Umoyo Wacandulo Sono Ndiposo Kwamuyirayira

NANGA ni sono umoyo winu ungaŵa wacandulo. Mwawuli? Mwakulondezga fundo zavinjeru izo zikusangika mu Mazgu gha Ciuta, Baibolo. Tiyeni tiwonepo zicoko waka.

FUNDO YA MU BAIBOLO: Themba Solomoni likalemba kuti, “Kulije kawemi kakumwenera munthu kwakuluska aka, kuti warye na kumwa na kusangwa mu milimo yake.”​—MUPHARAZGI 2:24.

Tili kulengeka kuti tikhorwenge na mulimo uwo tikucita. Nanga mungaŵa mu nyengo za masuzgo, mungaŵa na umoyo wakukhorweska para mukulimbikira nchito na kugwira mwakugomezgeka.

FUNDO YA MU BAIBOLO: “Muli kukondwa kukuru mu kupeleka kuluska mu kupokera.”​—MILIMO 20:35.

Ŵanandi ŵasanga candulo comene ndiposo umoyo wakukhorweska cifukwa ca kovwira ŵanji mu nyengo ya masuzgo. Mwaciyelezgero, ŵakugwiliskira nchito nyengo yawo na nkhongono zawo pakovwira ŵanji. Solomoni wakalemba kuti: “Ungaŵakaniranga uwemi awo ŵakwenera kupokera para kuli mu nkhongono zako kuti uwucite.”​—Zintharika 3:27.

Wonani umo wakacitira Ralph. Wakati wapumura pa nchito, nayo wakamba kupharazga nyengo zose na muwoli wake. Mwezi uliwose ŵakumalira nyengo yinandi pa  kupharazga, ndipo ŵakujipeleka kusambizga ŵanji Baibolo. Ralph wakuti: “Para tafika pa nyumba namise, tikuŵa ŵakuvuka cifukwa ca ucekuru pera yayi, kweni cifukwa ca kucita uteŵeti wa Adada ŵithu ŵakucanya. Nchiwemi kuvukira pa mulimo uwemi.” Iyo na muwoli wake mbakukondwa cifukwa ŵakuŵikapo mtima pakovwira ŵanji.

FUNDO YA MU BAIBOLO: “Mwanase wakutemwa nyengo zose, ndipo mwanamunyako wakubabiwira kovwira mu suzgo.”​—ZINTHARIKA 17:17.

Taŵanthu tikukhalirana. Mulembi munyake zina lake Francis Bacon wakalemba kuti awo ŵalije ŵabwezi, “ŵakuŵa nga ŵali mu mapopa.” Para uli na ŵabwezi ndiposo ndiwe mubwezi muwemi umoyo ukuŵa wakukondweska ndiposo wacandulo.

FUNDO YA MU BAIBOLO: “Mbakukondwa awo ŵakumanya kusoŵerwa kwawo kwauzimu.”​—MATEYU 5:3.

Yesu wakayowoya kuti cinthu cakuzirwa comene para tikukhumba kusangwa na ivyo Ciuta walayizga nchakuti tikwenera kumanya na kumazga ‘kusoŵerwa kwithu kwauzimu.’ Mwakupambana na vinyama, ise tili kubabika na khumbo lakuti timanye cifukwa ico tili kulengekera. Yehova pera ndiyo wangamazga khumbo ili, ndipo wacita nthena kwizira mu Mazgu ghake, Baibolo. Nga umo tawonera mu nkhani iyo yajumpha, Baibolo likuyowoya khumbo la Ciuta kulazga ku caru capasi. Likutiphalira cifukwa ico wakatilengera, cifukwa ico kuliri masuzgo ghanandi, ndiposo ivyo Ciuta wakukhumba kuti ticitenge. Nchakuzirwa comene kumanya vinthu ivi cifukwa kungawovwira kuti umoyo withu uŵe wacandulo ndiposo wakukhorweska. Awo ŵakupatura nyengo kusambira Baibolo ndiposo kulondezga ivyo ŵasambira mbakukondwa. Cifukwa wuli? Cifukwa nchakuti ŵakukhozga ubwezi wawo na Mlengi, Yehova uyo ni “Ciuta wakukondwa.”—1 Timote 1:11.

FUNDO YA MU BAIBOLO: “Kumbuka Mlengi wako . . . ghandafike mazuŵa ghaheni, na vilimika vindaneng’enere, mwa ivyo wamkunena kuti, ‘Nkhukondwera mwa ivyo cara.’”​—MUPHARAZGI 12:1.

Nangauli Themba Solomoni likuciska ŵanyamata, awo ŵangatondeka kumanya kuti ŵangakumana na masuzgo mu umoyo wawo, kweni fundo iyi njakuzirwa kwa tose. Ŵani na cilato ca kuteŵetera Mlengi winu. Ici ndico cingapangiska umoyo winu kuti uŵe wacandulo. Kanani maghanoghano ghakuti: “Tiyeni tirye na kumwa, cifukwa macero tifwenge.” (1 Ŵakorinte 15:32) Para Ciuta mukumuŵika pakwamba,  vinthu vimwenderaninge makora nga umo lemba la Mupharazgi 8:12 likulongolera.

Msungwana munyake zina lake Wendi wakawona kuti uwu mbunenesko. Apo wakaŵa muwukirano, iyo na munung’una wake ŵakasambira ciyowoyero ca Cispanishi mwakuti ŵasamire ku Domican Republic, uko kukakhumbikwanga ŵapharazgi ŵanandi ŵa makani ghawemi gha mu Baibolo. Iyo wakuti: “Nangauli tikaleka vinthu vinandi kuti tikateŵetere uko kukakhumbikwanga ŵapharazgi ŵanandi, kweni tikaŵanga ŵakusangwa comene. Palije cinthu cinyake cakujumpha ici, ico nkhatenge nicitenge mu myezi yinkhondi na umoza. Vitumbiko ivyo tikasanga vikajumpha vinthu ivyo tikavileka.”

Umoyo Ukuŵa Wacandulo Para Tikugomezgeka kwa Ciuta

Umoyo withu ungaŵa wacandulo para tikukhozga ubwezi withu na Yehova. Cifukwa wuli? Satana wakapangiska Adamu na Eva kuti ŵagalukire muwuso wa Ciuta pera yayi, kweniso wakayowoya kuti palije uyo wangalutilira kugomezgeka kwa Ciuta para wangayezgeka. (Job 1:9-11; 2:4) Mungalongora kuti Satana ni mutesi. Mwawuli? Mwakulutilira kuŵa ŵakugomezgeka kwa Ciuta, kupulikira malango ghake, ndiposo kulongora kuti mukumanya kuti Yehova ndiyo ngwakwenelera nadi kutisankhira ico nchiwemi na ico nchiheni.—Uvumbuzi 4:11.

Tikwenera kuzizipizga para tikukhumba kwenda nthowa yakunyoloka. Kasi masuzgo ghatitondeskenge kuti tiŵe na umoyo wacandulo? Tiyelezgere kuti mulwani winu wakunanga lumbiri lwa mubwezi winu panji mbali winu. Kasi umoyo ungaŵa wambura candulo cifukwa ca kuvikilira lumbiri lwa mubwezi winu? Yayi. Tingazizipizga masuzgo mwakuti tivikilire lumbiri lwa mubwezi withu. Vikuyana waka na kulutilira kugomezgeka kwa Ciuta. Ciuta wakukondwa para tikugomezgeka nyengo zino za masuzgo.—Zintharika 27:11.

Umoyo Wacandulo Kwamuyirayira

Citani ivyo mungafiska kuti musambire vyose vyakukhwaskana na Ciuta ndiposo khumbo lake. Yesu Khristu wakati: “Kuti ŵaŵe na umoyo wamuyirayira, ŵakwenera kumumanyani imwe Ciuta waunenesko yekha, ndiposo Yesu Khristu, mweneuyo mukamutuma.” (Yohane 17:3) Para Ciuta wafiska khumbo lake pa caru capasi, ŵanthu ŵakugomezgeka ŵazamuŵa na “umoyo wamuyirayira” mu paradiso pa caru capasi nga umo Yehova wakakhumbiranga pakwamba. Pa nyengo iyo, umoyo uzamuŵa wacandulo ndiposo wakukhorweska.—Salmo 145:16.

Ni nkhu uko mungasambira za Ciuta na Yesu Khristu? Mungasambira mu Mazgu gha Ciuta, Baibolo. Para mukukhumba ŵanji ŵamovwirani umo mungasambilira, lemberani ŵeneco ŵa magazini iyi. Ŵazamuŵa ŵakukondwa kumutumirani munyake uyo wangamovwirani kusambira ivyo Baibolo likusambizga.