Fuena Ku Huku

Okuti Jeova Upondola Okuhambukwa ine Okunumana?

INKHA tukumbulula okuti yoo, tyikatula vali epulo ekuavo. Ovituwa vietu vikalesa ñgeni Huku? Okuti vimuhambukiswa ine okunumanesa? Ovanongo vamwe vouye kohale vati, au. Vapopia okuti nawike upondola okuhambukiswa ine okunumanesa Huku, mokonda oe utupu omutima. Anthi, etyi Ombimbiliya itulongesa tyelikalela. Ipopia okuti Jeova una oluembia nokuesuka unene netyi tulinga. Tala onondaka mbuvasiwa mo Salmo 78:40, 41.

O Salmu 78 ipopia etyi Huku alingile no va Isilayeli kohale. Etyi ayovola elongo lio Isilayeli koupika ku Egitu, Jeova apopi okuti malingi navo oupanga umwe wakolela. Oe walaa okuti inkha vatualako okutavela ovitumino viae, mavakala “ovanthu vae vakolela,” nokuveundapesa monkhalelo yavilapo pala okufuisapo evangelo liae. Iya vetavela, moluotyo alingi navo omphango Yovitumino. Okuti vatualako okulinga etyi vetavela?—Êxodo 19:3-8.

Omuhoneki wo no salmu wati: “Ovikando ovinyingi vemutyitukililepo mehoko!” (Versikulu 40) Moversikulu onkhuavo ayawisako okuti: “Vapitaulula okulola Huku.” (Versikulu 41) Tala okuti omuhoneki wati oumphuki ankho otyituwa tyavo. Otyituwa otyo tyokuhena onthilo, tyahimbika etyi pakala vala katutu tunde etyi vayovolwa mo Egitu. Ovanthu vahimbika okuñgoñgena Huku, okuti oe kafuilepo ine kahande okuvetekula. (Números 14:1-4) Omukanda umwe wovapitiyi Vombimbiliya, wati onondaka “vemutyitukilapo” monondaka ononkhuavo, okuti “vateneka omitima viavo okuhetavela Huku ine ‘vati “Au” Huku.’” Anthi, mokankhenda kae, Jeova wevela ovanthu vae tyina velekesa okuti velivela. Mahi vakondauka monkhalelo yavo onkhulu youmphuki, iya otyituwa otyo tyatualako.—Salmo 78:10-19, 38.

Oñgeni oumphuki wovanthu va Jeova ankho umukalesa? Oversikulu 40 yati: “Vemuihamesa komutima.” Ombimbiliya imwe yati ankho “valinga evi vimunumanesa.” Omukanda umwe uhangununa okuti: “Onondaka ombo mbulekesa okuti ovipuka ova Hebreu ankho valinga viihameka, ngetyi ovituwa viomona omphuki viihameka.” Ngetyi omona uhetavela aihameka omutima wo vohe, no va Isilayeli onomphuki “vanumanesa Osandu yo Isilayeli.”—Versikulu 41.

Oityi o salmu ei itulongesa? Itupameka okutala okuti Jeova uhole unene ovafendi vae, kakanyauka okuveyekapo. Tupu, tyakolela okunoñgonoka okuti ovituwa vietu vipondola okuhambukiswa ine okunumanesa omutima wa Jeova. Okunoñgonoka otyili otyo, tyikukalesa ñgeni? Okuti tyikulunda okulinga etyi tyaviuka?

Tupondola okulandula ondyila yaviuka opo tuhambukiswe omutima wae, tyipona okulandula ei ihaviukile atumunumanesa. Iya etyi, otyo aita ovafendi vae etyi ati: “Kala nonondunge, mona wange, hambukiswa omutima wange.” (Provérbios 27:11) Kutupu vali natyike tyakolela tupondola okuavela Jeova, tyipona okutyinda omuenyo uhambukiswa omutima wae.

[Olutalatu pefo 32]

Kutupu vali natyike tyakolela tupondola okuavela Jeova, tyipona okutyinda omuenyo uhambukiswa omutima wae