Dọnsẹpọ Jiwheyẹwhe

Be Jehovah Tindo Numọtolanmẹ Ya?

EYIN gblọndo lọ yin mọwẹ, be kanbiọ devo sọ fọndote, yèdọ: Be walọyizan mítọn nọ yinuwado Jiwheyẹwhe ji ya? Enẹ wẹ yindọ, be nuyiwa mítọn lẹ sọgan hẹn homẹ Jiwheyẹwhe tọn hùn kavi hẹn ẹn gblehomẹ ya? Tamẹnuplọnmẹtọ hohowhenu tọn delẹ dọ lala. Yé kudeji dọ mẹde ma sọgan yinuwado Jiwheyẹwhe ji, enẹwutu Jiwheyẹwhe ma sọgan tindo numọtolanmẹ. Ṣigba nuhe Biblu plọn mí gbọnvo, na e dohia dọ, Jehovah nọ tindo numọtolanmẹ sisosiso podọ nuhe mí to wiwà nọ duahunmẹna ẹn taun. Lẹnnupọndo hogbe he yin mimọ to Psalm 78:40, 41 mẹ lẹ ji.

Psalm 78 bẹ kandai lehe Jiwheyẹwhe yinuwa hẹ Islaeli hohowhenu tọn do tọn hẹn. To whenue Jehovah whlẹn akọta lọ sọn kanlinmọgbenu to Egipti godo, e biọ nado wleawuna haṣinṣan vonọtaun de hẹ yé. E dopagbe dọ eyin yé setonuna osẹ́n emitọn lẹ, yé na lẹzun “adọkunnu vivẹ́” emitọn bo na yin yiyizan to aliho vonọtaun de mẹ nado hẹn lẹndai emitọn di. Islaelivi lẹ yigbe bo biọ alẹnu Osẹ́n tọn lọ mẹ. Be yé nọgbẹ̀ sọgbe hẹ opà yetọn ya?—Eksọdusi 19:3-8.

Psalm-kantọ lọ dọmọ: “Whla nẹmunẹmu wẹ yé ṣiatẹ hẹ ẹ to zungbo mẹ!” (wefọ 40) Wefọ he bọdego yidogọ dọmọ: “Nugbo, yé lẹ́ bo whlé Jiwheyẹwhe pọ́n [whlasusu].” (wefọ 41) Doayi e go dọ wekantọ lọ basi zẹẹmẹ lehe yé ṣiatẹ do tọn. Walọ mẹmasi po atẹṣiṣi po tọn ehe bẹjẹeji to tintan whenu—to zungbo mẹ, tlolo he yé yin tuntundote sọn Egipti godo. Islaelivi lẹ jẹ hùnhlún do Jiwheyẹwhe go ji, bo fọ́n ayihaawe dote eyin vlavo ewọ penugo bo tindo ojlo nado penukundo yé go. (Osọha lẹ 14:1-4) Owe alọdlẹndonu tọn de na lẹdogbedevomẹ-basitọ Biblu tọn lẹ dọ dọ hodidọ lọ “yé ṣiatẹ hẹ ẹ” sọgan yin “didọ to aliho devo mẹ taidi ‘yé hẹn ahun yetọn sinyẹn sọta Jiwheyẹwhe’ kavi ‘yé dọ “Lala” na Jiwheyẹwhe.’” Ṣogan, na lẹblanu etọn wutu, Jehovah nọ jona omẹ etọn lẹ eyin yé do lẹnvọjọ hia. Ṣigba yé nọ lẹkọ do aliho yetọn hoho lẹ ji bosọ nọ ṣiatẹ, podọ aṣa lọ zindonukọn.—Psalm 78:10-19, 38.

Etẹwẹ nọ yin numọtolanmẹ Jehovah tọn to whedepopenu he omẹ etọn lẹ ṣiatẹ? Wefọ 40tọ dọmọ: “[Yé] hẹn homẹgble e.” Lẹdogbedevomẹ devo dọ dọ yé “wà nuhe hẹn awubla wá na ẹn.” Owe he basi zẹẹmẹ do Biblu ji de dọmọ: “Linlẹn tangan lọ tofi wẹ yindọ aliho he mẹ Heblu lẹ yinuwa te hẹn awufiẹsa wá,—taidi nuyiwa ovi tolivẹtọ kavi atẹṣitọ de tọn.” Dile ovi tasinyẹntọ de sọgan hẹn awufiẹsa wá mẹjitọ etọn lẹ ji do, mọ wẹ Islaelivi atẹṣitọ lẹ “hẹn awusinyẹn Mẹwiwe Islaeli tọn lọ” do niyẹn.—Wefọ 41.

Etẹwẹ mí sọgan plọn sọn Psalm ehe mẹ? Jidevọnamẹ wẹ e yin nado mọdọ Jehovah yiwanna sinsẹ̀n-basitọ etọn lẹ podọ e ma nọ yawu jo yé do. To ojlẹ dopolọ mẹ, nuhe sọgbe hẹ lẹnpọn dagbe wẹ e yin nado yise dọ Jehovah tindo numọtolanmẹ podọ walọyizan mítọn nọ yinuwado ewọ ji. Nawẹ enẹ yinyọnẹn nọ yinuwado jiwe gbọn? Be e nọ whàn we nado wà nuhe sọgbe ya?

Kakati nado doafọna ylando bo hẹn awufiẹsa wá Jehovah ji, mí sọgan de nado doafọna dodo bo hẹn homẹ etọn hùn. Podọ nuhe e biọ to devizọnwatọ etọn lẹ si pẹpẹ niyẹn dọmọ: “Ovi ṣie, yin nuyọnẹntọ, bosọ hẹn homẹ ṣie hùn.” (Howhinwhẹn lẹ 27:11) Nuhọakuẹ hugan he mí sọgan na Jehovah wẹ nado nọgbẹ̀ to aliho he na hẹn ẹn jaya mẹ.

[Nudọnamẹ tangan to weda 10]

Nuhọakuẹ hugan he mí sọgan na Jehovah wẹ nado nọgbẹ̀ to aliho he na hẹn ẹn jaya mẹ