KON oo an imo baton ha pakiana ha igbaw, usa pa nga pakiana an nabangon: An aton ba panggawi nakakaapekto ha Dios? Mahimo ba malipay o masubo an Dios tungod han aton panggawi? Diri an baton han iba nga eskolar ha naglabay. Natoo hira nga waray nakaimpluwensya ha Dios salit masisiring nga waray hiya pagbati. Pero iba an igintututdo han Biblia. Nagtututdo ito nga hi Jehova may pagbati ngan nagtatagad kon ano an aton ginbubuhat. Tagda an ginsisiring han Salmo 78:40, 41.

Iginhuhulagway han Salmo 78 an pakig-upod han Dios ha kadaan nga Israel. Katapos luwason an nasud tikang ha pagkauripon ha Ehipto, igintanyag ni Jehova ha ira an usa ka espesyal nga relasyon. Hiya nagsaad nga kon tutumanon nira an iya balaud, hira magigin iya espesyal nga panag-iya ngan iya gagamiton ha naiiba nga paagi ha pagtuman han iya katuyoan. Ira ito ginkarawat salit nagkaada hira kauyonan kan Jehova. Nagkinabuhi ba hira uyon hito nga kauyonan?—Eksodo 19:3-8.

An salmista nasiring: “Agsob hira umato kontra ha iya didto ha kamingawan.” (Bersikulo 40) Nagpadayon an sunod nga bersikulo: “Agsob nira an Dios pagsarihan.” (Bersikulo 41, Maopay nga Sumat) Tigamni an pauroutro nga pagrebelde nga ginhulagway han parasurat. Ito nga pagrebelde nagtikang dayon—waray pag-iha katapos hira makagawas ha Ehipto—han nagreklamo hira kontra ha Dios ngan nagruhaduha kon makakagmangno ba hiya ha ira ngan kon naruruyag ba hiya ha pagbuhat hito. (Numeros 14:1-4) Usa nga reperensya para ha mga parahubad han Biblia an nasiring nga an “hira umato kontra ha iya” mahimo hubaron nga “‘ira ginpatig-a an ira kasingkasing kontra ha Dios’ o ‘hira nagsiring nga “Diri” ha Dios.’” Kondi tungod kay maloloy-on hi Jehova, iya ginpapasaylo an iya katawohan kon nagbabasol hira. Kondi nabalik hira ha ira daan nga pagkinabuhi ngan nagrirebelde utro.—Salmo 78:10-19, 38.

Ano an gin-aabat ni Jehova ha kada pagrirebelde han iya katawohan? ‘Ginpasubo hiya nira,’ siring han bersikulo 40, ngan usa pa nga hubad an nasiring nga “ginbido hiya nira.” Usa nga artikulo mahitungod ha Biblia an nasiring: “Nangangahulogan ini nga an panggawi han mga Hebreo nakakapasakit, sugad la nga an panggawi han diri masinugtanon ngan rebelyoso nga bata nakakapasakit” ha iya kag-anak. “Ginpasina” han rebelyoso nga mga Israelita an Baraan han Israel.—Bersikulo 41.

Ano an aton mahibabaroan tikang hini nga salmo? Nagpapasarig ito nga may hilarom nga pagbati hi Jehova ha mga nagsisingba ha iya ngan diri masayon mawad-an hin paglaom ha ira. Dugang pa, makatadunganon an paghunahuna nga may pagbati hiya ngan nakakaapekto ha iya an aton panggawi. Paonan-o ito nakakaapekto ha imo? Nag-aaghat ba ito ha imo ha pagbuhat han husto?

Imbes nga magkinabuhi ha maraot nga paagi ngan makapasubo kan Jehova, mahimo naton pilion an matadong nga pagkinabuhi ngan lipayon hiya. Ngan ito gud an iya ginhahangyo ha mga nagsisingba ha iya: “Anak ko, pagmakinaadmananon, ngan himoa an akon kasingkasing nga malipayon.” (Proberbios 27:11) Waray kita labaw nga maihahatag kan Jehova kondi an pagkinabuhi nga magpapalipay ha iya.