GE E ba karabo e le ee, gona go rotoga potšišo e nngwe e rego: Na boitshwaro bja rena bo kgoma maikwelo a Modimo? Ke gore, na ka boitshwaro bja rena re ka thabiša Modimo goba ra mo kweša bohloko? Boradifilosofi ba bangwe ba mehleng ya bogologolo ba ile ba re Modimo ga a na maikwelo. Ba bile ba ganeditše ka gore ga go na motho yoo a ka tutuetšago Modimo le gore Modimo o swanetše go ba a se na maikwelo. Eupša Beibele e nea kgopolo e fapanego, ya gore Jehofa o na le maikwelo a borutho e bile o tloga a ena le taba le seo re se dirago. Ela hloko mantšu ao a hwetšwago go Psalme 78:40, 41.

Psalme 78 e laodiša ditirišano tša Modimo le Isiraele ya bogologolo. Ka morago ga go ntšha setšhaba seo bokgobeng kua Egipita, Jehofa o ile a ithaopela go ba le tswalano e kgethegilego le bona. O ile a holofetša gore ge e ba ba ka dula ba ekwa melao ya gagwe, ba be ba tla ba “thoto ya [gagwe] e kgethegilego” gomme a ba diriša ka tsela e kgethegilego bakeng sa go phethagatša morero wa gagwe. Batho ba ile ba dumelelana le seo gomme ba tsena kgweranong ya Molao. Na ba ile ba phelela tumelelano yeo ya bona?—Ekisodo 19:3-8.

Mopsalme o re: “Ruri ba rabetše go yena gantši kua lešokeng!” (Temana 40) Temana e latelago e oketša ka gore: “Ba be ba leka Modimo gantši le gantši.” (Temana 41) Ela hloko gore mongwadi o hlalosa mokgwa wa borabele. Moya wo o mobe o iponagaditše ka pela—ge ba be ba le lešokeng kapejana ka morago ga go lokollwa ga bona Egipita. Batho ba ile ba thoma go ngongoregela Modimo, ba belaela ge e ba a ena le bokgoni goba a nyaka go ba hlokomela. (Numeri 14:1-4) Puku e nngwe ya ditšhupetšo ya bafetoledi ba Beibele e bolela gore mantšu a rego “ba rabetše go yena” a ka “fetolelwa e le sekapolelo se se rego ‘ba ile ba thatafišetša Modimo dipelo tša bona’ goba ‘ba ile ba ra Modimo ba re “Aowa.”’” Lega go le bjalo, ka baka la kgaugelo ya gagwe, Jehofa o be a fela a lebalela batho ba gagwe ge ba be ba bonagatša boitsholo bja bona. Eupša ba be ba fela ba boela ditseleng tša bona tša kgale gomme ba rabela gape, ke moka mokgwa wo wa tšwela pele ka yona tsela yeo.—Psalme 78:10-19, 38.

Jehofa o be a ikwa bjang nako le nako ge batho ba gagwe ba fokolago ba rabela? Temana 40 e re: “Ba [be ba] mo kweša bohloko.” Phetolelo e nngwe e re ba be ba “mmakela manyami.” Puku e nngwe ya ditšhupetšo tša Beibele e hlalosa ka gore: “Se se bolelwago mo ke gore boitshwaro bja Baheberu bo be bo baka bohloko,—go fo swana le boitshwaro bja ngwana yo a sa kwego le wa lerabele.” Go fo swana le ge ngwana yo a sa laolegego a kweša batswadi ba gagwe bohloko, Baisiraele ba marabele ba ile “ba kweša yena Mokgethwa wa Isiraele bohloko.”—Temana 41.

Re ka ithuta’ng psalmeng ye? Go a kgothatša go bona gore Jehofa o na le tswalano e tiilego le barapedi ba gagwe le gore ga a akgofele go ba lahla. Ka mo go swanago, ke mo go phafošago go lemoga gore Jehofa o na le maikwelo le gore boitshwaro bja rena bo ka kgoma maikwelo a gagwe. Go tseba seo go go kgoma bjang? Na go go šušumeletša go nyaka go dira se se nepagetšego?

Go e na le go phegelela tsela ya sebe le go kweša pelo ya Jehofa bohloko, re ka kgetha go latela tsela e lokilego le go thabiša pelo ya gagwe. Gomme seo ke sona seo a se nyakago go barapedi ba gagwe, o re: “Morwa wa ka, hlalefa gomme o thabiše pelo ya ka.” (Diema 27:11) Ga go selo se sengwe se bohlokwa seo re ka se neago Jehofa go feta go phela ka tsela yeo e thabišago pelo ya gagwe.