Bibel Mambahen Denggan Ngolukku

“Dang Diparhatoban Akka Patung be Au.”​—ABA DANSOU

TUBU TAON: 1938

NEGARA ASAL: BENIN

RIWAYAT HIDUP: MANOMBA AKKA PATUNG

NGOLUKKU DI UJU I: Magodang di huta So-Tchahoué do au, i ma sada huta na jonok tu tao. Godangan halak dison karejona manakkup dekke, memelihara lombu, hambing, biru-biru, babi, dohot manuk. Dang adong dalan di hutakkon. Jadi mamakke kapal manang kano do akka halak molo naeng lao manang na tudia. Godangan jabu dison dibahen sian papan dohot ri manang lalang. Alai adong do piga-piga jabu na dibaen sian batu bata. Pogos do halak dison. Alai nang pe songon i, aman do dison. Dang pola godang parjahat dison songon di kota.

Tikki dakdanak, diboan bapa do au dohot kakakku tu sada kuil. Diajari ma hami disi manomba patung. Ai i do agama tradisional di hutanami. Dung balga au, hupillit ma Dudua (Oduduwa) i ma dewa ni halak Yoruba gabe dewa na husomba. Hubaen ma kuil tu dewa i. Jala hupelehon do disi gadong, minyak kelapa, siput, manuk, darapati, dohot binatang na asing. Gabe habis ma hepengku manuhor i. Ai arga-arga do i.

SONGON DIA BIBEL PAUBAHON NGOLUKKU: Dung marsiajar Bibel au, gabe huboto ma holan Jahowa do Debata na sittong. Huboto ma muse, dang lomo hape roha ni Debata molo tapakke patung tikki manomba Ibana. (2 Musa 20:​4, 5; 1 Korint 10:14) Jadi hubolokkon ma akka patung i. Jala hubolokkon ma sude jimat na adong di jabukku. Dang olo be au mardatu jala dang olo be au dohot tu acara adat na dibaen tu halak na mate.

Ala nga marumur 60 taon au, dang mura di au lao mangulahon i sude. Diorai keluarga, dongan, dohot tetanggakku do au marsiajar Bibel. Jala direhei nasida do au. Alai martangiang do au tu Jahowa asa diurupi Ibana au mangulahon na sittong. Tarapul do rohakku manjaha Poda 18:​10 na mandok, “Dos songon menara na togu do goar ni Jahowa. Tusi do marlojong halak na tigor marroha lao marlinggom.”

Dipatogu do muse au ala marpungu rap dohot Saksi Jahowa. Boi do huhilala disi holong ni akka dongan. Jala salut do au mangida nasida, berusaha do nasida asa sadalan pangalaho ni nasida tu na didok Bibel. Gabe pos ma rohakku Saksi Jahowa do agama na sittong.

LABA NA HUDAPOT: Ala huulahon na didok Bibel, gabe lam jonok ma hubunganku tu akka gellengku. Gabe hira na tarangkat ma boban na borat sian tanggurungku. Najolo habis do hepengku manuhor pelean tu akka patung na so marguna i. Alai saonari Jahowa do na husomba, na mangalehon jalan keluar tu sude masalahta. (Pangungkapon 21:​3, 4) Las hian do rohakku, dang diparhatoban akka patung i be au jala dang husomba be i. Jahowa nama na husomba. Gabe dame jala aman ma huhilala ala manomba Ibana.

“Sai Hulului do Debata Mulai sian Dakdanak Au.”—SHINJI SATO

TUBU TAON: 1951

NEGERI ASAL: JEPANG

RIWAYAT HIDUP: PENDETA SHINTO

NGOLUKKU NA UJU I: Magodang di sada kota na gelleng do au di Prefektur Fukuoka. Lomo do roha ni natua-tuakku tu agama. Jadi tikki gelleng dope au, nungnga diajari au lao manomba akka dewa ni agama Shinto. Tikki gelleng, sering do au tarpikkir boha carana asa boi au malua jala boha carana mangurupi halak na susa. Huingot do tikki SD dope au, disukkun guru do aha cita-citanami. Dipaboa akka donganku do cita-citana, misalna naeng gabe ilmuwan. Alai molo au, hudok do cita-citakku naeng melayani Tuhan. Mambege i, sude ma donganku mamarekkeli au.

Dung tamat SMA, masuk ma au tu sikkola guru agama. Pajuppang ma au disi tu sahalak pendeta Shinto na sering manjaha sada bukku na warna birong sampulna. Sada tikki disukkun ibana ma tu au, “Diboto ho do on bukku aha Sato?” Hujaha ma surat na di sampulna i jala hudok ma, “Bibel.” Didok ibana muse, “Manang ise na naeng gabe pendeta Shinto, ikkon dijaha nasida do bukku on.”

Pittor lao ma au manuhor Bibel. Hubahen ma i di rak ni bukkuku na marisi akka bukku na penting. Jala denggan do i hurawat. Alai dang sanga au manjaha i ala sibuk au di sikkola. Dung lulus, mulai ma au karejo di kuil gabe pendeta Shinto. Saut do cita-citakku tikki gelleng i.

Alai pittor sadar ma au, dang songon na huharappon gabe pendeta Shinto i. Godangan akka pendeta i dang parduli jala dang makkaholongi akka halak. Jala godang do na so porsea tu Debata. Adong sada atasanku na mandok, “Molo naeng sukses ho dison unang hatai taringot Debata. Taringot filsafat ma hatai.”

Gabe kecewa do au tu agama Shinto dung mambege hatana i. Nang pe karejo dope au di kuil, alai mulai ma hupareso akka agama na asing. Alai dang adong nanggo sada pe agama na undenggan sian agama Shinto. Lam godang agama na hupareso, gabe lam kecewa ma au. Huhilala dang adong agama na mangajarhon na sittong.

SONGON DIA BIBEL PAUBAHON NGOLUKKU: Di taon 1988, pajuppang ma au tu sahalak na maragama Buddha. Disuru ibana do au manjaha Bibel. Gabe huingot ma pendeta Shinto na hea mandok songon i tu au. Mulai ma hujaha Bibel, jala lomo do rohakku manjaha i. Sipata olo do hujaha i saborngin manipat sahat tu pagi.

Ala hujaha Bibel, gabe taronjar ma rohakku lao martangiang tu Debata na dipaboa di Bibel i. Jadi hupakke ma contoh tangiang na disurat di Mateus 6:9-13. Ganup dua jom huulangi do tangiang i, termasuk ma tikki karejo au di kuil.

Godang do sukkun-sukkunku taringot na hujaha i. Tikki i, nga mangoli au. Jala huboto do, lomo do roha ni Saksi Jahowa mangurupi halak marsiajar Bibel. Alana hea do ro nasida manjuppangi istrikku. Jadi hulului ma sahalak Saksi Jahowa jala hupaboa ma sukkun-sukkunki tu ibana. Las hian rohakku ala dipakke ibana Bibel lao mangalusi sude sukkun-sukkunki. Dung i, diatur ibana ma asa adong na mangurupi au marsiajar Bibel.

Dang leleng dukkon i, dohot ma au marpungu. Gabe sadar ma au, godang do hape disi halak na hea husonggaki. Nang pe songon i, burju do nasida tu au jala ramah.

Di parpunguan i, marsiajar ma au lomo do roha ni Debata molo burju suami tu keluargana. Tikki i, jarang do huparrohahon istri dohot dua gellengku. Holan tu karejokku na gabe pendeta i do habis tikkikku. Gabe sadar ma au, saleleng on molo ro akka halak tu kuil paboahon na di rohana, sai hutangihon do nasida. Hape dang hea manang sahali pe istrikku paboahon na di rohana.

Lam godang au marsiajar Bibel, lam godang ma na huboto taringot Jahowa. Jala gabe lomo ma rohakku mananda Ibana. Hona hian do tu rohakku ayat songon Rom 10:13 na mandok, “Malua do ganup halak na manjou goar ni Debata, i ma Jahowa.” Sai hulului do Debata mulai sian dakdanak au, jala saonari nga juppangku be Ibana!

Mulai ma dang lomo rohakku karejo di kuil. Di mulana, mabiar do au aha annon dokkonon ni halak molo kaluar au sian agama Shinto. Alai sebenarna, nga sering hudok di bagasan rohakku, ikkon pinda do au molo nga juppangku Debata na sittong di agama na asing. Ujungna di musim semi taon 1989, hubahen ma keputusan mangihutton hati nuranikku. Kaluar ma au sian kuil, jala holan mangasahon Jahowa ma au.

Dang mura kaluar sian kuil i. Alana dipalea-lea akka atasanku do au, jala dipaksa nasida do au asa tetap disi. Alai na paling maol, i ma paboahon keputusanku tu natua-tuakku. Tikki di pardalanan lao tu jabu ni nasida, mabiar hian do au. Sappe hira na pusok huhilala andorakku jala hitir-hitir pattu. Ikkon so do au piga-piga hali di pardalanan lao martangiang mangido gogo sian Jahowa.

Dung sahat au di jabu ni nasida, mabiar dope au. Sappe piga-piga jom ma au disi, dang marna hupaboa taringot i. Ujungna dung martangiang au piga-piga hali, hupaboa ma keputusanku tu bapak. Hupaboa ma tu ibana, nungnga juppangku be agama na sittong. Jala asa boi au manomba Ibana, ikkon hutinggalhon do agama Shinto. Tarsonggot hian do bapak jala lungun hian ma rohana. Marroan ma akka tondongnami na asing mangelek au asa olo berubah pikkiran. Dang olo au mambahen lungun roha ni keluargakku. Alai huboto do, keputusan na sittong do lao manomba Jahowa. Di pudian ni ari, mulai ma nasida mangargai au alani keputusanki.

Alai dang sae hape kaluar sian kuil. Ikkon kaluar do au sian i di bagasan roha dohot pikkiranku. Saleleng on nungnga marurat hangoluan gabe sahalak pendeta i di bagasan rohakku. Ikkon berusaha do au sian nasa gogokku lao mangalupahon i. Alai sai adong do na mambahen au taringot tu parngoluokku najolo i.

Jadi adong dua na huulahon asa boi mangalupahon i. Na parjolo, hulului ma di jabukku sude na adong hubunganna tu agamakku na leleng i. Songon bukku, gambar, dohot barang kenangan na arga hian. Dung i, hututung ma i sude. Na paduahon, berusaha do au asa sering bergaul dohot Saksi Jahowa. Godang do manfaat ni i tu au. Palan-palan, boi ma hubolokkon sian pikkiranku parngoluokku najolo i.

LABA NA HUDAPOT: Najolo sering do istrikku dohot dua gellengku merasa kesepian ala jarang huparrohahon nasida. Alai dung huulahon nasehat na sian Bibel tu akka suami, jala sering au rap dohot nasida, gabe kompak ma hami. Ujungna dohot ma istrikku manomba Jahowa. Saonari nungnga manomba Jahowa hami sude, rap dohot anaknami, borunami, dohot helanami.

Molo huingot cita-citakku tikki dakdanak dope au, i ma manomba Debata jala mangurupi na asing, gabe sadar ma au nungnga tercapai cita-citakki. Jala lobi sian i dapottu. Mandok mauliate situtu do au tu Jahowa.