Palameni Kuli Lesa

Bushe Ifyo Tucita Kuti Fyalenga Yehova Ukusekelela Nelyo Ukukalipa?

ABA ku kale bamo abasambilile amano ya buntunse balekaana ukuti ifyo tucita te kuti filenge Lesa ukusekelela nelyo ukukalipa. Baleti ifyo fwe bantu tucita te kuti fikume Lesa. Lelo Baibolo isambilisha ifyapusanako. Itila Yehova alabika amano ku fyo tucita kabili ifyo tucita kuti fyamulenga ukusekelela nelyo ukukalipa. Ku ca kumwenako, tontonkanyeni pa mashiwi yaba pa Amalumbo 78:40, 41.

Amalumbo 78 yalanda pa fyo abena Israele balecita na pa fyo Lesa aleumfwa. Ilyo Yehova abalubwile mu Egupti, abebele ukuti alefwaya babe abantu bakwe. Abalaile ukuti nga bali no kulaumfwila amafunde yakwe, bali no kuba “icipe [cakwe] ica mutengo” kabili ali no kubabomfya ku kufikilisha ukufwaya kwakwe. Abena Israele balisumine kabili bapangene nankwe icipangano ca Mafunde. Bushe balitwalilile ukukonka ifyo bapangene?—Ukufuma 19:3-8.

Uwaimbile amalumbo atile: “Balemupondokela imiku iingi mu mpanga!” (Icikomo 40) Icikomo cakonkapo citila: “Libili libili bale-esha Lesa.” (Icikomo 41) Abena Israele balepondokela Lesa libili libili. Batendeke ukucita ifi ilyo bali mu mpanga pa numa fye babalubwile mu Egupti. Abena Israele batampile ukuilishanya kuli Lesa, baletwishika nga ali no kulabasakamana. (Impendwa 14:1-4) Icitabo ico abapilibula amaBaibolo babomfya catila amashiwi ya kuti “balemupondokela” kuti “yapilibulwa no kuti ‘balitaleme’ nelyo ukuti ‘balekaanina Lesa.’” Lelo pa mulandu wa kuti Yehova wa luse, ale-elela abantu bakwe nga balapila. Na lyo line, balemupondokela na kabili, na o Lesa alebelela nga balapila kabili ifi fine e fyo caleba lyonse.—Amalumbo 78:10-19, 38.

Bushe Yehova aleumfwa shani ilyo abantu bakwe balemupondokela? Icikomo 40 citila: ‘Balemulungulusha.’ Baibolo imbi yena yatila “balemukalifya umutima.” Icitabo cimo icilanda pali Baibolo cilondolola ukuti: “Aya mashiwi yapilibula ukuti ifyo abaHebere balecita fyalekalifya Lesa, nga filya umwana cintomfwa akalifya abafyashi bakwe.” Nga filya fine umwana uushumfwa akalifya umutima wa bafyashi bakwe, e fyo abena Israele nabo “bakalifye Uwa mushilo uwa kwa Israele.”—Icikomo 41.

Finshi twingasambilila ku lyashi lyaba mu Amalumbo 78? Tulasansamushiwa ukwishiba ukuti Yehova alasakamana sana abamupepa kabili alabatekanishisha. Kabili ukwishiba ukuti ifyo tucita filalenga Yehova ukusekelela nelyo ukukalipa kulalenga ukuti tube na katiina nga nshi. Bushe mwaumfwa shani ifi mwaishiba ukuti ifyo mucita kuti fyalenga Yehova ukusekelela nelyo ukukalipa? Bushe ukwishiba ifi kwalalenga mulecita icalungama?

Mu nshita ya kucita ulubembu no kulenga umutima wa kwa Yehova ukukalipa, tufwile ukusalapo ukulacita icalungama no kulenga umutima wakwe ukusekelela. Na kuba, ifi fine e fyo afwaya abamupepa ukulacita. Abeba ukuti: “We mwana wandi, ube na mano, kabili ulenge umutima wandi ukusekelela.” (Amapinda 27:11) Takwaba icintu nangu cimo icacindama ico twingapeela Yehova ukucila pa kulacita ifintu ifilenga umutima wakwe ukusekelela.

Amalembo ya Kubelenga mu July:

◼ Amalumbo 60–86

[Amashiwi pe bula 10]

Takwaba icintu nangu cimo icacindama ico twingapeela Yehova ukucila pa kulacita ifintu ifilenga umutima wakwe ukusekelela