KE O vakaio, e dua tale na taro qo: E kauai na Kalou ena ka eda dau cakava? E rawa beka ni vakamarautaki koya se vakararawataki koya na noda itovo? Era kaya eso na vuku ena gauna makawa ni sega ni dina qori. Na nodra ile ni sega ni rawa ni vakamuai na Kalou ena dua na ka, kena rairai gona ni sega ni kauai ena ka e dau yaco. Ia e tukuna na iVolatabu ni dau yalololoma o Jiova, e kauai vakalevu tale ga ena ka eda cakava. Raica mada na ka e tukuni ena Same 78:40, 41.

E vakamacalataki ena Same 78 eso na ka bibi e yaco e Isireli kei na veika e cakava kina o Jiova. A lomasoli o Jiova me tauyavutaka e dua na veiyalayalati talei kei ira na Isireli ni oti na nona vakabulai ira ena nodra tu vakabobula mai Ijipita. Ke ra talairawarawa tiko ga ena nona lawa, a yalataka nira na nona “[i]yau talei,” e vakasakiti tale ga na sala ena vakayagataki ira kina ena vakayacori ni nona inaki. Era vakadonuya qori na Isireli ra qai ciqoma na veiyalayalati ena Lawa. Ia era cakava beka na ka era yalataka?—Lako Yani 19:3-8.

E tukuna na daunisame: “A ka tani na nodra talaidredre vua mai na veikau!” (Tikina e 40) Na tikina tarava e tukuna: “Era sa vuki tani ka vakatovolei koya vakaca na Kalou.” (Tikina e 41) E tukuna tiko e keri na daunisame ni sa nodra ivakarau na Isireli na talaidredre. Na nodra veibeci kei na nodra talaidredre a tekivu sara mai na vanualiwa nira se qai vakabulai ga mai Ijipita. Era vosakudrukudrutaka na Kalou, era lomatarotarotaka ke na karoni ira dina, ke vinakata tale ga me cakava qori. (Tiko Voli Mai na Lekutu 14:1-4) E tukuni ena dua na nodra ivoladusidusi na dauvakadewa iVolatabu ni malanivosa “nodra talaidredre vua” e rawa ni “tukuni tale ga ‘nira vakalomaqataki ira vua na Kalou’ se ‘nira tukuna vua na Kalou’ “Sega.”” Ena nona yalololoma, a vosoti ira na nona tamata o Jiova nira veivutuni. Ia era lesu ina nodra ivakarau e liu ra baci talaidredre tale, qai va tu qori na kena ivakarau.—Same 78:10-19, 38.

Na cava na rai i Jiova me baleta na nodra dau talaidredre na nona tamata? E tukuni ena Same 78:40: “[Era] vakararawataki koya.” E tukuna e dua tale na kena ivakadewa nira “vakavuna na nona rarawa.” E vakamacalataka e dua na ivoladusidusi ni iVolatabu: “Kena ibalebale, na nodra ivalavala na Iperiu e vakavuna na rarawa—me vaka ga na rarawa e vakilai ni talaidredre qai murilomana e dua na gone.” Na gone e dau vakaunona ena vakamosia dina na yalodrau na nona itubutubu, na nodra talaidredre tale ga na Isireli e “vakacudrui se vakararawataki koya na Yalosavasava ni Isireli.”—Tikina e 41.

Na cava eda vulica ena same qori? E veivakacegui na noda kila ni kauaitaki ira vakalevu na nona tamata o Jiova, e sega ni dau vuturi totolo ena ka era cakava. Ia meda nanuma tiko ni kauai o Jiova ena ka e dau yaco, e rawa ni tarai koya na ka eda cakava. Na nomu kila qori ena uqeti iko beka mo cakava na ka e dodonu?

E rawa nida vakatulewataka meda vakamarautaki Jiova nida cakava tiko ga na ka e dodonu, meda kua ni vakararawataki koya ena noda cakava tiko ga na veika ca. Qori sara ga na ka e vakamasuti ira kina na qaravi koya: “Mo vuku, na luvequ, ka vakamarautaka na lomaqu.” (Vosa Vakaibalebale 27:11) Na ka talei duadua eda rawa ni cakava, meda muria na ivakarau ni bula ena vakamarautaka na lomai Jiova.