Ang Bibliya Makabag-o sa Kinabuhi

NGANONG ang babayeng kapin na sa 60 anyos miundang sa pagsimbag idolo? Nganong gitalikdan sa usa ka tawo ang iyang pagkapari sa Shinto aron mahimong Kristohanong ministro? Giunsa pagbuntog sa usa ka babayeng sinagop ang pagbati nga siya pinasagdan? Basaha ang ilang mga asoy.

“Dili na ko Ulipon sa mga Idolo.”—ABA DANSOU

NATAWO: 1938

NASOD: BENIN

KANIADTO: MAGSISIMBAG IDOLO

KAAGI: Nagdako ko sa So-Tchahoué, usa ka baryo nga nahimutang sa kalamakan duol sa lanaw. Ang mga tawo mangisda ug magbuhig mga baka, kanding, karnero, baboy, ug mga langgam. Walay mga karsada, busa ang mga tawo mogamit ug mga baroto ug bangka sa pagpanaw. Kasagaran ang mga balay ginama sa kahoy ug bugang, apan ang pipila ginama sa mga tisa. Pobre ang kadaghanan. Apan wala kaayoy krimen, dili sama sa mga siyudad.

Sa bata pa ko, kami sa akong magulang nga babaye gidala ni Papa sa kombento sa mga espiritista, diin kami gitudloan sa tradisyonal nga pagtulon-an niini. Pagdako nako, nagsimba ko kang Dudua (Oduduwa) nga diyos sa Yoruba. Naghimo kog balay alang niini nga diyos ug kanunayng maghalad niini ug ube, lana sa palma, mga hilahila, manok, salampati, ug uban pang mga hayop. Gastoso kini, ug sagad halos mahurot ang akong kuwarta.

GIBAG-O SA BIBLIYA ANG AKONG KINABUHI: Sa pagtuon nakog Bibliya, akong nasayran nga si Jehova mao ang bugtong matuod nga Diyos. Nasayran sab nako nga siya dili mouyon sa pagsimbag mga idolo. (Exodo 20:4, 5; 1 Corinto 10:14) Nakaamgo ko kon unsay angay nakong buhaton. Busa gipanglabay nako ang tanan kong imahen ug ang tanang butang nga nalangkit sa pagsimbag idolo. Wala na ko mosangpit sa mga orakulo ug moapil sa bisan unsang mga rituwal.

Kay kapin nag 60 anyos, dili sayon alang nako ang paghimo niini. Gisupak ug gibugalbugalan ko sa akong mga higala, paryente, ug mga silingan. Apan nag-ampo ko kang Jehova sa paglig-on kanako. Nadasig ko sa mga pulong sa Proverbio 18:10, nga nag-ingon: “Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.”

Ang lain pa nga nakatabang nako mao ang pagtambong sa mga tigom sa mga Saksi ni Jehova. Nakita ko kanila ang Kristohanong gugma, ug nakadayeg ko sa ilang pagkinabuhi sa hataas nga moral nga mga sukdanan sa Bibliya. Kini nakapakombinsir nako nga sila ang matuod nga relihiyon.

MGA KAAYOHAN NGA AKONG NABATONAN: Ang pagpadapat sa mga prinsipyo sa  Bibliya nakatabang nako nga mouswag ang akong relasyon sa akong mga anak. Gibati usab nako nga migaan ang akong palas-anon. Nag-usik lang kog kuwarta alang sa walay kinabuhing mga idolo nga wala gayod makatabang kanako. Karon, gisimba ko si Jehova nga makasulbad sa tanan natong mga problema. (Pinadayag 21:3, 4) Malipayon kaayo ko nga dili na ko ulipon sa mga idolo, kondili ulipon na ni Jehova! Kaniya akong nakaplagan ang tinuod nga kasegurohan ug panalipod.

“Nangita ko sa Diyos Sukad pa sa Pagkabata.”—SHINJI SATO

NATAWO: 1951

NASOD: JAPAN

KANIADTO: PARI SA SHINTO

KAAGI: Nagdako ko sa hilit nga lungsod sa Fukuoka Prefecture. Relihiyoso kaayo ang akong mga ginikanan, ug gimatuto ko sa pagsimba sa mga diyos sa Shinto. Sa bata pa ko, sagad mamalandong ko sa akong kaluwasan ug gusto kaayong motabang sa mga tawong may suliran. Nahinumdom ko sa elementarya pa ko nga nangutana ang among magtutudlo kon unsay gusto namo inigkadako. Espesipiko kaayo ang tubag sa akong mga klasmet, sama sa pagkahimong siyentista. Miingon ko nga gusto kong mag-alagad sa Diyos. Gikataw-an ko nilang tanan.

Human sa hayskul, mieskuyla ko sa seminaryo sa Shinto. Nianang tungora, nahibalag ko ang usa ka pari nga sa iyang libreng panahon magbasag librong itom ug hapin. Usa ka adlaw niana, siya nangutana nako, “Sato, nahibalo ka ba unsa ning libroha?” Nakita nako ang hapin sa libro, busa ako mitubag, “Ang Bibliya.” Siya miingon, “Ang tanan nga buot magpari sa Shinto kinahanglang magbasa niini.”

Busa mipalit dayon kog Bibliya. Gibutang ko kini sa dapit nga daling makita diha sa akong butanganag mga libro ug giampingan kini. Apan wala koy panahon sa pagbasa niini kay puliki kaayo ko sa eskuylahan. Pagkahuman nakog eskuyla, nag-alagad ko sa simbahan ingong pari sa Shinto. Ang akong pangandoy sa pagkabata natuman.

Apan, may nadiskobrehan ko nga wala nako damha sa pagkahimong pari sa Shinto. Kadaghanang pari wala kaayoy interes o kahingawa sa uban. Daghan usab ang walay pagtuo. Gani giingnan  ko sa usa sa akong mga superyor: “Kon buot kang motunhay dinhi, kinahanglang maghisgot ka lang ug pilosopiya. Gidili ang paghisgot bahin sa pagtuo.”

Tungod niini nawad-an kog gana sa relihiyon sa Shinto. Bisan tuod nagpadayon ko sa pagkapari, nagsusi ko sa ubang mga relihiyon. Apan, daw walay usa kanila nga maayo. Sa pagsusi nako sa uban pang relihiyon, misamot hinuon ang akong pagkadismaya. Gibati nako nga walay kamatuoran sa bisan unsang relihiyon.

GIBAG-O SA BIBLIYA ANG AKONG KINABUHI: Niadtong 1988, nakahibalag kog Budhista nga nagdasig nako nga magbasag Bibliya. Nahinumdom ko nga kaniadto ang pari sa Shinto nagdasig sab nako niana. Busa ako kanang gihimo. Sa pagsugod nakog basa sa Bibliya, giganahan dayon ko niini. Usahay mabuntagan kog basa niini.

Tungod sa akong nabasa, buot na kong moampo sa tinuod nga Diyos. Nagsugod ko sa modelong pag-ampo nga giingon sa Mateo 6:9-13. Sublion ko kini kada duha ka oras, bisan samtang nagserbisyo didto sa simbahan sa Shinto.

Daghan kog pangutana bahin sa akong nabasa. Minyo na ko nianang tungora ug nahibalo kong ang mga Saksi ni Jehova nagtudlog Bibliya kay sila nakaduaw na sa akong asawa kaniadto. Nangita kog Saksi ug gisukna ko siyag daghang pangutana. Bilib ko kaayo kay gipasukad niya sa Bibliya ang matag tubag. Gihikay niining babayeng Saksi nga matun-an kog Bibliya.

Sa wala madugay, nagtambongan na ko sa mga tigom sa mga Saksi ni Jehova. Sa sinugdan wala ko makamatikod nga lakip diay sa mga nanambong mao kadtong wala nako hatagig maayong pagtagad kaniadto. Bisan pa niana, mainiton silang nag-abiabi kanako.

Sa maong mga tigom, akong nakat-onan nga gidahom sa Diyos nga higugmaon ug pasidunggan sa mga bana ang mga membro sa ilang pamilya. Nianang panahona, nalinga kaayo ko sa akong pagkapari nga tungod niana napasagdan na nako ang akong asawa ug duha ka anak. Naamgohan nako nga maminaw kog maayo kon unsay isulti sa mga tawong moadto sa simbahan apan bisag kas-a wala nako paminawi ang akong asawa.

Sa miuswag ang akong pagtuon, daghan kog nakat-onan bahin kang Jehova nga nakapasuod nako kaniya. Natandog kaayo ko sa mga pulong sa Roma 10:13 nga nag-ingon: “Ang matag usa nga magatawag sa ngalan ni Jehova maluwas.” Nangita ko sa Diyos sukad pa sa pagkabata, ug karon nakaplagan ra gyod nako siya!

Gusto na kong mobiya sa simbahan. Primero, nabalaka ko kon unsay ikasulti sa uban kon talikdan nako ang relihiyon sa Shinto. Apan kanunay kong moingon sa akong kaugalingon nga mobiya ko kon makaplagan ko na ang matuod nga Diyos. Busa sa tingpamulak sa 1989, gisunod ko ang akong konsensiya. Mibiya ko sa simbahan ug gisalig nako ang akong kaugalingon kang Jehova.

Dili sayon ang paghawa sa simbahan. Gikasuk-an ko sa akong mga superyor ug gidid-an ko sa pagbiya. Apan, mas lisod pa gyod ang pagsulti niini sa akong mga ginikanan. Sa pagpaingon nako sa balay sa akong ginikanan, naghuot ang akong dughan ug nangurog ang akong tuhod! Kadaghan ko mohunong aron mag-ampo kang Jehova sa paglig-on kanako.

 Pag-abot nako didto, sa sinugdan nahadlok kaayo kong hisgotan kini. Apan paglabay sa mga takna ug human sa hilabihang pag-ampo, gisulti ra gyod nako kang Papa ang tanan. Gisultihan nako siya nga nakaplagan ko ang matuod nga Diyos ug akong talikdan ang relihiyong Shinto aron moalagad Kaniya. Nakurat si Papa ug naguol. Miadto sa balay ang uban nakong mga paryente ug gikombinsir ko nila nga dili mobiya. Dili ko buot nga masakitan ang akong pamilya, apan nasayod sab ko nga ang pag-alagad kang Jehova mao ang angayng buhaton. Sa kadugayan, misabot ra sila sa akong desisyon.

Nakabiya na ko sa simbahan, apan lisod ang pagpapas niini sa akong hunahuna. Naningkamot kong makalimtan ang akong kinabuhi sa pagkapari, apan bisag asa ko moadto daw kanunayng may magpahinumdom kanako sa kanhi kong kinabuhi.

Duha ka butang ang nakatabang kanako aron bug-os ko kining makalimtan. Una, gisuhid ko pag-ayo ang tanang butang sa among balay nga nalangkit sa kanhi kong pagsimba. Unya ako kining gipanunog—mga libro, letrato, ug bisan ang mahalong mga handomanan. Ikaduha, naningkamot ko kanunay nga makig-uban sa mga Saksi. Ang ilang kahingawa nakatabang pag-ayo kanako. Inanay kong nakalimtan ang kanhi kong kinabuhi.

MGA KAAYOHAN NGA AKONG NABATONAN: Sa una, gipasagdan lang nako ang akong asawa ug mga anak, ug kini nakapaguol kaayo kanila. Apan sa dihang naggahin na kog panahon kanila, ingon sa gitudlo sa Bibliya, nasuod mi. Sa ulahi, ang akong asawa nag-alagad usab kang Jehova. Kami karon nahiusa sa matuod nga pagsimba, duyog sa among anak nga lalaki, anak nga babaye, ug sa iyang bana.

Kon palandongon ko ang akong pangandoy sa pagkabata nga mag-alagad sa Diyos ug motabang sa ubang mga tawo, ikaingon nako nga natuman gayod kini. Dako gayod ang akong pasalamat kang Jehova.

“Sa Pagkatinuod, Haw-ang ang Akong Gibati.”—LYNETTE HOUGHTING

NATAWO: 1958

NASOD: SOUTH AFRICA

KANIADTO: MIBATI NGA SINALIKWAY

KAAGI: Natawo ko sa Germiston, usa ka lungsod nga minahan nga wala kaayoy krimen. Kay naghunahunang dili makaatiman kanako, nakahukom ang akong ginikanan sa pagpasagop kanako. Ako 14 pa lang ka adlaw sa dihang gisagop sa usa ka mahigugmaong magtiayon, kinsa giisip nako nga akong mga ginikanan. Bisan pa niana, human nako masayri ang akong kagikan, nagpatigbabaw kanako ang pagbati nga ako sinalikway.  Gihunahuna nako nga wala koy luna sa dili nako pursosong mga ginikanan ug nga sila wala gayod makasabot kanako.

Pagka-16 anyos nako, nagsugod na kog inom-inom sa mga bar diin kami sa akong mga higala manayaw ug maminawg banda. Pag-edad nakog 17, nanigarilyo na ko. Gusto ko nga nindot kog lawas sama sa mga modelo nga akong nakita sa mga anunsiyo sa sigarilyo. Pagka-19 anyos nako, nagtrabaho ko sa Johannesburg, diin dali ra kong nakabarkada. Sa kadugayan himalikas na ko, kusog manigarilyo, ug maghuboghubog sa mga adlawng Sabado ug Dominggo.

Bisan pa niana, aktibo ko sa pisikal. Kanunay kong mag-ehersisyo ug mag-soccer ug uban pang mga dula. Nagtrabaho pod kog maayo, ug ilado ko sa akong gitrabahoang kompaniya sa kompiyuter. Busa daghan kog kuwarta, ug alang sa kadaghanan ako malamposon. Apan, dili gayod ako malipayon—nahugno ug nadismaya ko sa akong kinabuhi. Sa pagkatinuod, haw-ang ang akong gibati.

GIBAG-O SA BIBLIYA ANG AKONG KINABUHI: Sa pagtuon nako sa Bibliya, nahibaloan nako nga si Jehova maoy Diyos sa gugma. Nahibaloan ko usab nga iyang gipakita kana nga gugma pinaagi sa paghatag kanato sa Bibliya, ug siya samag personal nga nagsulat kanato aron kita magiyahan. (Isaias 48:17, 18) Naamgohan ko nga aron makabenepisyo sa mahigugmaong paggiya ni Jehova, kinahanglan mohimo kog dakong kabag-ohan.

Ang usa nga kinahanglan kong bag-ohon mao ang akong mga kaubanan. Gipabilhan ko ang Proverbio 13:20 nga nag-ingon: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” Kana nga prinsipyo nakatabang nako aron biyaan ang kanhi kong mga higala ug mangitag bag-ong mga higala taliwala sa mga Saksi ni Jehova.

Ang kinalisdang hagit mao ang paghunong sa pagpanigarilyo kay nagiyan ko niini. Sa dihang inanay kong nabuntog kini, may lain pang hagit nga akong giatubang. Sa pag-undang kog panigarilyo, nadugangan ang akong timbang ug kapin sa 13.6 ka kilo! Gikaulaw ko kaayo kini, ug miabot pag halos napulo ka tuig una mawala kining sobra nga timbang. Apan, nahibalo ko nga angay gayong hunongon ang pagpanigarilyo. Padayon kong nag-ampo kang Jehova, ug iya kong gihatagag kusog aron magmadaogon.

MGA KAAYOHAN NGA AKONG NABATONAN: Ako mas himsog na karon. Kontento na usab ko ug wala na mangagpas sa malimbongong kalipay nga gipanaad sa sekular nga karera, dungog, ug bahandi. Hinunoa, nakaplagan ko ang kalipay sa pagpaambit sa uban sa mga kamatuoran sa Bibliya. Ingong resulta, ang tulo sa kanhi kong mga kaubanan nag-alagad na karon kang Jehova, duyog kanako ug sa akong bana. Sa wala pa mamatay ang mga nagsagop nako, nasulti ko kanila ang saad sa Bibliya nga dunay pagkabanhaw sa paraisong yuta.

Ang pagpakigsuod kang Jehova nakatabang kanako nga dili na mobating sinalikway. Gipabati ni Jehova kanako nga ako bahin sa pamilya sa mga isigkamagtutuo sa tibuok kalibotan. Taliwala kanila nakabaton kog daghang inahan, amahan, igsoong lalaki ug babaye.—Marcos 10:29, 30.

[Hulagway sa panid 12]

Nasinatian nako taliwala sa mga Saksi ni Jehova ang Kristohanong gugma

[Hulagway sa panid 13]

Ang simbahan sa Shinto diin ako kanhi nagsimba