Biblia loko kwo

Pirang’o dhaku moko ma oro pare 60 ku wiye uweko cen nirwo ni ayi gin m’acwiya? Kewinj lembe m’eyero.

“Dong’ atie ngo ng’eca mir ayi gin m’acwiya.”​—ABA DANSOU

ORO M’ENYOLERE I IYE: 1938

NG’OM M’ENYOLERE I IYE: BENIN

I WANG’E: NG’ATU MA RWO NI AYI GIN M’ACWIYA

KWO PARA MA CON: Adongo i pacu moko ma julwong’o So-Tchahoué, ma nwang’ere i dhunam moko, kaka m’ucodho lee i iye. Dhanu ma kuca gikwo ku dwaru nam, man gitungo dhieng’, diegi, rombe, kul man winyo. Gengi mbe kuca, pieno juwotho ku yei man jutiyo bende ku yei ma tie ku muter. Ju ma dupa gigiero ot ku yen man ku lum, ento udi ma jugiero ku briki tie nyanok. Dhanu ma pol ma gikwo kuca gi jucan. Re lembe ma reco upong’ ungo hai calu i adhura (town).

Saa m’abino nyathin, baba orowa waku nyamira kaka moko ma jutendo dhanu i iye ku weco ku tipo, man kuca juponjowa ku suru maeno mi kwaru mwa. Kinde m’adongo, aketho Dudua (Oduduwa) ma tie mungu mi suru mi Yoruba udoko ni mungu para. Agiero nyathi ot moko ni mungu maeno, man wang’ ma pol abed athiero ire maole, mo ngasi, dholu, gweno, akuru, man kit lei mange dupa. Abed ang’iewo giramiya maeno bei ma tek, man ebed eramu jamcinga nitundo edong’ ni ditne.

KITE MA BIBLIA ULOKO KO KWO PARA: Kinde m’acaku ponjo Biblia, anwang’u nia Yehova re m’utie Mungu acel kende ma en e mandha. Aponjo bende nia emaru ngo jutii kud ayi gin m’acwiya pi niwore. (Ai 20:4, 5; 1 Jukorintho 10:14) E agam aneno nia ukwayu atim lembe moko. Pieno abayu ayi gin m’acwiya m’abino ko ceke, man ateng’o piny ceke ma tie ku winjiri kud ayi gin m’acwiya cen kud i ot para. Aweko nicidho i bang’ ju ma ewo lembe mi nindo m’ubino; aweko bende nidikara i lembsuru man i seremoni mi kuny.

Ebino lembe ma yot ungo ira nitimo alokaloka maeno, asagane pilembe atie dhaku man oro para de 60 ku wiye. Jurimba, wedi para, ku jirani para gijai i kum lembene man ging’iera. Ento akwayu Yehova i rwo nia emii ira kero m’atim ko lembe m’atira. Wec ma nwang’ere i Lembrieko 18:10 de umiyo tego i kuma; eyero kumae: “Nying’ Yehova en e ot ma tek ma wiw; won bedopwe ringo i ie, e ebedo museme.”

Gin mange m’ukonya utie nicidho i coko mi Jumulembe pa Yehova. Kuca, junyutho ira mer mi Jukristu, man lembe mi dhanune ufoyo iya lee, kum gi ii niworo cik ma Biblia umiyo. Gin m’aneno uketho anwang’u nia andha Jumulembe pa Yehova gin’i dini mandha.

BERO M’ANWANG’U: Cik mir ukungu mi Biblia m’abed atiyo ko i kwo para ukonya nibedo ma ber kud awiya para. Awinjara bende nia ve juloro ter ma pek kud i goka. I wang’e, abed adaru jamcinga zoo pir ayi gin m’acwiya ma kwo de mbe i iye, man m’ubed umiyo ngo ira bero acel de. Ento kawoni abeworo Yehova m’ung’olo nia ebidaru peko mwa mi magwei. (Lembanyutha 21:3, 4) Anyong’a ubenega lee pilembe dong’ atimo ngo ni ayi gin m’acwiya, ento abetimo ni Yehova! Anwang’u kwiyocwiny ku bedomoth mandha i bang’e.

[Cal]

I kind Jumulembe pa Yehova, aneno mer mandha mi Jukristu