkhumbi nondyale oyo, okuti matyitukalesa nomuenyo uhena esilivilo? Au! Ñgeno tuakoleleya nehambu ononkhumbi ombo. Otyo otyipuka tyike nokutualako noukuatyili ku Huku. Okutualako okukala ovakuatyili no mononthiki onombi mbo hono, tyotyili tyihambukiswa Huku.—Provérbios 27:11.

Omuenyo Maukala Nesilivilo Apeho

Linga atyiho uvila, opo ulilongesa atyiho konthele ya Huku nevangelo liae. Jesus Kristu wati: “Omuenyo uhapu oyou, okunoñgonoka ove awike Huku yotyotyili, na Jesus Kristu una watumine.” (João 17:3) Tyina Huku amafuiswapo evangelo liae liotete konthele yoohi, ovanthu vekolelo mavakamona etyi Jeova evehandelele ponthyimbi “omuenyo uhapu” momphangu yombembwa pano pohi. Konyima, omuenyo maukakala tyilityili nesilivilo nehambu.—Salmo 145:16.

Opi tupondola okuvasa enoñgonoko Jesus apopia? Tulivasa Mondaka ya Huku, Ombimbiliya. Inkha ove uhanda okukuatesuako konthele yotyo, honekela kovahoneki vomukanda ou. Mavakala nehambu liokutuma omunthu umwe opo eya okukuatesako okunoñgonoka oityi Ombimbiliya tyilityili ilongesa.