Biblu’n maan sran’m be kaci

?Ngue ti yɛ bla kun m’ɔ le afuɛ 60 tra su’n, ɔ yacili amuin sɔlɛ-ɔ? ?Ngue yɛ ɔ suli asɔnun nga be flɛ i Sinto’n i plɛti kun bo naan w’a kaci Klisifuɛ-ɔ? ?Ngue yɛ ɔ ukali bla kun mɔ i si nin i nin b’a fɛmɛn i i nɔnman nun’n, naan w’a bu i wun sran ekun-ɔn? Maan e nian ndɛ nga sran sɔ’m bé wá kán’n.

“N timan amuin’m be kanga kun.”—ABA DANSU

BE WULI I: AFUƐ 1938 NUN

Ɔ FIN: BENƐN

LAA’N: Ɔ TI AMUIN SƆFUƐ

MIN LAA NUN’N: N ɲinnin Socawe klɔ’n su. Lika nga klɔ’n wo’n ti nzuenzue, yɛ ɔ o fɛtɛ kun nuan. Klɔfuɛ’m be ti jue trafuɛ, yɛ be ta nannin, boli, bua, kɔkɔti ɔ nin anunman mun. Akpɔ nunman e klɔ lɔ, ɔ maan sran’m be fu nzue ɲin su alie’m be nun yɛ be kɔ lɔ-ɔ. Be fali waka nin ijre fa kplannin sua nga be o lɔ’n be sunman lika. Sanngɛ sua wie’m be ti bliki nun. Sran’m be dan lika be ti yalɛfuɛ. Ɔ nin i sɔ ngba’n, awiefuɛ’m b’a sɔnman lɔ kɛ klɔ dandan’m be su sa.

I nun mɔ n ti kaan’n, min sin fali min nin min niaan bla ɔli amuin sɔlɛ kun bo. Lɔ yɛ be fali min wlali amuin’m be sa nun-ɔn. Kɛ n yoli kaklaka’n, n ma sɔli Yoruba’m be amuin nga be flɛ i kɛ Dudua’n. N kplannin sua kun n mannin amuin sɔ’n, yɛ titi’n n fa duo, ngo ɔkwlɛ, buke, akɔ, auble ɔ nin nnɛn uflɛ wie mun n yi sraka n mɛn i. Sraka sɔ’m be yilɛ’n di sika dan. Wie liɛ bɔbɔ’n, n fa min sa nun sika kwlaa n wla nun.

WAFA NGA BIBLU’N NUN NDƐ’N KACILI MIN NZUƐN’N: Kɛ n boli Biblu’n nun like suanlɛ bo’n, n wunnin i kɛ Zoova yɛ ɔ ti Ɲanmiɛn kpli’n niɔn. N wunnin i ekun kɛ ɔ kloman amuin sɔlɛ’n. (Ezipti Lɔ Tulɛ 20:4, 5; 1 Korɛntifuɛ Mun 10:14) N si like ng’ɔ fata kɛ n yo’n. I ti’n, n guali min waka sran mun nin min sua’n nun ninnge kwlaa nga be nin amuin sɔlɛ’n kɔ likawlɛ’n be blo. M’an ɔman wunnzue yifuɛ’m be sin kun kpɛkun n yacili amuin sɔlɛ ninnge mun nin sɛ bo ninnge nga be nin amuin sɔlɛ’n kɔ likawlɛ’n be yolɛ.

Kɛ ɔ́ yó sɔ nn n le afuɛ 60 tra su, yɛ ninnge sɔ’m be ase wlalɛ’n w’a yoman pɔpɔ w’a manman min. Min janvuɛ mun nin min osufuɛ mun ɔ nin min mantanfuɛ’m be tanndannin min ɲrun, yɛ be yoli min finfin. Sanngɛ n srɛli Zoova kɛ ɔ man min wunmiɛn naan n yo sa ng’ɔ ti kpa’n. Ɲanndra Mun 18:10 i nun ndɛ’n fɔnvɔli min wie. Ɔ se kɛ: “Zoova i dunman’n ti kɛ sua fleiin dan kun sa. Sran ng’ɔ yo sa i nuan su’n, ɔ wanndi kɔ lɔ, kpɛkun ɔ ɲan fiawlɛ.”

Like uflɛ m’ɔ ukali min’n, yɛle Zoova i Lalofuɛ’m be aɲia’m be bo tranlɛ’n. Aɲia sɔ’m be bo’n n wunnin kɛ be klo sran. Yɛ kɛ n wunnin wafa nga be mian be ɲin naan b’a nanti Biblu’n nun mmla’m be su’n, i sɔ’n boli min nuan. Like nga n wunnin i’n ti’n, n ma lafili su kpa kɛ Zoova i Lalofuɛ mun yɛ be su Ɲanmiɛn kpa-ɔ.

I SU YE NGA N ƝƐNNIN I’N: Biblu’n nun mmla’m be su nantilɛ’n ukali min naan e nin min mma mun e afiɛn w’a sɛ kpa ekun. Asa’n, ɔ yoli min kɛ b’a sike min ti su trɔ nɔnninnɔnnin wie sa. Laa’n, n fa min sa nun ninnge ngba n wlɛ i amuin mɔ be yoman min wun sa ye’n be sɔlɛ’n nun. Sanngɛ siɛn’n n su Zoova. I yɛ ɔ́ núnnún e su sa’m be ngba-ɔ. (Sa Nglo Yilɛ 21:3, 4) N di aklunjɔɛ dan afin n timan amuin’m be kanga kun, sanngɛ n ti Zoova i kanga. Ɔ sasa min, ɔ maan srɛ kunman min.

“Kɛ ɔ fin min kaan nun’n n kunndɛ Ɲanmiɛn.”—SINJI SATO

BE WULI I: AFUƐ 1951 NUN

Ɔ FIN: ZAPƆN

LAA’N: Ɔ TI SINTO PLƐTI

MIN LAA NUN’N: N ɲinnin Fukuoka asa’n i klɔ kun su. Min si nin min nin be klo asɔnun kɔlɛ kpa. Kɛ ɔ fɛ i min kaan nun’n, be seli min kɛ ɔ fata kɛ min ɲin yi Sintofuɛ’m be ɲanmiɛn mun. Kɛ n yoli gbanflɛn kan’n, n buli like nga ń yó naan m’an fite nun’n i akunndan kpɛ sunman. Asa’n n kunndɛli kpa kɛ ń úka be nga be o afɛ nun’n. Min wla kpɛn su kɛ i nun mɔ n nin-a ɔman kolɛzi’n, cɛn kun’n e suklu klefuɛ’n seli e kɛ e kan like nga kɛ é wá yó kpɛnngbɛn’n, e klo kɛ é yó’n i ndɛ. Min wiengu suklu ba’m be si like trele nga be waan bé yó’n. I wie yɛle kɛ wie’m be waan bé káci siansifuɛ. Sanngɛ min liɛ’n min waan ń sú Ɲanmiɛn. Kɛ ɔ yoli sɔ’n be srili min.

Kɛ n wieli kolɛzi di’n, n wɔli suklu kun nun. Lɔ’n be kle be nga be kle sran mun Ɲanmiɛn ndɛ’n be like. Blɛ sɔ’n nun’n n wunnin Sinto plɛti kun. Ɔ ju wie’n, ɔ kanngan fluwa kun mɔ i sin bui ti ble’n i nun. Cɛn kun’n, ɔ usali min kɛ: “?Sato, a si fluwa nga?” Kɛ mɔ n wunnin fluwa’n i sin bui’n ti’n, n tɛli i su kɛ: “Biblu’n niɔn.” Yɛ ɔ seli min kɛ: “Sran kwlaa ng’ɔ kunndɛ kɛ ɔ́ káci Sinto plɛti’n, ɔ fata kɛ ɔ kanngan fluwa nga nun.”

E ja nun lɛ’n n ko toli Biblu kun. N fa sieli i kan n sie min fluwa kpakpa’m be lɛ’n, yɛ n niɛnnin i lika kpa. Sanngɛ kɛ mɔ suklu’n fa min blɛ’n i dan lika’n ti’n, n ɲanman min ti naan m’an kanngan nun. Kɛ n wieli suklu’n i di mɔ n fiteli Sinto plɛti’n, n ma dili junman Sinto asɔnun sua kun nun. Like nga min ɲin wo i sin lele’n w’a kpɛn su.

Sanngɛ w’a cɛman, n ma wunnin kɛ Sinto plɛti’m be wun akunndan nga n bu’n, ɔ timan su mlɔnmlɔn. Plɛti sɔ’m be nun sunman kloman sran. Kpɛkun be nun kaka be lafiman Ɲanmiɛn su. I kpa bɔbɔ’n cɛn kun’n, e su kpɛn’m be nun kun seli min kɛ: “Sɛ a kunndɛ kɛ á kɔ́ ɔ ɲrun’n, ndɛ nga mɛn nun ngwlɛlɛfuɛ’m be kan’n, i wie yɛ ɔ fata kɛ a kan-ɔn. Be kanman Ɲanmiɛn sulafilɛ ndɛ wa.”

Ndɛ ng’ɔ kannin’n ti’n, min sa sin bubuli min dan. N siman kɛ kɛ Sinto asɔnun’n ti kɛ nga sa. Kannzɛ n te di junman lɔ’n, sanngɛ n ma kunndɛli asɔnun uflɛ’m be su like. Sanngɛ ɔ yoli min kɛ be kwlaa be ti kun sa. Kɛ ń kúnndɛ asɔnun’m be su like ń kɔ́’n nn blɛ li yɛ min sa sin búbú min kpa-ɔ. Ɔ yoli min kɛ asɔnun wie fi diman nanwlɛ sa.

WAFA NGA BIBLU’N NUN NDƐ’N KACILI MIN NZUƐN’N: Afuɛ 1988 nun’n, n wunnin Budisi bian kun. Ɔ wlali min fanngan kɛ n kanngan Biblu’n nun. N wla kpɛnnin Sinto plɛti ng’ɔ seli min kɛ n kanngan Biblu’n nun’n i su. Ɔ maan n fali afɔtuɛ ng’ɔ mannin min’n su. Kɛ n boli Biblu’n nun kannganlɛ bo’n, ndɛndɛ kpa i nun kannganlɛ’n wa yoli min fɛ kpa. Wie liɛ bɔbɔ’n, n kanngan nun kɔnguɛ lele aliɛ fa cɛn min.

Like nga n wunnin i Biblu’n nun’n suli min bo naan m’an srɛ Ɲanmiɛn nga Biblu’n kɛn i ndɛ’n. I bo bolɛ nun’n, n niannin srɛlɛ ng’ɔ o Matie 6:9-13 nun’n i su. Dɔ nɲɔn kwlakwla’n, n nian su n srɛ Ɲanmiɛn. Kɛ ń dí Sinto plɛti junman asɔnun sua’n nun bɔbɔ’n, n yo sɔ.

Kɛ ń kánngan Biblu’n nun’n, n usali min wun kosan kpanngban. Blɛ sɔ’n nun’n, nn m’an ja bla. Yɛ n si kɛ Zoova i Lalofuɛ’m be fa Biblu’n kle sran’m be like. Afin laa’n be ko nian min yi’n i osu. N ko wunnin Zoova i Lalofuɛ bla kun i wun, yɛ n usɛli i kosan kaka. Ɔ fali Biblu’n tɛli min kosan’m be kwlaa be su. I sɔ’n boli min nuan dan. I sin’n, ɔ fali ajalɛ wie mun naan Zoova i Lalofuɛ yasua kun wa kle min Biblu’n nun like.

Kɛ ɔ cɛli kan’n, n ma boli Zoova i Lalofuɛ’m be aɲia’m be bo tranlɛ bo. Blɛ sɔ’n nun’n, n siman kɛ be nga be tran aɲia’n i bo’n n yoli min ɲrun wiwi be nun wie’m be wun laa. Ɔ nin i sɔ ngba’n, be sɔli min nun klanman yɛ be yoli maan n wunnin min wun fɛ.

Aɲia sɔ’m be bo’n, n wunnin i kɛ Ɲanmiɛn kunndɛ kɛ yasua’m be klo be awlobofuɛ mun yɛ be bu be sran. Blɛ sɔ’n nun’n, n fa min n sie i min junman’n su dan ti’n, min ɲin kpali min yi nin e mma nɲɔn mun be su. N ma sieli i nzɔliɛ kɛ be nga be kɔ asɔnun sua’n nun’n, n sie min su be nuan bo kpa. Sanngɛ min yi liɛ’n, n sieman min su i nuan bo.

Kɛ ń súan like ń kɔ́’n, n ma sili Zoova i su like kaka. I sɔ’n suli min bo naan m’an fa min wun m’an mɛntɛn i. Ndɛ nga be wluwluli min wun kpa’n, i kun yɛle ndɛ ng’ɔ o Rɔmunfuɛ Mun 10:13 nun’n. Ɔ se kɛ: “Sran kwlaa ng’ɔ bo Zoova i dunman’n, ɔ́ fíte nun.” Kɛ ɔ fin min kaan nun’n, n kunndɛ Ɲanmiɛn. Sanngɛ siɛn’n, m’an wun i!

Ɔ yoli min kɛ ɔ fataman kɛ n di junman asɔnun sua’n nun kun sa. I klikli nun’n, srɛ kunnin min kan. Afin n usali min wun kɛ sɛ n jaso Sinto asɔnun’n nun’n, sran’m bé bú i sɛ. Sanngɛ n seli min wun titi kɛ sɛ n wun Ɲanmiɛn Kpli asɔnun uflɛ nun’n, ń jáso wa. Ɔ maan afuɛ 1989 nun’n, n yoli like nga min klun akunndan’n seli min kɛ n yo’n. N yacili Sinto asɔnun sua’n nun lɔ junman dilɛ, yɛ n fali min wun wlali Zoova sa nun.

Sinto asɔnun sua’n nun lɔ jasolɛ’n w’a yoman pɔpɔ. Min su kpɛn’m be wlali min srɛ, yɛ be miannin min kplɔlɔlɔ kɛ n ka lɔ. Sanngɛ like ng’ɔ yoli kekle kpa mannin min’n yɛle min si nin min nin be kan klelɛ. Kɛ ń kɔ́ be lɔ’n, min awlɛn ba’n si min klun saa, srɛ m’ɔ kun min dan’n ti. Yɛ min ja’n bɔbɔ be glɔglɔli min bo. I ti’n, n jrannin kpɛ sunman n srɛli Zoova kɛ ɔ man min wunmiɛn.

Kɛ n juli min si nin min nin be awlo lɔ’n, i klikli nun’n srɛ m’ɔ kunnin min dan ti’n, n sisili min bo naan m’an kan ndɛ’n. Dɔ kaka sinnin. Sanngɛ kɛ mɔ n srɛli Ɲanmiɛn kpɛ sunman’n ti’n, i agualiɛ su’n n kwla kannin ndɛ’n i kwlaa n kleli min si. N seli i kɛ m’an jaso Sinto asɔnun’n nun afin m’an wun Ɲanmiɛn Kpli yɛ n kunndɛ kɛ ń sú i. I sɔ’n boli i nuan, yɛ ɔ yoli i ya. Min osufuɛ wie’m be bali awlo lɛ naan bé yó naan n kaci ajalɛ’n. N kunndɛman kɛ ń bó be wla. Sanngɛ kusu n si kɛ ɔ fata kɛ n su Zoova. Kɛ ɔ́ kɔ́ i ɲrun’n, min osufuɛ’m be ɲin wa yili min, ajalɛ sɔ mɔ n fali’n ti.

N jasoli Sinto asɔnun sua’n nun sɔ. Sanngɛ min ti’n nun lɔ’n, ɔ yo min kɛ n te o lɔ sa. Afin n fali min wun wlali plɛti junman dilɛ’n nun dan. N miannin min ɲin kpa naan min wla fi su. Sanngɛ like kwlaa nga ń yó’n nun’n, min ɲin kpɛnkpɛn min laa nun.

Ninnge nɲɔn be ukali min naan m’an wla ninnge kwlaa sɔ’m be ase. I klikli’n yɛle kɛ n kunndɛli min sua’n nun ninnge nga be nin min asɔnun laa’n be kɔ likawlɛ’n. Kpɛkun n wɔli be kwlaa be nun. I fluwa-o, i foto-o, i ninnge nga be le gua kpa-o, n wɔli be nun. I nɲɔn su’n, n yoli like kwlaa nga n kwla yo naan e nin Zoova i Lalofuɛ mun y’a san nun titi’n. Be trali min janvuɛ yɛ be suannin min bo kpa. Blɛblɛblɛ, ninnge nga n yoli be laa’n, min wla wa fili be su.

I SU YE NGA N ƝƐNNIN I’N: Kɛ mɔ min ɲin kpali min yi nin min mma’m be su’n ti’n, be wun yoli be kɛ be ngunmin yɛ be o sa. Sanngɛ kɛ n ma wunnin like nga Biblu’n se yasua’m be kɛ be yo’n, mɔ e nin be e wa yoli ninnge wie mun’n, e afiɛn wa sɛli kpa. Kɛ ɔ́ kɔ́ i ɲrun’n, min yi’n wa suli Zoova wie. Andɛ’n, e nin e wa yasua’n nin e wa bla’n nin i wun’n e su Zoova likawlɛ.

Min bakan nun’n, n kunndɛli kpa kɛ ń sú Ɲanmiɛn naan ń úka sran mun. Kɛ n bu i sɔ’n i akunndan’n, n wun kɛ n ɲannin like nga n kunndɛli’n trali su bɔbɔ. Nanwlɛ, n wunman ndɛ kun nga ń kán ń fá lá Zoova i ase-ɔ.

“Laa n si kɛ n mian like kun wun.”—LINƐTI AUTININ

BE WULI I: AFUƐ 1958 NUN

Ɔ FIN: AFRIKI DI SIDI

LAA’N: Ɔ YO I KƐ B’A YI I BLO SA

MIN LAA NUN’N: Be wuli min Gɛɛmistɔnun klɔ’n su. Ɔ ti klɔ kaan kun, yɛ lɔ’n ti fɔun. Be nga be o lɔ’n, be timan aɲanbeunfuɛ kusu be timan yalɛfuɛ. Kɛ min si nin min be wuli min’n, be waan be kwlá nianman min lika ti’n, be fali min mannin bian kun nin i yi. Kɛ ɔ́ yó sɔ nn, n nin-a diman anglo kun bɔbɔ. Be nga be tali min’n be klo sran, yɛ n wa fali be kɛ min si nin min nin sa. Sanngɛ kɛ n sili sa ng’ɔ juli min su’n, min wun yoli min kɛ sran’m b’a yi min blo sa. Ɔ yoli min kɛ n timan bian nin bla nga be tali min’n be wa kun sa, naan be wunman min su sa’n i wlɛ sa.

Kɛ n ɲannin afuɛ 16, n ma boli nzan nɔnwlɛ’m be nun kɔlɛ bo. E nin min janvuɛ mun e kɔ lɔ e ko tie balo wie mun yɛ e si su able. Kɛ n ɲannin afuɛ 17, n ma boli siklɛti nɔnlɛ bo. Min waan min waka’n yo tiaan kɛ bla nga be fite siklɛti piblisite’m be nun’n sa. Kɛ n ɲannin afuɛ 19, n ko dili junman Zoanɛsibugu lɔ. W’a cɛman, min nin sran tɛ wie mun e wa sannin nun. I sɔ’n ti’n, ndɛ tɛtɛ’m be kanlɛ nin siklɛti nɔnlɛ nin nzan nɔnlɛ’n be wa kacili min junman.

Ɔ nin i sɔ ngba’n, n kpinngbin min wun. N to balɔn yɛ n yo ninnge uflɛ wie mun. Asa’n, n tu min klun n di min junman’n i kpa. I sɔ’n ti’n, min dunman’n wa fuli kpa be nga be di ɔɔdinatɛli nun junman’n be nun. I agualiɛ su’n, n ma ɲannin sika kaka. Ɔ maan sran’m be bu min sran. Sanngɛ n diman aklunjɔɛ, yɛ nguan nun tranlɛ’n flannin min. Min klun lɔ’n, n si kɛ n mian like kun wun.

WAFA NGA BIBLU’N NUN NDƐ’N KACILI MIN NZUƐN’N: Kɛ n boli Biblu’n nun like suanlɛ bo’n, n wunnin kɛ Zoova ti Ɲanmiɛn kun m’ɔ klo sran-ɔn. N wunnin i ekun kɛ wafa ng’ɔ yili klolɛ sɔ’n i nglo’n i kun yɛle kɛ ɔ fali Biblu’n mannin e. Ɔ ti kɛ lɛtri kun yɛ ɔ klɛ blɛli e naan ɔ́ klé e atin sa. (Ezai 48:17, 18) N wunnin i wlɛ kɛ sɛ min waan Zoova kle min atin’n, ɔ fata kɛ n kaci min sa ninnge wie’m be nun.

Like kun m’ɔ fata kɛ n kaci’n yɛle min janvuɛ mun. N buli ndɛ ng’ɔ o Ɲanndra Mun 13:20 i su akunndan. Ɔ se kɛ: “Sran ng’ɔ nin ngwlɛlɛfuɛ’n be nanti’n, ɔ́ káci ngwlɛlɛfuɛ, sanngɛ sran ng’ɔ nin sinnglinfuɛ’n be san nun’n, ɔ́ ɲán ndɛ.” Biblu’n nun ndɛ sɔ’n ukali min naan e nin be nga e nanti laa’n y’a sanman nun kun. Yɛ n ma trali janvuɛ uflɛ Zoova i Lalofuɛ’m be afiɛn.

Like nga i ase wlalɛ yoli kekle mannin min’n yɛle siklɛti nɔnlɛ’n. Kɛ ń mían min ɲin ń wlɛ́ i ase’n, nn sa uflɛ wo min su. Kɛ n jrannin siklɛti nɔnlɛ’n, n ma cɛnnin n ukali su lele kilo 13. I sɔ’n yoli maan m’an buman min wun sran kun. Ɔ dili afuɛ blu naan min waka’n w’a yo kɛ laa’n sa. Sanngɛ n wunnin i wlɛ kɛ siklɛti i ase wlalɛ’n, ɔ ti ajalɛ kpa kun mɔ n fali-ɔ. N srɛli Zoova titi, yɛ ɔ mannin min wunmiɛn naan m’an kwla wlɛ i ase.

I SU YE NGA N ƝƐNNIN I’N: Siɛn’n, n ti juejue, yɛ n di aklunjɔɛ. N bumɛn i kun kɛ junman dan dilɛ’n, dunman kunndɛlɛ’n annzɛ aɲanbeun ninnge’mbe kunndɛlɛ’n yɛ be man aklunjɔɛ-ɔ. Sanngɛ kɛ n kan Ɲanmiɛn ndɛ n kle sran mun’n, yɛ n di aklunjɔɛ-ɔ. Dɔ nga su’n, min wiengu junman difuɛ nsan nin min wun e su Zoova. Kwlaa naan bian nin bla nga be tali min’n be tinuntinun b’a wu’n, n kannin sran cɛnlɛ’n mɔ Biblu’n kɛn i ndɛ’n n kleli be.

Kɛ n fali min wun mantannin Zoova’n i sɔ’n ukali min naan min wun w’a yoman min kɛ b’a yi min blo sa kun. Ɔ yoli maan n ɲannin aniaan kpanngban mɛn wunmuan’n nun. Aniaan sɔ’m be ti min nin, be ti min si, yɛ be ti min niaan bian ɔ nin min niaan bla.—Marki 10:29, 30.

[Foto]

N wunnin kɛ Zoova i Lalofuɛ’m be klo sran.

[Foto]

Sinto asɔnun sua nga laa n kɔ nun’n.