Vutomi Lebyi Nga Ni Xikongomelo—Sweswi Ni Hilaha Ku Nga Heriki

U NGA va ni xikongomelo xa xiviri hi vutomi hambi ku ri sweswi. Hi ndlela yihi? Hi ku va u landzela milawu ya vutlhari leyi nga eRitweni ra Xikwembu, ku nga Bibele. A hi kambisiseni yin’wana ya yona.

NAWU WA BIBELE: Hosi Solomoni u tsale a ku: “A ku na nchumu xo antswa ku tlula leswaku [munhu] a dya ni ku nwa, a endla leswaku moya-xiviri wakwe wu vona leswinene hikwalaho ka ku tikarhata kakwe.”—EKLESIASTA 2:24.

Hi vumberiwe leswaku hi kuma ku eneriseka eka ntirho lowunene. Hambiloko u ri eka swiyimo leswi tikaka swinene, u nga tiphina hi ku eneriseka evuton’wini sweswi hi ku tirha hi ku hiseka ni hi ku tshembeka.

NAWU WA BIBELE: “Ku nyika swi tisa ntsako lowukulu ku tlula ku amukela.”—MINTIRHO 20:35.

Hi xikombiso, vanhu vo tala va kume leswaku ku endlela van’wana swilo, hi ku va va nyikela hi nkarhi ni matimba ya vona leswaku va va pfuna hi minkarhi yo tika, swi vonake swi vuyerisa naswona swi endle leswaku vutomi bya vona byi va ni xikongomelo. Solomoni u tsale a ku: “U nga tshuki u ala ku va endlela leswinene lava swi va lulameleke, loko swi ri ematimbeni ya voko ra wena ku swi endla.”—Swivuriso 3:27.

Xiya xikombiso xa Ralph. Endzhaku ka loko a tshike ntirho, u joyine nsati wakwe entirhweni wa nkarhi hinkwawo wo chumayela. Havumbirhi bya vona va heta tiawara to hlayanyana  nh’weti na nh’weti va ri entirhweni wo chumayela, va tinyiketela ku dyondzisa van’wana Bibele. Ralph u ri: “Loko hi tlhelela ekaya nimadyambu, hi va hi karhele kambe ku nga ri hikwalaho ko dyuhala, kambe hikwalaho ko tirhisa matimba ya hina entirhweni wa Tata wa hina wa le tilweni. I swinene ku karharisiwa hi ntirho lowunene!” Yena ni nsati wakwe va tsakile hileswi vutomi bya vona byi titshegeke hi ku nyika.

NAWU WA BIBELE: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.”—SWIVURISO 17:17.

Swiphiqo swa vevuka loko ku ri ni vanhu lava ku seketelaka. Mutsari wa switsalwana wa Munghezi Francis Bacon u tsale leswaku lava nga riki na vanghana va xiviri “swi fana ni loko va lahlekile emananga.” Ku va ni vanghana va ntiyiso ni ku va munghana lonene swi ta endla leswaku vutomi byi tsakisa byi tlhela byi va lebyi enerisaka.

NAWU WA BIBELE: “Va tsaka lava khathalaka hi xilaveko xa vona xa moya.”—MATEWU 5:3.

Yesu u kombise xilaveko xa nkoka xa leswaku loko u lava ku tiphina hi ku hetiseka ka switshembiso swa Xikwembu, u fanele u twisisa ni ku enerisa ‘xilaveko xa wena xa moya.’ Ku hambana ni swiharhi, hi velekiwe hi lava ku twisisa xikongomelo xa vutomi. I Yehovha Xikwembu ntsena la nga enerisaka xilaveko xexo naswona sweswo u swi endla hi ku tirhisa Rito rakwe, ku nga Bibele. Hilaha hi swi voneke hakona eka xihloko lexi nga hundza, Bibele yi paluxa xikongomelo xa Xikwembu hi misava. Yi hi byela xivangelo xo va hi ri laha, ni leswaku ha yini ku ri ni ku xaniseka konghasi ni leswi Xikwembu xi swi languteleke eka hina. Ku twisisa ntiyiso wolowo wa Matsalwa i swa nkoka leswaku hi hanya vutomi lebyi nga ni xikongomelo ni lebyi enerisaka. Lava tinyikaka nkarhi wo dyondza Bibele ni ku tirhisa leswi va swi dyondzaka va ni ntsako. Ha yini? Hikuva va ni vuxaka ni Muvumbi wa hina, ku nga Yehovha “Xikwembu lexi tsakeke.”—1 Timotiya 1:11.

NAWU WA BIBELE: “Tsundzuka Mutumbuluxi wa wena . . . masiku ya khombo ma nga si ta, kumbe ma nga si fika malembe lawa u nga ta vula ha wona u ku: ‘A ma ndzi tsakisi.’”—EKLESIASTA 12:1.

Hosi Solomoni u khutaze vantshwa, lava nkarhi wun’wana va nga ha tsandzekaka ku xiya leswaku vutomi byi nga hi tisela makhombo hinkwerhu ka hina. Endla ku rhandza ka Muvumbi wa wena. Sweswo hi swona leswi nga ta endla leswaku vutomi bya wena byi va ni xikongomelo. Papalata langutelo leri: “A hi dyeni hi nwa, hikuva mundzuku hi ta fa.” (1 Vakorinto 15:32) Eklesiasta 8:12 yi vula leswaku loko u rhangisa Xikwembu, swilo ‘swi ta ku fambela kahle.’

 Nhwanyana la vuriwaka Wendi u kume leswaku mhaka leyi i ntiyiso. Loko a ha ri ntsongo, yena ni sesi wakwe va dyondze Xipaniya leswaku va ta rhurhela eDominican Republic, laha a ku ri ni xilaveko lexikulu xa vachumayeri va mahungu lamanene ya Bibele. U ri: “Hi titsone swo tala leswaku hi ya tirha laha a ku ri ni xilaveko, kambe hi ve ni nkarhi wo tsakisa. Ku hava swilo swin’wana leswi a ndzi ta va ndzi swi endlile eka tin’hweti teto ta tsevu! Mikateko leyi hi yi kumeke yi tlula swilo leswi hi titsoneke swona.”

Ku Tshembeka Eka Xikwembu Swi Endla Leswaku Vutomi Byi Va Ni Xikongomelo

Ku aka vuxaka lebyinene na Yehovha swi nga endla leswaku vutomi bya wena byi va ni xikongomelo hi ndlela yo hlawuleka. Hi ndlela yihi? Sathana a nga kanganyisanga Adamu na Evha ntsena leswaku va xandzukela vulawuri bya Xikwembu, kambe u tlhele a vula leswaku a ku na munhu loyi a nga tshamaka a tshembekile eka Xikwembu loko a ri endzingweni. (Yobo 1:9-11; 2:4) U nga pfuna eku kombiseni leswaku Sathana i muhembi! Hi ndlela yihi? Hi ku tshama u tshembekile eka Xikwembu, hi ku yingisa milawu ya xona ni ku kombisa leswaku u teka Yehovha tanihi loyi a tlakukeke loyi a nga ni mfanelo yo hi hlawulela leswinene ni leswo biha.—Nhlavutelo 4:11.

Hi nga ha boheka ku tiyiselela swiphiqo loko hi lava ku famba endleleni leyinene. Xana swiphiqo sweswo swi nga ha endla leswaku vutomi bya hina byi nga vi na xikongomelo? Kutani, ehleketa hi nala loyi a nga ni tihanyi loyi a lumbetaka munghana wa hina loyi a rhandzekaka kumbe xirho xa ndyangu. Loko ku ri hileswaku ku sirhelela vito ra munghana yoloye loyi a rhandzekaka swi nga hi vangela khombo eka nala wa hina, xana leswi swi nga endla leswaku vutomi bya hina byi nga vi na xikongomelo? A swi tano! Hi ta tiyiselela swiphiqo swoleswo hi ntsako leswaku hi basisa vito rakwe. Swi tano ni hi ku tshama hi tshembekile eka Xikwembu. Ku tshembeka ka hina ehansi ka swiyimo swo biha swi endla leswaku mbilu ya Xikwembu yi tsaka.—Swivuriso 27:11.

Vutomi Lebyi Nga Heriki Lebyi Nga Ni Xikongomelo

Endla hinkwaswo leswi u nga swi kotaka leswaku u dyondza hi Xikwembu ni hi xikongomelo xa xona. Yesu Kreste u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Loko Xikwembu xi hetisisa xikongomelo xa xona xo sungula hi misava, vanhu vo tshembeka va ta tiphina hi “vutomi lebyi nga heriki” eparadeyisini ya laha misaveni, ku nga leswi Yehovha a swi lavisa swona eku sunguleni. Vutomi byi ta va ni xikongomelo byi tlhela byi va lebyi enerisaka.—Pisalema 145:16.

Xana u nga byi kuma kwihi vutivi lebyi Yesu a vulavuleke ha byona? Eka Rito ra Xikwembu leri huhuteriweke, ku nga Bibele. Loko u lava mpfuno, titwe u ntshunxekile ku tsalela vakandziyisi va magazini lowu. Va ta hlela leswaku munhu un’wana a ta ku pfuna u dyondza leswi Bibele yi swi dyondzisaka hakunene.