Binago kan Biblia an Saindang Buhay

TAANO ta binayaan nin sarong babae na labi nang 60 anyos an pagsamba sa idolo? Ano an nagpahiro sa sarong padi nin Shinto na bayaan an pagserbi nia sa templo asin magin Kristianong ministro? Paano nakaya nin sarong babae na ipinaampon pagkamundag an pakamate na sia pinabayaan? Estudyare an mga sinabi ninda.

“Bako Na Akong Oripon nin mga Idolo.”—ABA DANSOU

TAON NIN PAGKAMUNDAG: 1938

GINIKANAN NA NASYON: BENIN

DATING NAGSASAMBA SA IDOLO

AN BUHAY KO KAIDTO: Nagdakula ako sa So-Tchahoué, sarong baryo na nasa malaboy na lugar harani sa danaw. An mga tawo duman nagsisira asin nag-aataman nin mga baka, kanding, karnero, orig, asin gamgam. Mayo duman nin mga tinampo, kaya mga baroto asin bangka an ginagamit ninda. An kadaklan na harong gibo sa kahoy asin gugon, pero may mga gibo man sa ladrilyo. An kadaklan na tawo duman pobre. Dawa siring, dikit an krimen duman kun ikokomparar sa mga siudad.

Kan aki pa kami kan tugang kong babae, ilinaog kami ni Tatay sa kombento para sa pagsamba sa anting-anting, na duman kami enot na natokdoan kan tradisyonal na paniniwalang iyan. Kan magdakula ako, inako ko bilang sakong dios si Dudua (Oduduwa) kan kulturang Yoruba. Naggibo ako nin harong para sa dios na ini asin regular akong nagdodolot nin mga atang na kamote, lana nin palma, kohol, manok, salampati, asin manlaenlaen pang hayop. Magastos ini, asin sa parate haros digdi nauubos an kuarta ko.

KUN PAANO BINAGO KAN BIBLIA AN BUHAY KO: Kan mag-adal ako sa Biblia, nanodan ko na si Jehova an solamenteng tunay na Dios. Nanodan ko man na dai nia inooyonan an paggamit nin mga idolo sa pagsamba. (Exodo 20:4, 5; 1 Corinto 10:14) Narealisar ko kun ano an kaipuhan kong gibohon. Kaya iinapon ko an gabos kong imahen asin hinale sa harong an gabos na may koneksion sa pagsamba sa idolo. Dai na ako nagkokonsulta sa mga parahula, asin dai na ako nag-iiba sa mga ritual asin mga seremonya sa lobong na ginigibo sa lugar mi.

Para sa arog kong babae na labi nang 60 anyos, bakong pasil gibohon an mga pagbabagong ini. Kontra an sakong mga katood, paryente, saka kataraed asin ginibo ninda akong ngingisihan. Alagad ipinamibi ko ki Jehova na tawan ako nin kosog na gibohon an tama. Naranga ako kan sinasabi sa Talinhaga 18:10: “Posog na torre an gñaran ni Jehova: sia an dadalaganan kan banal, asin ta papatindogon sia.”

An saro pang nakatabang sa sako iyo an pag-atender sa mga pagtiripon kan mga Saksi ni Jehova. Naheling ko duman an Kristianong pagkamoot, asin huminanga ako huling nagmamaigot sinda na mamuhay oyon sa halangkaw na mga pamantayan kan Biblia sa moral. An naheling ko nakakombensir sa sako na Mga Saksi ni Jehova an tunay na relihion.

 KUN PAANO AKO NAKINABANG: An pag-aplikar kan mga prinsipyo sa Biblia nakatabang sa sako na paoswagon an pakikiiba ko sa sakong mga aki. Namate ko man na nagianan ako. Dati, inuubos ko an sakong kuarta sa mayong buhay na mga idolo na dai man lamang nakatabang sa sako. Ngonyan, an sinasamba ko na iyo si Jehova, na nagtatao nin nagdadanay na solusyon sa gabos niatong problema. (Kapahayagan 21:3, 4) Ogmahon ako na bako na akong oripon nin mga idolo, kundi oripon na ni Jehova! Sa saiya ako nagkaigwa nin tunay na katiwasayan asin proteksion.

“Aki Pa Ako, Hinahanap Ko Na an Dios.”—SHINJI SATO

TAON NIN PAGKAMUNDAG: 1951

GINIKANAN NA NASYON: HAPON

DATING PADI NIN SHINTO

AN BUHAY KO KAIDTO: Nagdakula ako sa sarong puerang banwaan sa Fukuoka Prefecture. Relihiosong marhay an sakong mga magurang; pinadakula ninda ako na nagsasamba sa mga dios nin Shinto. Kan solterito ako, parate kong iniisip an kaligtasan ko asin gustohon kong tumabang sa mga may problema. Nagigirumdoman ko kan maghapot an maestro mi sa elementarya kun ano an gusto ming gibohon pagdakula mi. Espesipiko an pangarap kan mga kaklase ko, arog nin pagigin sientista. Sinabi ko na pangarap kong maglingkod sa Dios. Pinagngirisihan ninda ako.

Pagkatapos nin haiskul, naglaog ako sa sarong eskuelahan para sa mga gustong magtokdo nin relihion. Nabisto ko sa pagsasanay na iyan an sarong padi nin Shinto, na kun libre sia, may binabasa siang libro na itom an tutob. Sarong aldaw hinapot nia ako, “Aram mo Sato kun ano an librong ini?” Naheling ko an tutob kan libro, kaya nagsimbag ako, “Biblia po.” Sinabi nia, “An gabos na gustong magin padi nin Shinto dapat magbasa kan librong ini.”

Nagluwas tolos ako asin nagbakal nin Biblia. Ilinaag ko an Biblia sa heling-heling na parte kan sakong eskaparate asin iningatan kong marhay iyan. Alagad dai ko iyan nabasa huling sibot-sibot ako sa pag-eskuela. Kan makatapos ako, nagpoon akong magserbi sa sarong templo bilang padi nin Shinto. An pangarap ko poon sa pagkaaki naabot ko.

Minsan siring, dai nahaloy nadiskobre ko na an pagigin padi nin Shinto bakong arog kan inaasahan ko. An kadaklan na padi mayong gayong pagkamoot  o pagmakolog sa iba. Dakol man an kulang sa pagtubod. An saro sa mga superyor ko nagsabi pa ngani sa sako: “Kun gusto mong magin mapanggana digdi, dapat na an sabihon mo sana iyo an mga bagay na may koneksion sa pilosopiya. Bawal sabihon an manongod sa pagtubod.”

Huli sa siring na mga tataramon, nadesganar ako sa relihion na Shinto. Minsan ngani padagos akong nagseserbi sa templo, nagpoon akong magsiyasat sa ibang mga relihion. Pero, garo baga mayo sa mga iyan an may ikakaalok na mas marahay. Mientras na nagdadakol an nasisiyasat kong relihion, mas nadedesganar man ako. Naisip ko na mayo nin katotoohan sa arin man na relihion.

KUN PAANO BINAGO KAN BIBLIA AN BUHAY KO: Kan 1988, may nabisto akong Budista na nagdagka sa sako na basahon an Biblia. Nagirumdoman ko an padi nin Shinto na arog man kaiyan an sadol sa sako mga taon na an nakaagi. Nagdesisyon ako na sunodon iyan. Kan ponan ko an pagbasa kan Biblia, nawili tolos ako dian. Kun beses, magdamlag akong nagbabasa sagkod na abotan ako nin liwanag.

Huli sa sakong nabasa, napahiro ako na mamibi sa Dios kan Biblia. Nagpoon ako sa modelong pamibi na nasa Mateo 6:9-13. Inootro ko ini kada duwang oras—dawa mantang nagseserbi sa templo nin Shinto.

Dakol akong hapot manongod sa nababasa ko. Kan panahon na idto, may agom na ako, asin aram ko na an mga Saksi ni Jehova nagtotokdo sa mga tawo manongod sa Biblia huling nadalaw na ninda kaidto an agom ko. Naghanap ako nin Saksi asin pigparahapot ko sia. Huminanga ako kan gamiton nia an Biblia sa pagsimbag sa kada hapot. Iinareglo nia na tokdoan ako nin mga Saksi dapit sa Biblia.

Dai nahaloy pagkatapos kaiyan, nagpoon na akong mag-atender sa mga pagtiripon kan mga Saksi ni Jehova. Dai ko narealisar kan panahon na idto na an nagkapira palan sa mga Saksing yaon duman trinatar ko nin maraot kan nakaagi. Dawa siring, maogma ninda akong tinaratara asin inasikaso.

Sa mga pagtiripon na idto, nanodan ko na inaasahan nin Dios na an mga agom na lalaki mapaheling nin pagkamoot asin matao nin onra sa mga kapamilya ninda. Sagkod sa puntong iyan, nakapokus na marhay ako sa sakong pagserbi bilang padi kaya napabayaan ko an sakong agom asin an duwa ming aki. Narealisar ko na atentibo akong nagdadangog sa sinasabi kan mga nagduduman sa templo tanganing sumamba, alagad dai ko pa lamang nagibo iyan sa agom ko.

Mientras na padagos an pag-adal ko, nagigin dayupot ako ki Jehova huli sa dakol na nanonodan ko manongod sa saiya. Napahiro akong marhay kan mga teksto na arog kan Roma 10:13, na nagsasabi: “An gabos na nag-aapod sa ngaran ni Jehova maliligtas.” (NW) Aki pa ako, hinahanap ko na an Dios, asin ngonyan, nanompongan ko man giraray sia!

Nagpoon na akong makamate na bako akong para sa templo. Kan enot, nahadit ako sa iisipon kan iba kun mahale ako sa relihion na Shinto. Alagad sinasabi ko pirme sa sadiri ko na kun mahanap ko sa iba an tunay na Dios, mahale ako. Kaya kan tigsoli (spring) nin 1989, nagdesisyon akong sunodon an sakong konsensia. Naghale ako sa templo asin ipinabaya ko ki Jehova an sakong sadiri.

Bakong pasil an paghale sa templo. Inanggotan ako kan sakong mga superyor asin pinirit ninda akong magdanay. Pero, an mas masakit iyo an pagsabi kaiyan sa sakong mga magurang. Mantang pasiring sa harong ninda, haditon ako kaya makolog an sakong daghan asin maluyahon an sakong mga tabay! Paporopondo ako tanganing mamibi ki Jehova para sa kosog.

 Pag-abot ko sa harong kan sakong mga magurang, takoton akong sabihon an tuyo ko. Luminihis an nagkapirang oras. Sa katapustapusi, pagkapamibi nin dakol na beses, ipinaliwanag ko ki Tatay an gabos. Sinabi ko sa saiya na nanompongan ko na an tunay na Dios asin babayaan ko na an relihion na Shinto tanganing maglingkod sa Saiya. Nabigla asin namondo si Tatay. Nagduruman an ibang paryente mi asin hiningoa nindang bagohon an isip ko. Habo kong kolgan an pamilya ko, alagad aram ko man na an paglingkodan si Jehova iyo an tamang gibohon. Pag-abot nin panahon, iginalang na ako kan sakong pamilya huli sa desisyon ko.

Magkalaen an aktuwal na paghale sa templo asin an paghale kaiyan sa isip ko. Hararom an pagkagamot sa sako kan buhay bilang padi. Nagmaigot akong lingawan iyan, alagad saen man ako magheling, garo baga may nagpapagirumdom pirme kan dati kong buhay.

Duwang bagay an nakatabang sa sako. Enot, hinalungkat ko sa harong an gabos na bagay na may koneksion sa dating relihion ko. Dangan sinurulo ko iyan—mga libro, retrato, asin dawa mamahalon na mga koleksion. Ikaduwa, pinagmaigotan ko sagkod sa mapupuede na makaibaiba an mga Saksi. Dakulang tabang sa sako an saindang pakikikatood asin suporta. Luway-luway kong nalingawan an dati kong pamumuhay.

KUN PAANO AKO NAKINABANG: Napapabayaan ko kaidto an sakong agom asin mga aki kaya mamondoon sinda. Alagad kan tawan ko na sinda nin atension, arog kan itinotokdo kan Biblia na dapat gibohon kan mga agom na lalaki, nagin mas dayupot kami. Pag-abot nin panahon, an sakong agom naglingkod na man ki Jehova. Kaiba an aki ming lalaki, pati na an aki ming babae asin an agom nia, sararo na kami ngonyan sa tunay na pagsamba.

Kun binabalikan ko an pangarap ko kan aki pa ako na maglingkod sa Dios asin tumabang sa iba, naiisip-isip ko na nanompongan ko na an gabos na hinahanap ko—asin sobra pa ngani. An sakong pagpasalamat ki Jehova dai ikakapahayag sa tataramon sana.

“Aram Kong may Kulang.”—LYNETTE HOUGHTING

TAON NIN PAGKAMUNDAG: 1958

GINIKANAN NA NASYON: APRIKA DEL SUR

DATING NAKAKAMATE NA PINABAYAAN SIA

AN BUHAY KO KAIDTO: Namundag ako sa Germiston, sarong medyo maoswag na banwaan na may minahan asin mayong gayong krimen. Iniisip kan sakong mga magurang na dai ninda ako kayang atamanon kaya ipinaampon ninda ako. Kan 14 aldaw pa sana an edad ko, inampon na ako nin sarong mamomoton na mag-agom na iyo na an namidbid kong mga magurang. Pero, kan maaraman ko an totoo, nasakitan akong labanan  an pakamate na pinabayaan ako. Nagpoon akong makamate na bako akong kapamilya kan mga nag-ampon sa sako asin na dai talaga ninda ako naiintindihan.

Poon kan mga 16 anyos ako, kaming magbararkada nagduduman sa mga cocktail bar tanganing magbayle asin magdangog sa mga nagtutugtog. Sa edad na 17, nagpoon akong magsigarilyo. Gusto kong magin arog kaniwang kan mga modelo nin sigarilyo. Kan mag-19 anyos na ako, nagtrabaho ako sa Johannesburg asin napabarkada tolos sa bakong marahay na kairiba. Dai nahaloy, nagmumuda na ako, nagpaparasigarilyo, asin nagpaparainom kun katapusan kan semana.

Dawa siring, aktibo ako sa pisikal. Regular ako sa aerobics, asin nagkakawat ako nin pambabaeng soccer asin iba pang isport. Nagmaigot man ako sa sakong karera, asin namidbid sa industriya nin kompyuter. Bilang resulta, maginhawa ako sa pinansial, asin para sa dakol mapanggana ako. Pero an totoo, mamondoon ako—mayong direksion asin desganado sa buhay. Sa boot-boot ko, aram kong may kulang.

KUN PAANO BINAGO KAN BIBLIA AN BUHAY KO: Kan mag-adal ako sa Biblia, nanodan ko na si Jehova sarong Dios nin pagkamoot. Nanodan ko man na ipinaheling nia an pagkamoot na iyan paagi sa pagtao sa sato kan saiyang Tataramon, an Biblia. Garo man sana sinuratan nia kita personalmente tanganing giyahan an satong mga lakad. (Isaias 48:17, 18) Narealisar ko na kun gusto kong makinabang sa mamomoton na paggiya ni Jehova, kaipuhan kong gumibo nin darakulang pagbabago sa buhay.

An saro na kaipuhan kong bagohon iyo an mapadapit sa sakong kairiba. Isinapuso ko an sinasabi sa Talinhaga 13:20: “Mag-iba ka sa madonong nganing ika magin madonong; kun makipagkatood ka sa lolong mapapahamak ka.” (An Marahay na Bareta Biblia) Napahiro ako kaiyan na bayaan an dati kong kairiba asin humanap nin bagong mga katood sa Mga Saksi ni Jehova.

Pinakamasakit sa sako an pagpondo sa pagsigarilyo; grabe an pagkaadikto ko dian. Mantang luway-luway kong nalalabanan iyan, may saro pang nagin problema. Nadagdagan an timbang ko nin 13.6 kilos huli sa dai na pagsigarilyo! Huli kaiyan, nagluya an sakong kompiansa sa sadiri, asin inabot ako nin haros sampulong taon bago makabalik sa dati an timbang ko. Pero, aram kong an pagpondo sa pagsigarilyo iyo an tamang gibohon. Padagos akong namimibi ki Jehova, asin tinawan nia ako nin kosog tanganing magin mapanggana.

KUN PAANO AKO NAKINABANG: Mas marahay na ngonyan an salud ko. Kontento man ako—dai ko na pigpaparahanap an masakit makamtan na kaogmahan na ipinapanuga kan sekular na karera, estado, asin kayamanan. Imbes, naoogma akong sabihon sa iba an mga katotoohan sa Biblia. Bilang resulta, tolo sa dati kong mga katrabaho an naglilingkod na ngonyan ki Jehova kaiba ming mag-agom. Bago magadan an mga nag-ampon sa sako, nasabi ko sa sainda an manongod sa panuga kan Biblia na pagkabuhay liwat sa paraisong daga.

An pagigin harani ki Jehova nakatabang sa sako na makaya an pakamate na pinabayaan ako. Ipinamate nia sa sako na dai na ako nagsosolo paagi sa pagdara sa sako sa pambilog na kinaban na pamilya na kompuesto nin mga kapagtubod. Sa sainda, dakol akong ina, ama, asin tugang.—Marcos 10:29, 30.

[Ritrato sa pahina 12]

Naheling ko an Kristianong pagkamoot sa mga Saksi ni Jehova

[Ritrato sa pahina 13]

An templo nin Shinto, kun saen ako dating nagsasamba