Se Olaga Aogā i le Taimi Nei ma le Lumanaʻi

E MAFAI ona e maua se olaga fiafia ma aogā i le taimi nei. E faapefea? E ala i le usitaʻia o taʻiala o loo i le Tusi Paia. Seʻi o tatou talanoaina nisi o nei taʻiala.

TAʻIALA MAI I LE TUSI PAIA: Na tusi le tupu o Solomona: “E leai se mea e sili i le tagata nai lo o le ʻai ma inu, ma iloa e ia mea lelei ona o lana galuega mamafa.”​—FAILAUGA 2:24.

Na faia i tatou ina ia maua le fiafia i galuega lelei. E tusa lava po o ā tulaga faigatā, ae e maua pea le lotomalie i le taimi nei e ala i le galue filigā ma le faamaoni.

TAʻIALA MAI I LE TUSI PAIA: “E sili le fiafia e maua i le foaʻi atu i lo o le talia mai.”​—GALUEGA 20:35.

Ua faamanuiaina le toʻatele ma maua olaga e aogā, i le faia o mea lelei mo isi, e pei o le faaaogā o o latou taimi ma le malosi e fesoasoani ai i isi i o latou mafatiaga. Na tusi Solomona: “Aua e te taofia se mea lelei mai i ē ua tatau i ai, pe a mafai ona e faia.”​—Faataoto 3:27.

Seʻi mātau le faaaʻoaʻoga a Ralph. Ina ua litaea, na galulue loa ma lana avā i le talaʻi faataimi atoa. E tele itula e la te talaʻi ai i masina taʻitasi, i le aʻoaʻoina o isi i le Tusi Paia. Ua faapea mai Ralph: “E ma te lagona le lē lavavā pe a taunuu i le fale i le afiafi, e lē gata ona ua  matutua, ae faapea foʻi i le faaaogā o lo ma malosi e auauna ai i le Tamā i le lagi. O se lē lavā i mea lelei!” E maua pea e i laʻua le fiafia ona e tāua iā i laʻua le talaʻiga.

TAʻIALA MAI I LE TUSI PAIA: “O le uō moni e alofa i taimi uma, ma o ia o se uso ua fanau mo taimi o puapuaga.”​—FAATAOTO 17:17.

E faigofie ona onosaia faigatā pe a iai se isi e fesoasoani atu. Na taʻua e le tusitala o Francis Bacon, o ē e leai ni uō moni, “ua pei o latou olaga o sē e fesēaʻi solo i se togāvao.” O le a māmā ou mafatiaga ma faamalieina lou olaga pe a iai ni uō moni, ma avea foʻi oe ma uō lelei.

TAʻIALA MAI I LE TUSI PAIA: “E fiafia o ē e naunau i mea faaleagaga.”​—MATAIO 5:3.

Na faailoa mai e Iesu e tāua le iloaina ma le saʻilia o “mea faaleagaga,” ina ia maua ai le fiafia i le faataunuuina o folafolaga a le Atua. E ese mai i meaola, e iai lo tatou manaʻoga ina ia malamalama i le aogā ma le uiga o le olaga. E na o Ieova le Atua e mafai ona faamalieina lenā manaʻoga, ma e na te faia e ala mai i le Tusi Paia. E pei ona faamatalaina i le mataupu muamua atu, o loo taʻua i le Tusi Paia le finagalo o le Atua mo le lalolagi, le māfuaaga ua tatou iai i inei, le pogai ua tele ai mafatiaga, ma le finagalo o le Atua mo i tatou. E aogā le malamalama i nei aʻoaʻoga a le Tusi Paia, e maua ai se olaga aogā ma faamalieloto. E maua le fiafia e i latou e faaavanoa le taimi e suʻesuʻe ma faatino mea ua latou aʻoaʻoina mai i le Tusi Paia. Aiseā? Ona ua latou atiaʻe se mafutaga māfana ma Lē na faia i tatou, o Ieova “le Atua fiafia.”​—1 Timoteo 1:11.

TAʻIALA MAI I LE TUSI PAIA: “Ia e manatua o Lē e sili na Foafoaina oe . . . a o leʻi oo mai aso e malaia ai, pe oo mai tausaga e te faapea mai ai, ʻE leai soʻu fiafia i ai.’”​—FAILAUGA 12:1.

E aogā iā i tatou uma le fautuaga a le tupu o Solomona mo le ʻautalavou, auā e iai taimi e tatou te lē mataala ai i faafitauli o le olaga. Ia faamuamua Lē na faia oe, o inā o le a mafai ai ona e maua se olaga e aogā. Ia teena lenei uiga: “Seʻi o tatou aai la ma inu auā o a taeao e tatou te feoti ai.” (1 Korinito 15:32) E pei ona taʻua i le Failauga 8:12, e te ʻiʻu i le manuia’ pe a faamuamua le Atua.

 O le mea lenā na tupu i le tamaʻitaʻi o Wendi. A o talavou, na la aʻoaʻoina ma lona uso laʻitiiti le gagana Sepania ina ia mafai ai ona ō atu i le Dominican Republic, auā na manaʻomia nisi e fesoasoani i le talaʻia o le tala lelei. Na faapea mai o ia: “Na tuu le tele o mea na ma mananaʻo e fai, ae ma ō atu e fesoasoani i inā, ma o se taimi manaia tele lea i o ma olaga. O le ono masina lea sa ma iai i inā, o se taimi sa sili ona aogā. E lē mafaatusalia mea lelei na ma tuua, i faamanuiaga na ma maua mai i lenā taimi.”

E Aogā le Olaga pe a Faamaoni i le Atua

O le a e maua se olaga e sili atu ona aogā, pe a iai se mafutaga lelei ma Ieova. I le ā le auala? E lē gata na uunaʻia e Satani Atamu ma Eva e fouvale i le pule a le Atua, ae ua ia tuuaʻia foʻi e faapea, e leai lava ma se isi e faamaoni pea i le Atua pe a tofotofoina. (Iopu 1:9-11; 2:4) E mafai ona e faamaonia le pepelo o Satani! E faapefea? Ia tumau pea i le faamaoni i le Atua, usitaʻia ana tulafono, ma ia faaalia e te lagolagoina le aiā silisili a Ieova e filifili ai le mea e lelei ma leaga mo i tatou.​—Faaaliga 4:11.

E ao ona tatou onosaia faafitauli, pe afai e tatou te mananaʻo e mulimuli i le ala saʻo. Po o le a avea na faafitauli ma pogai e lē aogā ai o tatou olaga? Seʻi faapea o loo iai se fili e fia tauimasui o loo faia tala taufaaleaga, e uiga i sa tatou uō pele po o se tasi o lo tatou aiga. Po o le a mou atu le fiafia mai i o tatou olaga, pe afai e agaleaga mai le fili a o tatou puipuia le igoa lelei o lē e pele iā i tatou? E leai! E tatou te malilie e onosaia faigatā ina ia taʻuleleia ai o ia. E faapena foʻi lo tatou faamaoni pea i le Atua. E faafiafiaina lona finagalo pe a tatou tumau ma le faamaoni e ui i tulaga leaga.​—Faataoto 27:11.

O se Olaga Manuia e Lē Gata Mai

O lea la, ia fai le mea e te mafaia ina ia iloa le Atua ma lona finagalo. O Iesu Keriso lava na fetalai: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.” (Ioane 17:3) Pe a faataunuuina le finagalo o le Atua mo le lalolagi, ona maua lea e tagata faamaoni o le “ola e faavavau” i se lalolagi ua avea ma parataiso. E mautinoa o le a ola ai i se olaga e manuia ma faamalieloto.​—Salamo 145:16.

O fea e te maua ai le malamalama lea na taʻua e Iesu? O loo i le Tusi Paia. Pe a e fia maua se fesoasoani, ia tusi atu i ē na lomia lenei mekasini. E latou te fiafia e auina atu se tasi, e fesoasoani iā te oe e malamalama i aʻoaʻoga a le Tusi Paia.