E haafatata ˈtu i te Atua

E nehenehe anei te Atua e oaoa aore ra e mauiui?

MAI te peu e e, e nehenehe anei ta tatou mau ohipa e faaoaoa aore ra e haamauiui ia ˈna? No te tahi mau philosopho tahito, aita roa ˈtu ïa no te mea aita to te Atua e huru aau. Mea taa ê râ ta te Bibilia e haapii ra, oia hoi e Atua aroha Iehova e te anaanatae roa ra oia i ta tatou e rave. A hiˈo na i ta te Salamo 78:40, 41 e faaite ra.

Tei nia te Salamo 78 i te mau haaraa a te Atua e Iseraela i tahito. Ua faaora Iehova ia ratou mai Aiphiti mai e ua pûpû ia ratou ia riro ei nunaa taa ê no ˈna. Ia faaroo ratou i ta ˈna mau ture e riro ratou ei “taoˈa here rahi” no ˈna e e faaohipahia ratou no te faatupu i ta ˈNa opuaraa. Ua farii te mau Iseraela e ua ô atura i roto i te faufaa a te Ture. Ua rave anei ratou i ta ratou i parau?—Exodo 19:3-8.

Te na ô nei te papai salamo: “Te pinepine o ta ratou faaoooraa ˈtu ia ˈna i te fenua moemoe ra e!” (Irava 40) Te na ô faahou ra: “Ua na nia iho ua na nia iho ratou i te faaooo i te Atua.” (Irava 41) A tapao na e e ere hoê noa taime to ratou faaoooraa aore ra orure-hau-raa ia Iehova. Ua haamata ê na teie huru feruriraa i roto i te medebara i muri noa ˈˈe i to ratou faaoraraahia. Ua amuamu ratou e ua uiui no nia i to te Atua puai e hinaaro e haapao ia ratou. (Numera 14:1-4) ‘Ua faaooo ratou i te Atua.’ Ia au i te hoê buka e nehenehe atoa e parau e “ua haapaari ratou i to ratou aau i te Atua” aore ra “ua parau ratou ‘Aita’ i te Atua.” Ma te hamani maitai râ, ua faaore Iehova i te hara a to ˈna nunaa a tatarahapa ˈi ratou. Ua hoˈi noa râ ratou i ta ratou mau peu tahito e ua orure hau faahou ehia taime.—Salamo 78:10-19, 38.

Eaha to Iehova huru a orure hau ai to ˈna nunaa? ‘Ua faariri ratou ia ˈna,’ ia au i te irava 40. Te na ô ra te tahi atu huriraa e “ei otoraa ratou no ˈna.” Te faataa ra te tahi atu buka: “Te auraa i ǒ nei, oia hoi mai te haerea o te hoê tamarii faaroo ore e orure hau ra, ua haamauiui te haerea o te mau Hebera” ia Iehova. Mai te hoê tamarii faaroo ore e haamauiui i to ˈna mau metua, ua “aa” te mau Iseraela orure hau “i Tei Moˈa i Iseraela.”—Irava 41.

Eaha te haapii mai i teie salamo? Mea mahanahana mau â ia ite e te ati maite ra Iehova i ta ˈna mau tavini e eita oia e faarue ia ratou. E huru aau iho â to Iehova. E haaferuri te reira, e ere anei? E turai anei te reira ia oe ia rave i te mea maitai?

Na tatou e maiti, e haamauiui ia Iehova ma te rave i te hara aore ra e faaoaoa ia ˈna ma te rave i te mea tia. Te ani nei râ Iehova: “E tau tamaiti, ia paari hoi oe, ia oaoa tau aau.” (Maseli 27:11) Aita ˈtu mea faufaa aˈe i te faaoaoaraa ia Iehova ma to tatou haerea.

Taioraa Bibilia no Tiurai:

◼ Salamo 60-86

[Parau iti faaôhia i te api 32]

Aita ˈtu mea faufaa aˈe i te faaoaoaraa ia Iehova ma to tatou haerea