Si Kẹle Ọghẹnẹ

Kọ Oware O Sae Kẹ Jihova Uye Hayo Evawere?

OTẸRỌNỌ Ee họ uyo na, oyena o rẹ wha onọ ofa ze inọ: Kọ uruemu mai o rẹ sai duobọte Ọghẹnẹ udu? Ẹme nọ ma be ta na họ, kọ ma sae rọ ẹkwoma owojẹ mai ru eva were Ọghẹnẹ hayo ru nọ oware o jẹ dae? Egbaeriariẹ oke anwae jọ a ta nọ onana o rrọ ere he. A ta inọ uruemu ohwo o rẹ sai kpomahọ Ọghẹnẹ hẹ, inọ oware ovo o rẹ sae kẹ Ọghẹnẹ uye hayo evawere he. Rekọ oware nọ Ebaibol na o wuhrẹ omai u wo ohẹriẹ, Ebaibol ọ ta nọ oware o rẹ sai duobọte Jihova udu gbe inọ o wo ọdawẹ kpahe oware nọ ma bi ru. Roro kpahe eme nọ e rrọ Olezi 78:40, 41.

Olezi avọ 78 o ta kpahe oghẹrẹ nọ Ọghẹnẹ o yeri kugbe orẹwho Izrẹl anwae. Nọ Jihova o siwi orẹwho na no igbo Ijipti no, ọ tẹ ta nọ ọ gwọlọ ruọ obọdẹ usu kugbe ae. Ọ ya eyaa inọ otẹrọnọ ahwo na a re lele izi riẹ ẹsikpobi, a ti zihe ruọ “efe-agheghọ” kẹe, ọ vẹ jẹ rehọ ai ru iruo evaọ edhere ologbo ro ru ẹjiroro riẹ gba. Ahwo na a rọwo kugbe Jihova, a tẹ ruọ ọvọ Uzi na kugbei. Kọ a rria lele ọvọ nọ a re na?—Ọnyano 19:3-8.

Ọso-ilezi na ọ ta nọ: “Bro ẹse a wo udu kẹ e eva obọ igbrẹwọ!” (Owọ avọ 40) Owọ nọ u lele i rie o ta nọ: “Kẹse kẹse a jẹ dawo iẹ.” (Owọ avọ 41) Muẹrohọ inọ ọso-ilezi na ọ ta inọ aghẹmeeyo rai o jọ oware ikẹse kẹse. A dhesẹ ekpehre uruemu nana no emuhọ ze—evaọ obọ igbrẹwọ na, nọ a nwani siwi ai no igbo Ijipti no. Ahwo na a jẹ go mukpahe Ọghẹnẹ, be vro sọ Ọghẹnẹ ọ sae ginẹ rọ ẹro te ai gbe sọ u gine noi eva ze re o ru ere. (Ikelakele 14:1-4) Obe jọ nọ u re fi obọ họ kẹ efefafa Ebaibol o ta nọ a rẹ sae jẹ fa ẹme na “a wo udu kẹ e” inọ “’a ru udu rai gaga kẹ Ọghẹnẹ’ hayo ‘a se kẹ Ọghẹnẹ nọ Ijo.’” Ghele na, fiki ohrọ-oriọ, Jihova ọ jẹ hae rọ vrẹ rai nọ a te kurẹriẹ. Dede na, a vẹ wariẹ zihe kpohọ uruemu uyoma ovona jẹ wariẹ wọso Ọghẹnẹ, ere a je dhe erueru.—Olezi 78:10-19, 38.

Oghẹrẹ vẹ o jẹ hae jọ Jihova oma ẹsikpobi nọ ahwo riẹ nọ e dọmu hu na a tẹ ghẹmeeyo kẹe? Owọ avọ 40 o ta nọ a jẹ hai “ru ei eva dha.” Efafa Ebaibol ọfa jọ o ta nọ a jẹ hae “wha uweri sei.” Obe jọ nọ o ta kpahe Ebaibol na u ru ẹme na vẹ inọ: “Oware nọ a be jọ etenẹ ta na họ, uruemu ahwo Hibru na o jẹ wha edada sei,—wọhọ epanọ uruemu ọmọ nọ o re veghe uzou jẹ wọso o rẹ wha edada ze na.” Wọhọ epanọ ọmọ aghẹmeeyo ọ rẹ wha edada se ọsẹgboni riẹ na, ere ahwo Izrẹl nọ e jẹ wọso na a “rariẹ ofu Ọrẹri Izrẹl.”—Owọ avọ 41.

Eme ma rẹ sai wuhrẹ no olezi nana ze? O rrọ oware omosasọ nọ ma rọ riẹ inọ Jihova o wo uyoyou udidi kẹ enọ e be gọe gbe inọ ọ rẹ kaki kiuke ku ae he. Evaọ oke ovona, o roja re ma riẹ inọ oware o rẹ sai duobọte Jihova udu gbe inọ uruemu mai o rẹ sae kẹe uye hayo evawere. Ẹvẹ otoriẹ nana u ro kpomahọ owhẹ? Kọ o be wọ owhẹ gwọlọ ru oware nọ u kiehọ?

Ukpenọ ma rẹ ruabọhọ uzioraha jẹ wha edada se Jihova, ma rẹ sae salọ nọ ma re yeri uzuazọ nọ u kiehọ nọ u re ru udu riẹ ghọghọ. Yọ oye họ oware nọ ọ gwọlọ mi enọ e be gọe, ọ ta nọ: “Ọmọzae mẹ, wo areghẹ, re who ru omẹ eva were.” (Itẹ 27:11) Oware ofa o riẹ hẹ nọ ma rẹ sae kẹ Jihova nọ o ghare vi uzuazọ nọ ma re yeri evaọ edhere nọ u re ru udu riẹ ghọghọ.

[Ẹme nọ a fi ẹgba họ nọ ọ rrọ ẹwẹ-obe avọ 10]

Oware ofa o riẹ hẹ nọ ma rẹ sae kẹ Jihova nọ o ghare vi uzuazọ nọ ma re yeri evaọ edhere nọ u re ru udu riẹ ghọghọ