Ufayssiya Deˈuwaa Ha Wodiyan Gidin Merinaukka

HA WODIYANKKA gidin ufayssiya deˈuwaa deˈana danddayaasa. Ayba ogiyan? Xoossaa Qaalaa, Geeshsha Maxaafan deˈiya aadhida eratettay deˈiyo baaso siraataa kaalliyoogaana. Hegeetuppe amaridaageeta ane beˈoos.

GEESHSHA MAXAAFAA BAASO SIRAATAA: Kawuwaa Solomoni, “Asassi go77a gidiyaabi aibee giikko, asi ba daafuridobaappe miidinne uyidi ufaittiyoogaa” yaagidi xaafiis.—ERA. 2:24.

Xoossay nuuni loˈˈo oosuwaa oottiyoogan ufayttanaadan ootti medhiis. Ubba metiya hanotan deˈiiddikka, ha wodiyan minnidinne ammanettiyaageeta gididi oottiyoogan deˈuwan amarida ufayssaa demmana danddayoos.

GEESHSHA MAXAAFAA BAASO SIRAATAA: “Ekkiyaagaappe immiyaagee anjjettidaagaa.”—OOS. 20:35.

Daroti haratuyyo loˈˈobaa oottiyoogee, giishin bantta wodiyaanne wolqqaa metootidaageeta maaddanau goˈettiyoogee, daro anjjuwaa demmanaadaaninne bantta deˈuwan kaseegaappe aaruwan ufayttanaadan oottidoogaa akeekidosona. Solomoni, “Neeyyo wolqqai de7ishin, metootidaagau lo77obaa oottiyoogaa aggoppa” yaagidi xaafiis.—Lee. 3:27.

Ralfa leemisuwaa beˈa. I xurataa kiyi simmidi, ba keettaayeedan kumetta wodiyaa haggaaziyaagaa gidiis. Eti naaˈˈaykka asaa Geeshsha Maxaafaa tamaarissiyoogan aginan aginan daro saatiyau haggaazoosona. Ralfi hagaadan giis: “Nuuni omarssan soo simmiyo wode keehippe daafuroos; hegee  nuuni cimido gishsha xallaassa gidennan, nuuyyo deˈiya wolqqaa ubbaa goˈettidi saluwan deˈiya nu Aawau oottiyo gishshataassa. Hegee bessiya daafura!” Inne a keettayiyaa bantta xeelaa wottidoy hara asau immiyoogaana gidiyo gishshau, keehippe ufayttoosona.

GEESHSHA MAXAAFAA BAASO SIRAATAA: “Laggee mule wodekka siiqees; ishaikka metuwaa wode maaddanaassi yelettees.”—LEE. 17:17.

Metoy gakkiyo wode miyyiyan asi deˈikko, darin metootokko. Inggilize biittaa asa gidida xaafee, Fransis Bekeni, tumu laggee baynna urau “alamee battaale bazzo mala” yaagidi xaafiis. Nuuni tumu laggeti deˈiyoogeeta gidiyoogeenne haratuyyo loˈˈo lagge gidiyoogee, deˈuwan gakkiya metuwaa genccanaadan, ubba deˈoy ufayssiyaagaa gidanaadan oottana danddayees.

GEESHSHA MAXAAFAA BAASO SIRAATAA: “Bantta ayyaanan hiyyeesa gididoogaa eriyaageeti anjjettidaageeta.”—MAA. 5:3.

Yaatiyo gishshau, neeni Xoossay qaalaa gelidobay polettiyo wode deˈanau koyikko, hegau keehippe koyettiyaabaa, giishin ‘ayyaanaaban’ koshshiyaabaa erananne hegaa kunttana bessiyoogaa Yesuusi qonccissiis. Mehiyaappe dumma gidida hanotan, nuuni meretan halchoy deˈiyoonne ufayssiya deˈuwaa deˈanau koyoos. He koshshaa kunttana danddayiyay Xoossaa Yihoowa xalla; i hegaadan oottiyoy ba Qaalaa, Geeshsha Maxaafaa baggaara. Kasetiya huuphe yohuwan beˈidoogaadan, Geeshsha Maxaafay, Xoossay saˈau halchidobaa qonccissees. Nuuni ha saˈan deˈiyoy, qassi metoynne tuggay deˈiyoy aybissakko, hegaadankka, Xoossay nuuppe koyiyoy aybakko qonccissees. Geeshsha Maxaafan qonccida ha tumaa eriyoogee, nuuni ufayssiya deˈuwaa deˈanau keehippe koshshiyaaba. Wodiyaa bazzidi Geeshsha Maxaafaa xannaˈiyaageetinne hegaa wotti denttidi qoppiyaageeti keehippe ufayttoosona. Aybissi giikko, eti hegaadan oottiyoogan, nuna Medhida, “ufayttiya Xoossaa,” Yihoowaara mino dabbotaa medhoosona.—1 Xim. 1:11, NW.

GEESHSHA MAXAAFAA BAASO SIRAATAA: “Nena Medhdhidaagaa qoppa. Metiya gallassati yeennan de7ishin, neeni, ‘Tana hagee ufaissenna’ giyo wodeti gakkennan de7ishin.”—ERA. 12:1.

Deˈuwan nuna guyyeppe gakkiya metuwaa akeekibeenna yelagata, Kawuwaa Solomoni zorido zoree nuna ubbaa goˈˈiyaaba. Ne deˈuwan nena Medhidaagaa xoqqu ootta xeella. Hegee, ne deˈoy tumu halchoy deˈiyoogaa gidanaadan oottees. “Simmi moosinne uyoos; aissi giikko, nuuni wontto haiqqana” giyo qofaappe haakka. (1 Qor. 15:32) Eranchchaa 8: 12y, neeni Xoossaa kaseyiyaaba gidikko, neeyyo “sa7ai lo77anaagaa” yootees.

Wenddo giyo naˈiyaa hegee tuma gidiyoogaa akeekaasu. Yelagatettan deˈaydda, Geeshsha Maxaafaa mishiraachuwaa yootiyaageeti keehippe koshshiyo, Doominkkan Ripubilike baanau qoppada, ba micheera Isppeene qaalaa tamaaraasu. A hagaadan gaasu: “Mishiraachuwaa yootiyaageeti keehippe koshshiyoosaa biidi haggaazanau darobaa aggidaba gidikkokka, nu deˈuwan daro ufayttida. Taani he usuppun aginatun oottidobaara geeddarssana danddayiyo harabi baawa! Nuuni demmido anjjuwaara gatti xeelliyo wode, aggidobay keehi guutta.”

Xoossaayyo Ammanettiyoogee Deˈuwaa Ufayssiyaagaa Oottees

Neeni Yihoowaara mino dabbotaa medhiyoogan, issi dumma gidida hanotaara gayttidaagankka, deˈuwan keehi ufayttana danddayaasa. Ayba ogiyan? Seexaanay, Addaameenne Hewaana Xoossaa haaruwan makkalanaadan oottiyoogaa xalla gidennan, ooninne paacettikko Xoossaayyo ammanettidi deˈana danddayennaagaakka yootiis. (Iyy. 1:9-11; 2:4) Neeni Seexaanay worddancha gidiyoogaa qonccissana danddayaasa! Waatada? Xoossaayyo ammanettada deˈiyoogan, i kessido baaso siraataa minttada kaalliyoogaaninne nuussi loˈˈonne iita gididabaa kuuyiyo, Yihoowa gita maataa akeekidoogaa bessiyoogan hegaadan oottana danddayaasa.—Ajj. 4:11.

Nuuni suuretettan deˈanau koyikko, gakkiya metuwaa gencciyoogaa koshshana danddayees. Hegaa mala metoy nuuni deˈuwan ufayttennaadan oottanee? Issi morkkee nu siiqiyo laggiyaa woykko nu soo asaappe issi uraa sunttaa mooriiddi deˈiyaabadan qoppa. Nuuni siiqiyo uraa sunttau exatiyoogee, he morkkee nu bolli amarida ogiyan metuwaa gattanaadan oottiyaaba gidikkokka, hegee nuuni deˈuwan ufayttennaadan oottanee? Akkay! Ubba nuuni he uraa sunttau exatiyoogan gakkiya metuwaa ufayssan genccoos. Xoossau ammanettiyoogeekka hegaara issi mala. Ha wodiyan metiya hanotati deˈishinkka au ammanettiyaageeta gidiyoogee Xoossaa ufayssees.—Lee. 27:11.

Merinau Ufayssiya Deˈuwaa

Hegaa gishshau, Xoossaanne a halchuwaabaa eranau neeni danddayiyo ubbabaa ootta. Yesuus Kiristtoosi ba huuphe “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagiis. (Yoh 17:3) Xoossay saˈau halchidobaa poliyo wode, ammanettida asay, Yihooway etau koyro halchidobaa, giishshin gannate gidida saˈan ‘merinaa deˈuwaa’ demmana. He wode deˈoy ufayssiyaagaa gidana.—Maz. 145:16.

Yaatin, Yesuusi yootido eraa awuppe demmana danddayay? Xoossaa ayyaanaa kaaletuwan xaafettida Geeshsha Maxaafaappe demmana danddayaasa. Hegaadan oottanau maaduwaa koyiyaaba gidikko, ha maxeetiyaa giigissiyaageetuyyo xaafanau guyye gooppa. Geeshsha Maxaafay tamaarissiyoobaa neeni akeekanau, issi uri maaddanaadan eti ufayssan hanotaa giigissana.