A Ngar er Ngii a Belkul el Klengar​—Er Chelechang me a Diak a Ulebengelel

NGSEBECHEL el mo er ngii a belkul a klengar er kau er chelechang. El okiu a ngera el rolel? Ngoeak sel moltirakl a omellach er a Tekingel a Dios el Biblia. Ka me bo dorriter a bebil er ngii el tekoi.

OMELLACH ER A BIBLIA: A King el Salomon a milluches el kmo, “Ng bai ungil er a chad a longa e lolim e loldeu er a rengul er a urerel.”​—OLISECHAKL 2:24.

Kid a ulebeob el kired el osiik a ureor el mo uchul a deurreng er kid. El mo lmuut er a taem el bo dechelebangel a meringel el tekoi, me kid a dirrek el sebeched el mo dmeu a rengud er a klengar a lsekum e kede blak a rengud e melemalt a omerelled el meruul a urered.

OMELLACH ER A BIBLIA: “A dorous e ngbai ngeltengat ra dolai.”​—RELLIR 20:35.

A rebetok a mla metik er ngii el kmo sel loruul a ungil el mo er a rebebil, el chemoit a temir me a klisichir el olengeseu er tir er a chelebulir me a techerelbesrir e te mo melechesiu a betok el klengeltengat, e dirrek el mo er ngii a belkul a klengar er tir. A Salomon a milluches el kmo, “Sel bo le sebechem, e moruul a ungil el mor tirkel ousbech er ngii.”​—Osisechakl 3:27.

Ka di molatk er a Ralph. A uriul er a bo el merek er a temel er a ureor e ngmlo obengkel a bechil el mesiou el mui el taem el Kristiano. Me te dmak el mengoit a betok el sikang er a bek el buil el oldingel a obliil, e mesuub a Biblia el obengterir a rebebil. Ngmelekoi el kmo: “Sel lekebesengei me ki bo mrei, e ngkmal mesaul a bedengam el diak el belkul a kmo aki chudelang, e ngbai kemam el mla chemoit a rokui el klisicham el mesiou er a Demad el ngar er a eanged, me alta ngmesaul a bedengam engdi ngkmal  ungil a rengmam!” Me te dul dmeu a rengrir e le blekerdelel a klengar er tir a ultuil er a klemeriarreng er tir el sorir el merous el mo er a rebebil.

OMELLACH ER A BIBLIA: “A sechelid a di blechoel el oubltikerreng, e a ta er kid el sechal a ngosukid er a chelebuul.”​—OSISECHAKL 17:17.

A ringel me a mondai a mo beot a lsekum e ngngar er ngii a sechelim el sebechel el ngosukau. A Francis Bacon el ngii a mesuub e merriter a uldasu a milluches el kirir a rechad el diak a resechelirir el kmo, “a beluulechad er tir a kmal diak el ultebechel.” Me sel lengar er ngii a mera el sechelid me a lechub e kede mo ungil el sechelei, e a klengar er kid a kmal mo beot, e sebechel el mo klebokel e ungil el klengar.

OMELLACH ER A BIBLIA: “Te ngeltengat a re medengei el kmo te chebuul a lak lousbech er a Dios.”​—MATTEUS 5:3.

A Jesus a mileketeklii a klou a ultutelel el tekoi el kired el meruul er ngii a lsekum e ngsoad el mo dmeu a rengud el omes er a otutel a telbilel a Dios, e tiang a oeak sel bo dungil el medengelii a klungel a ultutelel a usbechellel a Tekingel a Dios. Kid a kuk ngodech er a charm, e le ngngar er ngii a ileakl el urunguled el soad el mo medengelii a belkul me a moktek er a klengar. Ngdi ta el Jehovah a sebechel el churrengelii tia el ngelsengesed, e ngmeruul er ngii el okiu a Tekingel el Biblia. A Biblia a ouchais er a moktek er a Dios el kirel tia el chutem, el ua dulsaod er ngii er a uchei el suobel. Ngdirrek el ouchais er kid er a uchul e kede ngar er tiang me sel uchul me ngkmal klou a ringel me a chelebuul, e dirrek el ochotii a uldesuel a Dios el kired. Me ngklou a ultutelel el bo dodengei a klemerang el losaod a Bades me bo el sebechel el mo er ngii a deurreng me a mera el belkul a klengar er kid. Tirke el rokui el mengoit a temir el mesuub a Biblia e oltaut aike el lesuub er a chelsel a klengar er tir a mera el mo dmeu a rengrir. E ngera uchul? E le te mekurulii a mesisiich el klaumerang me a deleuill er tir el obengkel ngika el Ulemeob er kid el ngii a “[dmeu a rengul] el Dios” el Jehovah.​—1 Timoteus 1:11.

OMELLACH ER A BIBLIA: “Molatk er Omebelem . . . er uchei er a le mei a ikel mekngit el sils ma rak el bo mdu el kmo, “Ng diak el deu a renguk er tial klengar.”​—OLISECHAKL 12:1.

A tekingel a King el Salomon el mo er a remekekerei el chad, el tir a lebebil er a taem e ngmo diak lesang el kmo a klengar a sebechel el mo uchul a chelebuul el mo er tir, a dirrek el uldimukl er kid. Misei e mrellii ngike el Ulemeob el mo kot el klou a ultutelel er a chelsel a klengar er kau. Tiaikid a di ta el tekoi el sebechel el rullii a klengar er kau el mo er ngii a mera el belkul. Motngeklii sel uldasu el kmo: “Dongang e dolim e kede mad ra klukuk.” (1 Korinth 15:32) Me a lsekum e kede nguu a Dios el mo kot, e ngdi “mo ungilbesul” a rokui el tekoi el kired el ua losaod a Olisechakl 8:12.

A ngalek el redil el ngklel a Wendi a kmal melechesuar a klemerang er tia el tekoi. Sera dirk lekekerei, e ngii me a merrengel a  milsuub a tekoi er a Sebangiol me bo el sebechir el melukl el mo er a beluu er a Dominican Republic el mo olengeseu er a ureor er a berkel a klumech er a ungil el chais. Ngmelekoi el kmo: “Aki chiloit a betok el tekoi me bo el sebecham el kutmeklii tia el turrekong er kemam, engdi ngmera el dmeu a rengmam el kirel a klengar er kemam. Ngkmal diak a lmuut el ungil tekoi el sebechel el mekesiur aike el elolem el buil el ki murruul er tia el rolel a omesiou! A klengeltengat el ki mngilai a lmuut el betok er aike el rokui el ki mchiloit el kirel tia el omesiungam.”

A Blakerreng el Mo er a Dios a Rullii a Klengar el Mo er Ngii a Mera el Belkul

Sel doleketek er a ungil el deleuill er kid el obengkel a Jehovah e ngsebechel el dochel a lmuut el betok el ungil el tekoi er a klengar er kid el okiu a ileakl el rolel. El mekerang? A Satan a dimlak di longesuseu er a Adam me a Eba el mo omtok a llechul a Dios, e ngdirrek el ua lullekoi el kmo a chad a mo tomellii a blakerreng er ngii el mo er a Dios sel bo lechelebangel a omelsemai er a klengar er ngii. (Job 1:9-​11; 2:4) Kau a kmal sebechem el ochotii el kmo a Satan a kmal bulak! El okiu a ngera el rolel? Ngoeak sel molemolem el blak a rengum el mo er a Dios, e moltirakl a llechul, e moruul a tekoi el ochotii el kmo a Jehovah a ngar er ngii a llemeltel el melilt a ungil me a mekngit el kired.​—Chocholt 4:11.

Kede ulterekokl el mo kired el outekangel a omelsemai a lsekum e ngsoad el meruul a llemalt. Me a chouaika el omelsemai, ngsebechel el mo uchul e kede oridii a mera el belkul a klengar? Ka di molatk, oleko ngika el mekngit el cheraro a ouchais a blulak el kirel a betik er a rengud el sechelid me a lechub e ngchedad. Alta e kede medengei el kmo ngmo uchul a meringel el tekoi el kirel a klengar er kid a lsekum e kede mo mesebechakl er ngii, engdi tiang ngmo rullii a klengar er kid el mo diak a belkul? Ngkmal diak! Kede ulterekokl el kmal dmeu a rengud el mo chelebangel a ngii di el ringel me bo el sebeched el mesebechakl er a ngklel ngika el betik er a rengud. Me tia el omeruul a kmal di osisiu er a blakerreng er kid el mo er a Dios. A blakerreng er kid er cheungel a ngii di el ringel a rullii a Jehovah el kmal mo dmeu a rengul.​—Osisechakl 27:11.

A Ngar er Ngii a Belkul el Klengar el Diak a Ulebengelel

Moruul a rokui el sebechem el mo blak a rengum el mesuub el kirel a Dios me a moktek er ngii. A Jesus Kristus a dilu el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.” (Johanes 17:3) Sel taem el Dios a mo otutii a dimla moktek er ngii el kirel tia el chutem, e tirke el blak a rengrir el chad a mo oldeu a rengrir er a dimla moktek er a Jehovah el kirir el ngii a “diak a ullebengelel klengar” el ngar er a paradis el chutem. Me seikid el taem e ngmo er ngii a mera el belkul a klengar er tir.​—Psalm 145:16.

Kede mo metik er tia el klemedengei el lulsaod er ngii a Jesus er ker? Ngngar er a chelsel a mlukrael el Tekingel a Dios el Biblia. A lsekum e ngsoam a chad a lengesukau el kirel tia el tekoi, e moluches el mo er tirke el mirruul er tia el babier. Te kmal semeriar el kutmeklii a taem me a techall el mo sebechel a chad el me ngosukau el kirel aike el tekoi el lolisechakl a Biblia.