Latamat nema nalipaxuwayaw uku chu putum kilhtamaku

ASTA la uku tlan lipaxuwayaw latamat. Pero talakaskin natlawayaw xtastakyaw Biblia. Kaʼakxilhwi makgapitsi.

TASTAKYAW XALAK BIBLIA: Mapakgsina Salomón wa: «Ni anan atanu tuku tlakg makgapaxuwa chatum chixku, kajwatiya akxni wayan chu kgotnan chu nalipaxuwa xlakata lhuwa skujnit» (ECLESIASTÉS 2:24).

Chatum lataman tlan limakgkatsi akxni liwana tlawa xtaskujut. Wa xlakata, maski nitlan la wilaw tlan paxuwayaw akxni liwana skujaw chu ni akgsaninanaw.

TASTAKYAW XALAK BIBLIA: «Xaliwaka ntlan [...] nalilatapaya ntu natakinana, ni xawa ntu namakgamakglhtinana» (HECHOS 20:35).

Akxni wi tuku tlawayaw xlakata amakgapitsin na paxuwayaw chu lu tlan limakgkatsiyaw. Na tlan xlimaklakaskiw kinkilhtamakujkan chu tuku kgalhiyaw xlakata nakamakgtayayaw tiku patinamakgolh. Mapakgsina Salomón kinkamaxkiyan uma tastakyaw: «Komo tlan namakgtayaya tiku lakaskin tamakgtay, ni kalakpuwanti pi ni namakgtayaya» (Proverbios 3:27).

Kalichuwinaw Ralph. Akxni nialh skujli, nachuna tlawalh la xpuskat chu tsukulh lichuwinan Dios putum kilhtamaku. Chuna xchatiykan lhuwa hora maklakaskinkgo akgatunu papaʼ xlakata nakamasiyanikgo latamanin  xaxlikana. Xla wan: «Katsisni lu ktlakgwanitaw [o kakgxuninitaw] kchanaw kkinchikkan xlakata kskujniw kinTlatikan xalak akgapun chu ni xlakata klinawa kata. ¡Lu kinkamakgapaxuwayan akxni kkitaspitaw!» Xlakata kamakgtayamakgolh amakgapitsin, Ralph chu xpuskat lu lipaxuwakgo.

TASTAKYAW XALAK BIBLIA: «Xaxlikana amigo xlenkgalhin paxkinan, chu litaxtu la chatum tala akxni anan talakgaputsit» (PROVERBIOS 17:17).

Tlakg tayaniyaw taʼakglhuwit komo wi tiku nakinkamakgtayayan. Filósofo xalak Inglaterra xwanikan Francis Bacon xwan pi komo niti kgalhi xʼamigos «kakilhtamaku la akgtum desierto». Akxni kgalhiyaw lakwan amigos chu akinin na tlan amigo uma tlawa pi kilatamatkan tlan nawan chu napaxuwayaw.

TASTAKYAW XALAK BIBLIA: «Paxuwana lamakgo wantiku katsikgo pi lakaskinkgo tuku xla Dios» (MATEO 5:3, NM).

Kʼuma tachuwin, Jesús liwana kinkawaniyan pi komo akxilhputunaw tuku Dios kinkawaninitan pi nakinkamaxkiyan, kilimasiyatkan pi “maklakaskinaw nema xla Dios” chu chuna natlawayaw. Akinin ni xtachuna la animales, xlakata katsiputunaw tuku xlakata lamaw. Kajwatiya Dios tlan nakinkawaniyan tuku katsiputunaw chu maklakaskin xTachuwin. Chuna la akxilhwi artículo nema titaxtulh, Biblia lichuwinan tuku lakapastaknit Dios natlawa kKatiyatni. Kinkawaniyan tuku lakaskin natlawayaw, tuku xlakata lamaw chu tuku xlakata anan tapatin. Lu xlakaskinka nakatsiyaw xtakgalhtin uma, xlakata xatapaxuwan nalatamayaw chu tlan namakgkatsiyaw. Wa xlakata tiku limaxtukgo kilhtamaku xlakata nalikgalhtawakgakgo Biblia chu tlawakgo tuku katsinikgo xatapaxuwan tawilakgo. Komo chuna natlawayaw, liwana natalalinaw kiMalakatsukinakan, «Dios tiku xapaxuwana»: Jehová (1 Timoteo 1:11, NM).

TASTAKYAW XALAK BIBLIA: «Kalakapastakti mi Malakatsukina la uku [...] xlakata nina min xatuwa kilhtamaku; namin kilhtamaku nawana: “ni klipaxuwa maski klama”» (ECLESIASTÉS 12:1, VERSIÓN POPULAR).

Salomón kamaxkilh uma tastakyaw lakgkgawasan, wantiku min kilhtamaku lakpuwankgo pi latamat lu lilakgatit. Pero, na tlan nakamakgtaya maski laklankata. Lu napaxuwayaw kkilatamatkan komo nalakapastakaw kiMalakatsukinakan chu lakgmakganaw xtalakapastaknikan tiku wankgo: «Xlimakgwa tlan lamaw, kapaxuwaw, tlan kawayaw, chu [kakgotnaw], xampi ni katsiyaw pala chali, usu tuxama  naniyaw» (1 Corintios 15:32). Eclesiastés 8:12 wan pi tlan nakakitaxtuni tiku pulana wilikgo Dios kxlatamatkan.

Chatum tsumat wanikan Wendi chuna titaxtulh kxlatamat. Xla chu xtala katsinikgolh español xlakata xʼankgolh kRepública Dominicana, niku tlakg xtamaklakaskin tiku xlichuwinankgolh Dios. Wendi wan: «Maski lhuwa tuku klimakgxtakgwi, wa tuku tlakg tlan ktlawaw kkilatamatkan. Nitu xaklilakgpaliw uma akgchaxan papaʼ nema xakwilaw anta. Tlakg lhuwa tasikulunalin kmakglhtinaw nixawa tuku kmakgxtakgwi».

Lipaxuw latamayaw akxni ni makgxtakgaw Dios

Xlakata Dios kiʼamigojkan uma na tlawa pi napaxuwayaw kkilatamatkan. ¿Lakapastaka pi Adán chu Eva tatayakgolh Satanás? Pero ni kajwatiya uma tuku tlawalh. Alistalh na wa pi putum latamanin xʼamakgo makgxtakgkgo Dios komo wi tuku nitlan xtitaxtukgolh (Job 1:9-11; 2:4). Wa xlakata kimputumkan tlan nalimasiyayaw pi Satanás xaʼakgsanina. ¿La chuna natlawayaw? Ni namakgxtakgaw Dios, natlawayaw xtastakyaw chu kalimasiyaw pi wa kgalhakgaxmataw xlakata tuku tlan chu tuku nitlan (Apocalipsis 4:11).

Max natitaxtuyaw lhuwa tuku nitlan xlakata lamaw kxatlan tiji. Pero ¿natlawa pi ni napaxuwayaw? Kaj kalakpuwanti pi wi tiku limawakama taʼakgsanin chatum mi amigo tiku lu tlan talalipina o chatum xalak mi familia. ¿Nixlikana pi nakgalhmakgtayaputuna xlakata tuku nitlan limawakamaka? Chu maski nalisitsiya, chuntiya napaxuwaya kmilatamat. Xlikana pi wix chuna xtlawaputu. Chu nachuna kitaxtu akxni ni makgatsankgananiyaw Dios. Chu lu lipaxuwa Jehová akxni ni makgxtakgaw maski lhuwa titaxtuyaw tuku nitlan (Proverbios 27:11).

Lipaxuw nalatamayaw putum kilhtamaku

Xlakata tuku akxilhwi, tlan kinkakitaxtuniyan komo nakatsiniyaw xlakata Dios chu tuku lakapastaknit natlawa. Jesús wa: «Wa cha yuma liwi latamat wa ntu xaliʼankgalhin, mpi nalakgapaskgoyan wix [...] Dios, talulokgtat, chu Jesucristo, wa nti wix malakgachanita» o makatanita (Juan 17:3). Tiku ni katimakgatsankgananikgolh Jehová naʼakxilhkgo akxni nakgantaxtu tuku lakapastaknit Dios xpalakata latamanin: «latamat wantu xaliʼankgalhin» anta kKatiyatni akxni akgtum paraíso nawan. Ama kilhtamaku, putum tlan nawilakgo chu lipaxuw nalatamakgo (Salmo 145:16).

Pero ¿la tlan nalakgapasa Dios chuna la lichuwinalh Jesús? Anta kxTachuwin Dios nema matsokgninalh, kBiblia. Xlakata nakatsiya tuku masiyay Biblia, kkawaniyan pi kakatsokgnani tiku tlawakgonit uma revista, chu xlakan lipaxuw naputsakgo tiku tlan nalakgapaxialhnanan.