EFU Gado abi firi gi sma, dan dati e meki wan tra aksi opo kon: A fasi fa wi e tyari wisrefi abi krakti tapu den firi fu Gado? Sobun, den sani di wi e du kan meki Gado firi prisiri noso den kan hati den firi fu en? Son owruten filosofiaman ben taki dati a sani disi no de so. Den ben feni taki nowan sma kan abi krakti tapu Gado èn taki a musu de so taki Gado no abi firi. Ma Bijbel e taki wan tra sani. A e sori taki Yehovah lobi wi trutru èn taki a e broko en ede trutru nanga den sani di wi e du. Poti prakseri na den wortu di skrifi na ini Psalm 78:40, 41.

Psalm 78 e taki fu a fasi fa Gado ben e handri nanga den Israelsma fu owruten. Baka di Yehovah frulusu a pipel fu katibo na ini Egepte, a ben wani abi wan spesrutu matifasi nanga den. A ben pramisi den taki efu den ben o tan gi yesi na den wet fu en, den ben o tron wan „spesrutu gudu” gi en èn a ben o gebroiki den na wan spesrutu fasi fu meki a wani fu en kon tru. A pipel ben agri nanga dati, èn na so den kon de na ini a Wetfrubontu. Den ben hori densrefi na a frubontu dati?​—Exodus 19:3-8.

A psalm skrifiman e taki: „Ibri tron baka den opo densrefi teige en na ini a sabana” (vers 40). A tra vers e taki tu: „Doronomo den ben e tesi Gado” (vers 41). Luku taki a psalm skrifiman e sori taki den ben gwenti fu opo densrefi teige Gado. Den no ben sori lespeki èn den bigin opo densrefi frukufruku kaba. Disi ben pasa na ini a sabana, syatu baka di Gado frulusu den fu Egepte. Den sma bigin krutukrutu nanga Gado, fu di den ben tweifri efu a ben o man sorgu gi den èn efu a ben o wani fu du dati trutru (Numeri 14:1-4). Wan buku gi sma di e vertaal Bijbel, e taki dati den wortu „opo densrefi teige en”, kan vertaal leki „den meki den ati kon tranga teige Gado” noso „den taigi Gado: ’Nôno.’” Ma toku Yehovah sori den sari-ati fu di a ben e gi en pipel pardon te den ben sori berow. Ma a pipel ben fadon go baka na ini den srefi sani di den ben du kaba èn den ben opo densrefi teige en. Na so a sani disi tan go doro.​—Psalm 78:10-19, 38.

Fa Yehovah ben e firi ibri leisi te en pipel ben opo ensrefi teige en? Vers 40 e taki: „Den ben e hati en.” Wan tra vertaling e taki dati den ben „meki a firi sari”. Wan buku di e taki fu Bijbel wortu, e fruklari: „A fasi fa den Hebrewsma ben e tyari densrefi ben meki Gado sari, neleki fa wan papa noso mama e sari te en pikin trangayesi.” Neleki fa wan trangayesi pikin kan meki en papa nanga mama sari srefisrefi, na so den trangayesi Israelsma „ben e meki a Santawan fu Israel firi sari”.—Vers 41.

San wi kan leri fu a psalm disi? A e gi wi deki-ati fu si taki Yehovah lobi den anbegiman fu en trutru èn a no de gaw fu libi den. Ma na a srefi ten, a e meki wi prakseri a seryusu sani disi: Yehovah abi firi èn a fasi fa wi e tyari wisrefi kan abi krakti tapu den firi fu en. Di yu kon sabi disi, dan fa dati abi krakti tapu yu? A e gi yu deki-ati fu du san reti?

Na presi fu tan du sondu èn meki Yehovah sari, wi kan bosroiti fu du san reti èn fu prisiri Yehovah en ati. Iya, dati na san a e aksi fu den anbegiman fu en. A e taki: „Mi manpikin, de koni èn meki mi ati prisiri, so taki mi kan gi wan piki na a sma di e spotu mi” (Odo 27:11). Nowan tra sani de so moi di wi kan gi Yehovah, leki fu tyari wisrefi na wan fasi di e meki en ati prisiri.