Diosar jakʼachasipxam

¿Diosax kusisita jan ukax llakit jikxatasispati?

UKHAMÄCHI ukhaxa, ¿luratanakasax Diosan chuymap ustʼayaspati jan ukax kusisiyaspacha? Diosarux janiw khitis chuym ustʼaykaspati ni kusisiykaspasa sasaw nayra filosofonakax amuyapxirïna. Ukampis Bibliax janiw ukham yatichkiti, jan ukasti luratanakasax Diosarux chuym ustʼayaspawa jan ukax kusisiyaspawa sasaw yatichi. Uka tuqit sum amuytʼañatakix Salmo 78:40, 41 qillqatanak uñxattʼañäni.

Nayra israelitanakan luratanakap uñjasax kunjamsa Jehová Diosax jikxatasïna ukwa Salmo qillqatax uñachtʼayistu. Jehová Diosax Egiptot esclavöñat qhispiyäna uka qhipatxa, Leyinak tuqiw jupanakampix mä arustʼäwir mantäna ukat Jupampi wali sum apasipxaspa ukwa munäna. Jupanakatï uka leyinak istʼapxaspänxa, ‘suma munat markapäpxasapänwa’ ukat Diosax jupanak tuqiw amtap phuqaspäna. Israelitanakax iyaw sapxänwa, ukampis ¿arsutanakaparjam phuqapxpachänti? (Éxodo 19:3-8.)

“¡Walja kutiw Diosarux jan jaysapkänti[!]” sasaw salmonak qillqirix qhanañchi (40 jiskʼa tʼaqa). Ukat akham saskakiwa: “Wasitatsa, yantʼasipkakïnwa” sasa (41 jiskʼa tʼaqa). Kunjamtï aka qillqatanakax amuytʼaykistuxa, israelitanakax sapa kutiw Diosar kutkatasipxäna. Egiptot qhispiyatäpxatapat janiw walja tiempo paskänti, ukhaw wasaran Dios contra jan respetompi saytʼasipxäna. Ukat Diosax janis chʼamanïkaspa ukat janis jupanakar arxatañ munkaspa ukhamwa jan walinak parlapxäna (Números 14:1-4). Biblia yaqha arur jaqukipapki ukanakar yanaptʼañatak mä libronxa, akham sasaw qhanañchi: “‘Walja kutiw Diosarux jan jaysapkänti’ siski uka arunakaxa, ‘Dios contra chuymap qalarayasipxäna’ jan ukax ‘Dios contra kutkatasipxäna’ sasaw jaqukipasirakispa” sasa. Ukhamäpkchïnsa, Jehová Diosax wali khuyapayasiñapatwa arrepentisipkäna ukhax juchanakapat pampachäna. Ukampis tiempompix wasitatwa jan walinak lurasin Diosar kutkatasipxäna (Salmo 78:10-19, 38).

Ukham kutkatasipxatapatxa, ¿kunjamsa Jehová Diosax chuymapan jikxataspachäna? “Chuym ustʼayapxäna” sasaw 40 jiskʼa tʼaqax qhanañchi. Ukat yaqha Biblianxa, “sintpunwa Diosarux llakisiyapxäna” sasaw saraki. Uka jiskʼa tʼaqatxa akham sasaw mä librox qhanañchi: “Kunjamtï kutkatasir mä wawax awk taykapar chuymap ustʼaykixa, ukhamwa hebreonakax jan ukax israelitanakax luratanakapamp Diosar chuym ustʼayapxäna. Ukwa Salmo qillqatax qhanstayañ muni” sasa. Chiqas jan istʼasir wawanakax awk taykaparux llakisiyapxiwa, ukhamwa kutkatasir israelitanakax Qullan Diosapar “llakisiyapxäna” (41 jiskʼa tʼaqa).

¿Kunsa uka Salmo qillqatat yatiqsna? Jehová Diosax yupaychirinakaparux wal munasi ukat janiw jan perdonañjam juchararäpkaspas ukham uñjkiti. Chiqas uk yatiñax wali kusiskañapuniwa. Maysa tuqitxa, Jehová Diosax janiw qala chuymanïkiti, ukatwa luratanakasax chuymap ustʼayaspa jan ukax kusisiyaspa, ukwa yatiqawayaraktanxa. Ukhamasti, ¿ukanak yatiñax janit sum sarnaqañatak wiytkistu?

Jan wali luratanakasampi Diosar chuym ustʼayañat sipansa sum sarnaqasin kusisiyapxañäni. Ukwa Jupax sapa maynit suyaraki. Ukatwa Proverbios 27:11 qillqatax akham iwxtʼistu: “Munat wawaxay, yatiñanïmaya, nayarux kusisiyitätawa” sasa. Jïsa, kunapachatï yupaychirinakapax Jehová Diosar kusisiyañataki aruparjam sarnaqapxi ukhaxa, Jupax wali kusisitaw jikxatasi.