Nyikke Cok Bot Lubanga

Jehovah Tika Cwinye Twero Cwer Nyo Bedo Yom?

KA CE lagamme tye ni eyo, ci man dok kelo lapeny mukene: Tika yo me kwowa romo gudu kit ma Lubanga winyo kwede ki i cwinye? Nyo ni, jami ma watimo mono gitwero yomo nyo cwero cwiny Lubanga? Lutam mogo matego me kare macon gukwero lok magi woko. Gin gicero lok kun giwaco ni pe tye ngat mo ma twero diyo Lubanga ki tam dok Lubanga bene pe twero winyo gin mo ki i cwinye. Ento Baibul pwonyowa ki gin mukene, waco ni Lubanga winyo ki i cwinye dok paro pi gin ma watimo. Nen kong lok ma nonge i Jabuli 78:40, 41.

Jabuli 78 tye ki jami ma pigi tego ma obedo ka timme i kom rok me Icrael ki dong kit ma Lubanga odok iye. I nge kwanyo rok meno ki i opii i lobo Ejipt, Jehovah omine me bedo ki wat ma dok pat kwedgi. En ocikke ni ka ce gumedde ki bedo luwiny i lubo cikke, ci gibidoko ‘jone kikome’ dok ebitic kwedgi me cobo yubbe i yo me aura. Lwak guye ci gudonyo i Gicikke. Tika gutimo gin ma guye me timone-ni?​—Nia 19:3-8.

Laco jabuli owaco ni: “Gujemo i kome i tim pi kare mapol; gucwero cwinye i aroo.” (Tyeng 40) Tyeng ma lubo meno medde ni: “Gubedo ka temo Lubanga teretere, gumiyo kiniga omako Ngat Maleng pa Icrael.” (Tyeng 41) Nen kong kit ma laco jabuli otito kwede ni gubedo ka jemo teretere. Kit cwiny me jemo i kom Lubanga-ni ocakke ki i aroo i nge kare manok keken ma kikwanyogi ki i Ejipt. Lwak gucako nguru i kom Lubanga, kun gikalo akala ka ce en mito dok bene twero gwokogi. (Wel 14:1-4) Buk mo ma konyo jo ma gonyo Baibul i leb mapat pat waco ni, “gujemo i kome” kitwero “gonyone i yo mukene ni ‘gutudo cwinygi liking i kom Lubanga’ nyo ni ‘gin guwaco bot Lubanga ni “Pe waye”’” Ento pud inongo ni, pi kica pa Jehovah, omiyo en onongo weko balgi ka gunyutu ni gingut. Ento lacen gidok i kit kwogi macon-ni dok gijemo woko i kome, gubedo ka medde kumeno.​—Jabuli 78:10-19, 38.

Jehovah mono owinyo nining i kare ma jone ma gipe ki niye-ni gijemo i kome? Tyeng 40 waco ni, “gucwero cwinye.” Baibul mukene waco ni gin onongo “gitimo gin ma kelle kumo.” Buk mo acel ma loko i kom Baibul otito ni: “Tyen lok man aye ni kwo pa Luibru-ni onongo kelo arem cwiny,—marom aroma ki kwo pa latin ma pe lawiny dok bene lajemo.” Kit ma latin ma pe lawiny twero cwero cwiny lunyodone-ni, Luicrael ma lujemo-ni “gumiyo kiniga omako Ngat Maleng pa Icrael.”​—Tyeng 41.

Gin ango ma watwero pwonyone ki i jabuli man? Ngeyo ni Jehovah tye ki wat matek i kin en ki jo ma giwore dok ni en pe rwenyo gen i komgi oyotoyot miniwa tekcwiny. Ki bene, mitte ni myero wange ni Jehovah winyo ki i cwinye dok kit ma wakwo kwede twero cwero cwiny. Ngeyo lok meno gudo in nining? Man mono cuko cwinyi me timo gin matir?

Ma ka lubo yo me bal kun waweko cwiny Jehovah cwer, watwero yero yo matir wek wayom cwinye. Dok man aye gin ma en mito ki bot jo ma wore ni: “Latinna, bed ryek, wek iyom cwinya.” (Carolok 27:11) Kwo i yo ma yomo cwiny Jehovah aye pud dong gin ma pire tek loyo ma watwero miyone bote.

[Boro buk i pot karatac 32]

Kwo i yo ma yomo cwiny Jehovah aye pud dong gin ma pire tek loyo ma watwero miyone bote