FOR di awor nos por duna mas sentido na nos bida. Kon? Esei ta posibel ora nos apliká prinsipionan práktiko ku tin den Dios su Palabra, Beibel. Pues pakiko no ban analisá algun di nan.

PRINSIPIO BÍBLIKO: “No tin nada mihó pa un hende ku kome i bebe i bisa su mes ku su trabou ta bon.”​—EKLESIASTÉS 2:24.

Dios a krea nos pa haña satisfakshon den trabou. P’esei, maske awendia sirkunstansianan por ta mas difísil, nos por tin un grado di satisfakshon den bida si nos ta traha na un manera diligente i onesto.

PRINSIPIO BÍBLIKO: “Duna ta hasi hende mas felis ku risibí.”​—ECHONAN 20:35, BPK.

Hopi hende a realisá ku yuda otronan tambe ta duna gran satisfakshon i mas sentido na bida. P’esei, nan ta usa nan tempu i energia pa yuda esnan ku ta pasa den tempunan difísil. Salomon a skirbi: “No laga di hasi bon na esnan ku meresé esaki, si ta den bo poder pa hasié.”​—Proverbionan 3:27.

Wak e ehèmpel di Ralph. Despues ku el a baha ku penshun, el a djòin su kasá den sirbishi di tempu kompletu. Pues, tur luna nan ta prediká un sierto kantidat di ora,  yudando otro hende siña loke Beibel ta bisa. Ralph ta konta: “Ora nos yega kas anochi, nos ta kansá, no solamente debí na nos edat, sino pasobra nos a usa tur nos energia den sirbishi di nos Tata selestial. Nos ta keda kansá pero kontentu!” Sí, Ralph i su kasá ta felis pasobra nan bida ta drei rònt di yuda otronan.

PRINSIPIO BÍBLIKO: “Un amigu ta stima tur ora bai, i un ruman ta nasí pa tempu di atversidat.”​—PROVERBIONAN 17:17.

Hende por enfrentá problema mas fásil ora nan risibí apoyo di otronan. E filósofo ingles Francis Bacon a skirbi ku “mundu ta un desierto” pa un hende ku no tin amigu. Ora nos tin berdadero amigu—i nos mes ta un bon amigu—esei ta un kos bunita i agradabel, e ta hasi bida bira mas dushi.

PRINSIPIO BÍBLIKO: “Felis [ta] esnan ku ta rekonosé ku nan tin mester di Dios.”​—MATEO 5:3, BPK.

Si nos ke disfrutá di Dios su promesanan, Hesus a mustra ku nos tin ku “rekonosé” ku nos tin un nesesidat spiritual i satisfasé esaki. Kontrali na bestia, nos ta nase ku e nesesidat di ke sa e sentido i propósito di bida. Ta Yehova Dios so por yuda nos satisfasé e nesesidat akí i e ta hasié pa medio di su Palabra, Beibel. Manera nos a mira den e artíkulo anterior, Beibel ta revelá na nos Dios su propósito pa e tera. E ta bisa nos dikon nos ta aki, dikon tin asina tantu sufrimentu i kiko Dios ta spera di nos. Pa nos tin un bida satisfaktorio i ku mas sentido ta nesesario pa nos komprondé bèrdatnan bíbliko. Esnan ku traha tempu pa studia Beibel i apliká loke nan ta siña ta felis. Dikon? Pasobra nan ta desaroyá un bon amistat ku nos Kreador, “e Dios felis,” Yehova.​—1 Timoteo 1:11, NW.

PRINSIPIO BÍBLIKO: “Kòrda riba bo Kreador . . . promé ku dianan duru bini i añanan lo yega den kua lo bo bisa, ‘Mi no ta mira propósito den nan.’”​—EKLESIASTÉS12:1, THE NEW ENGLISH BIBLE.

Rei Salomon a duna hóbennan e konseho akí, pasobra hopi biaha nan no ta realisá ku bida ta yen di sorpresa. Pero e konseho akí ta konta pa nos tur. Nos bida lo haña berdadero sentido ora nos hasi nos Kreador e enfoke di nos bida. Ademas, nos tin ku evitá e aktitut di esnan ku ta bisa: “Laga nos kome i bebe, pasobra mañan nos ta muri.” (1 Korintionan 15:32) Eklesiastés 8:12 ta mustra ku kos lo bai bon ku esnan ku pone Dios na promé lugá den nan bida.

 Un mucha muhé ku yama Wendi a eksperensiá esei. Ora e tabata mas hóben, e ku su ruman muhé a siña spañó pa asina nan por a bai yuda na Repúblika Dominicana, kaminda tabatin un gran nesesidat di predikadónan di e bon notisia ku tin den Beibel. “Nos a hasi hopi sakrifisio pa yuda kaminda tabatin nesesidat, pero nos a pasa masha dushi. Pa nada di mundu lo mi no kambia e seis lunanan ei! E bendishonnan ku nos a haña a surpasá kualke sakrifisio ku nos por a hasi.”

Lealtat na Dios Ta Duna Bida Mas Sentido

Un bon amistat ku Yehova por duna bida sentido na un manera masha spesial. Si bo ta kòrda, Satanas ta esun ku a influensiá Adam ku Eva pa rebeldiá kontra Dios. Pero no ta esei so el a hasi, un par di tempu despues el a insinuá ku niun hende lo keda leal na Dios bou di prueba. (Jòb 1:​9-11; 2:4) Nos por yuda mustra ku loke el a insinuá no ta bèrdat! Kon? Ora nos keda leal na Dios, obedesé su prinsipionan i demostrá ku nos ta rekonosé Yehova su derecho supremo pa determiná pa nos loke ta bon i loke malu.​—Revelashon 4:11.

Si nos ke sigui hasi loke ta bon nos lo por pasa den difikultat. Pero e difikultatnan akí lo kita nos goso den bida? Imaginá ku un persona ta papia malu di un hende ku nos stima i ku e persona ei ta kousa nos algun difikultat pasobra nos ta defendé reputashon di esun ku nos stima. Un situashon asin’akí lo kita nos goso den bida? Klaru ku nò. Den un kaso asina nos lo ta dispuesto pa enfrentá tal difikultatnan. E mesun kos ta konta pa ku nos lealtat na Dios. Ora nos ta keda leal na Dios bou di sirkunstansianan difísil, nos ta hasi su kurason kontentu.​—Proverbionan 27:11.

Un Bida ku Mas Sentido pa Semper

Pues despues di a lesa e artíkulonan akí, pone komo bo meta pa siña tur loke bo por tokante Dios i su propósito. Hesukristu mes a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Hende ku keda fiel na Yehova lo mira kon e lo kumpli ku su propósito original pa tantu e tera komo hende—nan lo disfrutá di “bida eterno” den Paradeis riba tera. E ora ei, tur hende su bida lo tin berdadero sentido i satisfakshon.​—Salmo 145:16.

Lo bo ke sa na unda bo por haña e konosementu ku Hesus a papia di dje? Bo por hañ’é den Dios su Palabra inspirá, Beibel. Si bo ta deseá yudansa, sinti bo liber pa skirbi e editornan di e revista akí. Gustosamente nan lo hasi areglo pa un persona yuda bo haña sa kiko Beibel ta siña realmente.